NA MARAMARÊRAVA 17
17
1Na bani ngêra hagarari henia na marapeha
ki teharia na magotoha henigi na hekorekoreani.
2O vaema ni kare ki urusia o karena i ata ni tanu ma
renia na kare vurivuri iana i nahuni takoha
ma ki page tonganira ngaia ma o karena getera
renigi na nahuninga iana, matena i sugi meme.
3Na gi ki hagamatarotarogi na golo ma na siliva.
Ma na Araha ki hagamatarotarogi na aitangihata na enoni.
4Na enoni era ka vagevagesigi
na tamasinga ga erasira na enoni,
ma na enoni ni hagaparunga ka vagevagesigi
na tamasinga ga hagatoraira na enoni.
5Manga go meramarabe na enoni matareha,
igo ko guharia God i hagavorara.
Na hagaitangiha ki page tarahua na enoni
i manavatenia ta na enoni.
6Na tarepuri iata na enoni ga gemêa ka na esita,
suria ngaira ka ageagesira
mangara na kare ga ageagesira na enata.
7Na enoni koro ki asa vige hagahagaparu
ma na enoni era ki asa vige tamasi oto.
8Tani na enoni ka takusia vi na vatevate
ki manga na ria, i katora ka akê me maninga tare.
9Manga na enoni ma ka obania
viga ama ni hemanatanga nga,
ki tuguhira viga bonotenigiheri na eraha i berarogata.
Manga i mareha, ngaira ka hevoavoa so mareta.
10Na ramoniha gi tage togo ki girara
i hagaotoa na enoni ni takoha,
ma tanga na ani i bekabekaga, ki asa,
henaka vi na ramoniha tangarê gi tage.
11Na enoni era ga gâga sutaga tare
ki asa vige tahi tenia na mera.
12Manga go mehetarahu na enoni bekabekaga
i arumasigi na tarani ga râ bekabekaga,
ngaia ki era matena go mehetarahu
na o vasiga ga torera vê na karena tenia.
13Manga go barua na koroha renia na eraha,
na eraha ki asa vige hato tenia na ruma iamu.
14Na haganegahana na hetuguriha,
ki manga na pepeha ni ve i haganega ki huhuhu.
Go rêrapusia rêrê, i era ma ki anuigo.
15Manga igê na tamasinga ma ka hagaitangia
na ani i pe erasia rârâ ta na marâ
ma ka naka vê na ani tuguia na tamasinga,
na tarana ngekana na Araha ki kitenia ngavê.
16Manga go vatea na enoni i bekabekaga na haga,
hanana i vuria renia na hagesuri iana,
igo ko kasi haga purua ma,
suria ngaia ki pe vuria na takoha mataha renia.
17Na enoni ga hemanatange maninga
ngaira ka hetakuiheri tare.
Igo ko tangara na goamu, hanana ga tamanigo
igê na mateni na bagabevoani.
18Nga noga ma na enoni i bekabekaga kani surusuru,
vi barua na hagaba iana na enoni getea.
19Na enoni i tangasigi tare na hekorekoreani,
ngaia ki tangasia nikâ vi bagatauhana.
Manga go parêrahaga tare,
igo ko hagaratemu renigi na bagabevoani.
20Na enoni i hagamamasiagara na enoni getera,
ngaia ki asa iana vige obakoro.
Na enoni i hagahagaparu
ngaia ki hagaratena marena.
21Na enoni i apara na kare i bekabekaga,
ngaia ki mamasiaga renia ma ki asa vige vagevagesia.
22Na obahakoro ki katogo ko apekoro.
Manga go obaera tare, na mera ki hagamêgugo.
23Manga na enoni ga hagakoti ka era
ma ka taugi pinihi na vatevate,
na suriha ki asa vige oto.
24Na enoni i nahuni takoha
ki hagakitagi na katoha iana
ma na ani i bekabekaga ki atani ataka mavê.
25Na kare i bekabekaga ki hagabono obaterua na enana
ma ki katorerua karu hataera.
26Na enoni ga hagakoti ki pe oto tangara
vige katoa na enoni i pe erasia rârâ ta na marâ
ke tavotavo haga, se vige hagaitangia.
27Na enoni ni aitangisiha ki asa vige manitavaragi.
Na enoni i ototo suria marena,
ngaia ki hagabângenia na aitangisiha iana.
28Manga na enoni i bekabekaga
ma ki pe bagatatamasi ma ki muni so ma,
vari go takusia ma vi ngaia ki pe beka
ma ki na enoni ni takoha hete.
Currently Selected:
NA MARAMARÊRAVA 17: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
