NA MARAMARÊRAVA 19
19
1Manga go matareha ma ki korokoro na parongamu,
igo ko teharia na enoni ni hagaparunga
i hagahagaparu tare.
2Manga go tagara ramo purupuru,
igo ko tagara hagaborâ ma.
Manga go hagasua, ngaia ki page râ tasi.
3Tani na enoni ka hagaerasira mareta
renia na bekaniha iata mareta
ma ka hagatoraia na Araha renia.
4Manga go ruruguha,
na ani ga manatangenigo ka rakorako.
Ma ki manga go matareha, ki mareha.
5Manga go tohetohe vero igê na tamasinga,
na hagaitangiha ki page tarahugo.
I asa vi ta na marâ râ nikâ.
6Manga go enoni raha,
na enoni hato ka gunahia viga manatangenigo.
Tagenana ma matena go mamahata.
7Na enoni matareha ki asa vige tarahua
na hetamaniha tenira na goana.
Na enoni i pasina ki asa vige manatangenia.
Henaka vi ngaia ki uhungia vi manatangenira
ma ngaira ka usisitenia ngavê.
8Manga go gunahia na aitangisiha,
igo ko korokoro tangago maremu.
Manga na aitangisiha ma ki bêngenigo,
igo ko akê me maninga.
9Manga go tohetohe vero igê na tamasinga,
na hagaitangiha ki page tarahugo.
I asa vi ta na marâ râ nikâ.
10I pe araria na enoni i bekabekaga,
vige nahuni rako ngavê na ruruguha.
I pe araria na enoni vurivuri
vige marungira na maneraha.
11Na enoni i nahuni takoha
ki asa vige bagamangamangariaga
ma ki ageagesia hete vi bonotenia na ani
i erasia renia ta na marâ.
12Na mangariaganiha iana na maneraha
ki manga na ngurunguruha iana na laione,
ma na korohana ki manga na kârupu igê na go.
13Na kare i bekabekaga
ki hagamamasiaga apena o vaemana.
Na gete i ama ni varovaro me nga
ngaia ki era manga na rangi
igê na gerina na ruma i ahari
ma ki rangisia o vaniana.
14Na enamu karu haganahunigo
renigi na ruma ma na ruruguha iaterua.
Ma na gete ni takoha
ngaia ka na mahatanga iana na Araha tangago.
15Na ani i babaga ki gâga ritova tare.
Ngaia ki tâ ma ki mauru ma ki page magê.
16Na ani i marupegi na ramata iana God
ngaia ki page mauri arihu.
Ma na ani i pe botage renigi
ngaia ki page meme rêrê.
17Na hetamaniha tangara na enoni ga matareha
ki manga na hagaba tanga na Araha
ma ngaia ki page vatego na memu renia.
18Go hagaitangira na karemu,
matena ga sisite ma ka pe maravo mêngara.
Siana ko nahunahu meme renira.
19Na enoni i bagamangamangariaga,
ngaia ki nungia marena na hagaitangiha.
Hagaitangia nga, hanana siana ki page era ngavê.
20Manga go aganarigi na hagaotonga koro
ma na hagesuringa koro tangago,
hoi, i ta na matena igo ko page tako mataha.
21Na enoni ka obania viga katogi na ani mavê na marâ.
Nga noga ma na obaniha iana na Araha ki akê me.
22Na enoni i maongo, ki arari vi maki renia.
Na enoni matareha ki koro
teharia na ani ni hagaparunga.
23Manga go hagahigasia na Araha,
igo ko page mauri arihu,
ki togotogo na aitangihamu ma ko asitatara.
24Na enoni babaga ki tavoa na ngêra igê na apira
ma ki bara tanga vige taua akê i harana ke ngêa.
25I arari viga hagaitangia na ani i kasia akê marena,
hanana i gasi na maana.
Manga go ramonia na enoni ni takoha,
ngaia ki aganaria na ramoniha iamu
suria i girara vi i tamania na ogaha iana.
26Na kare i hagamamasiaga apena o vaemana
ma ki pisua marena renia kenana,
ngaia ki hagamakirerua na enana
ma ngaia marena ki araria vi i maki ngavê.
27Kakare, manga go usi vigu râ surigi na hagaotonga
siana ko rongorongo ma nikâ.
28Manga na enoni era igê na tamasinga
ma ki rapasia na ani i metamasi,
ngaia ki pe magu vige tohetohe vero,
suria na eraha ki mamaki i harana.
29Na hagaitangiha ki bani nanê tanga na ani
i bekabekaga ma ki kasia akê marena.
Na mata ki bani nanê tanga na gerina.
Currently Selected:
NA MARAMARÊRAVA 19: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
