NA MARAMARÊRAVA 1
1
Na maramarêrava tanga na ogaha koro
1Igê ka na maramarêrava iana na maneraha o Solomone karena o Tavite. 2Ngaigi ka girara, ga vatego renigi na takoha mataha tanga na ogaha koro ma na hagaotonga koro, ma ka tamanigo ko girara erasigi ngavê na marâ. 3Ngaigi ka girara ga hagaotogo igê na ogaha bâkoro, igê na monariha, igê na otoha ma na koroha. 4Ngaigi ka girara ka katoa na enoni i bonoani, ki takotako mataha, ma ki katoa na enoni haoru, ki hagakitagi na giraraha. 5Na maramarêrava ngegê ka girara ga hagarahagi na giraraha iata na enoni ga tako mataha ma ka girara ga hagaotora na ani ga hagesuri. 6Vikana ngaira ka girara ga aitangisigi na girarani ga pinihi igê na maramarêrava, na tamasinga maramaraveta iata na enoni ga tako mataha, ma na hagahi iata.
7Manga go obania, vigo nahunigi na takoha mataha, hoi, i tuguhigo, vigo hagahigasia na Araha. Na enoni i pe hagahigasia na Araha, ngaia ki kikitenigi na takoha mataha tanga na ogaha koro ma na hagaotonga. Tahema ngaia ki bonobonoga.
Na hagaotonga tangara na enoni haoru
8Kakare, gu tê viteaterua o vaemamu ma kenamu.
Siana ko ngaritenigi na hagaotonga iaterua.
9Na tê vitana iaterua ki hagabâkorogo
manga na tarepuri bâkoro i bêmu,
se na mamahe i riomu.
10Kakare, manga na enoni ga bagatauhata
ma ka unigo vigo arâ henira,
siana hagatege.
11Manga ngaira ma ka vi tangago, ka vivi:
“Nika, ge râ ke nahuia ke me na enoni.
Ge gamorahia ke nahu hagabamata renia.
Ke koro na apeka!
12Gu râ me! Ngaia ki bara vige tahi.
E, ma na matena ga tarahua,
ngaia ki bebeve ma ki ageagesia na ogaha iana.
Matena ga hagamesia hato,
e, na anoano ki guru me!
13E, ga page rurugugi na ruruguha iana.
E, ma ka hagavunusigi na ruma iaka renigi! 14Râ me vego! Igia ka tonganigi!”
15Kakare, siana ko hakurira.
Go hinaru!
16Ngaira ka pe kakaviaga vige bagatauhata.
Ngaira ka pe magutenia na nahunga ni nuni.
17Na manu ki bara vige banu igê na basu
manga vi bâsigo go gasia tanga.
18Ma ngaira ka naka na basu
ma ka hagarateta mareta hete
ma ka me igê.
19Tarema na nahunga ni nuni
ki apariri bê aporo tangara na manero.
Na tarana ngekê ki tarahua
na ani mavê na enoni i gâga sutaga.
Na takoha mataha ki tamasi
20Rongo! Na takoha mataha ki tamasi raha
igê na tara ma na mahera i hinua.
21Ngaia ki ngere raha igê na maanipara ni hinua
ma igê na tavani hakuta.
22Ngaia ki vi: “Enoni mu beka!
Mu beka taraha?
Na bonobonoganiha ki hagamugamu taraha?
Mu tavoheriga taraha na giraraha monari?
I keta mu kahu girara?
23Mu karingê, matena gê ramonigamu.
Inê be hagaotogamu
ma be hagatarêngenia na giraraha iaku tangagamu.
24Inê kê unigamu makira!
Inê kê karuhigamu makira!
25Na ara ni hagaotonga iaku tangagamu
ka sisiri i muri bêmi.
Na hagararinga iaku tangagamu
igamu kamu usitenia ngavê.
26Tahema, matena ga tarahugamu na bagabevoani,
hoi, inê kê rurusigamu nogaku.
Inê kê megamumarabe nogaku.
27Matena ga nahuigamu na anumanumaha
manga na roga raha se na maguara,
matena na maguha ki hagabubununugamu
ma ka gisigisi na bunaniami,
28vikana igamu kamu page avarasiê,
inê na takoha mataha,
ma inê ki asa ngavê vi ve aganarigamu.
Igamu kamu page gari makira reniê,
29suria igamu kamu usitenigi tare na giraraha iaku
ma kamu haritohea tare na Araha.
30Igamu kamu ngaritenigi tare
na hagaotonga ma na hagararinga iaku.
31Hoi, na agua mu garia ngekana!
Mu hatamigamu?
32Na guguruganiha iata na ani ga bonoani
ki bêngenira tanga na mera,
suria ngaira ka usitenia na takoha mataha.
Na enoni ga bekabekaga,
na bekaniha iata ki hagamesira.
33Ma na enoni ki têtê viteaku,
ngaia ki gâga suri parongana.
Ngaia ki gâga asitatara
tenigi na maguha ma na anumanumaha.”
Currently Selected:
NA MARAMARÊRAVA 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
