NA MARAMARÊRAVA 18
18
1Na enoni i masesi
ki arâ surigi so ma na tauhana marena.
Ngaia ki asa vige aganaria na hagaotonga koro.
2Na enoni i bekabekaga ki pe botage
vi ngaia ki nahunia na aitangisiha se mareha.
Ngaia ki atani tamasi purupuru mavê.
3Na tasi ma na makiha karu tâ haku.
Manga go bagatauhamu, igo ko hagamakigo maremu.
4Na tamasinga iana na enoni i tako mataha
ka mangagi na rutuni i asi,
se mangagi na ve oto marava ga gogogo.
5I pe oto vige panepane henira na enoni ga aharê
se vige pe vatera na enoni ga pe aharê
renigi na marâ ga oto tangara.
6Na tamasinga iana na enoni i bekabekaga
ka hagavoregi ma na hekorekoreani.
Ngaia ki nungia marena na hagaitangiha.
7Matena na enoni bekabekaga i tamasi,
ngaia ki hagaerasia marena.
Ngaia ki tu igê na tamasinga iana marena.
8Na hakuniana na enoni
ki mamaki manga na pirui i harata na enoni.
Ngaira ka obania bâraha.
9Na enoni i babaga, ngaia ki era
manga na enoni i oga sutaga.
10Na Araha ki manga na bebetehe nganganihaga.
Na enoni koro ka girara ga rukuruku igê.
11Na enoni ruruguha ka takusia
vi na ruruguha iata ki anumasira
mangagi na para raha ma ngangahaga
ga anumasia na hinua raha.
12Na enoni ki asa vige hagahigasigo
manga vigo pe haritagi.
Na enoni i paroparo ki page vota.
13Manga go arami, matena go pe rongo,
igo ko bekabekaga ma na enoni ka rurusigo.
14Manga go tako gatagata vigo mauri,
igo ko page teharia na maeha.
Ma ki manga i mareha, ma na ta nikâ?
15Na enoni ni takoha ki nahuni aitangisiha
suria i magêsigi tare na giraraha.
16Na votovoto ki tangahia na maani ruma
tanga go arâ i pasina na enoni raha.
17Na enoni i tamasi hagenago igê na tamasinga
ki bâ manga vi ngaia ki vi monari.
Ma na matena go hagatea bê me
igo ki asa vigu kahu tako togo renia.
18Manga vi na vererua na enoni raha
ma karu hetuguri igê na tamasinga,
i ta na matena ka girara ga hatongia na hetuguriha
renia na ngaraniha ni hê ni girarasiha.
19Manga go tamania na goamu
ngaia ki page anumasigo
manga na para nganganihaga ni hinua.
Ma ki manga go mehekorekore,
ngaia ki purusigo hura.
20Igo ko ngaugi na guani na tamasinga iamu maremu.
Na tamasinga iamu ka hagarateterua tangago
na haraniha ma na eraha.
21Na tamasinga iamu ka girara
ga hagatahigo se ga hagamesigo.
Henaka ma ngaigi ka na tarihamu igo maremu.
22Manga go nahunia na gete koro,
igo ko nahunia na vagevageha
ma na Araha ki korokoro tangago.
23Na enoni matareha ki tamasi haritagi tare
ma na enoni ruruguha ki girara i arami bêrahaga.
24Na enoni i manatangenira rako na enoni,
ngaia ki page baguru.
Ma na enoni i manatangenigo monari,
ngaia ki koro teharia na goamu go mevora.
Currently Selected:
NA MARAMARÊRAVA 18: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
