NA MARAMARÊRAVA 16
16
1Igia na enoni ka nahunigi rako na hagatenga
ma God ki nahunigi na aramiha tange.
2Igo ko takusia vari vi na parongamu ki oto
ma na Araha ki hagakitakita hete na aitangihamu.
3Gu hagêguria na Araha renigi na takoha iamu,
hanana go tavoraha bâkoro igê.
4Ki tuguhira na marâ hato ga oga
ga tabegi na marâ na Araha i hagavorara tange.
Na marâ na enoni era ga tabea,
ngaia ka na hagaitangiha.
5Na Araha ki kitenira na enoni ga paroparo.
Ngaira ki asa iata vige tahi
tenia na hagaitangiha i naka tangara.
6Go takuia na Araha ma ko tototo suria
ma God ki page bonotenigi na tasi iamu.
Go hagahigasia na Araha
ma ko tahitahi tenia na eraha.
7Manga go hagakoro obana na Araha,
ngaia ki katora na merongamu ka takuigo nikâ.
8Manga go matareha ma ki ototo na parongamu,
igo ko teharia na ani i ruruguha ma ki erataga.
9Igo ko garigari tara
ma God hete kani bêngenigo.
10Na maneraha ki tamasi urusia God.
Na suriha iana ka ototo tare.
11Na Araha ki obanigi na morani na hagarariani
na higata ni hagavuringa ma ni vuriha.
Siana ko hagahagaparu.
12Na maneraha ka kitenigi na tarani i pe oto,
suria na otoha ki hagagatagatania na arahanga iata.
13Na maneraha ki obanigi na monariha
ma ki korokoro tangara na ani ga tamasigi.
14Manga na maneraha ma ki mangariaga,
vari ngaia ki hagamesia na ani i hagamangaria.
Tahema na enoni i nahuni takoha ki uhungia
vi hagarigu parongana na maneraha.
15Na maneraha i mamanamui
ngaia ki manga na rangi ni hagahisi
i hagavorea na mêriha.
16Na takoha mataha ma na aitangisiha
karu teharigi ngavê na golo ma na siliva.
17Na enoni koro ka pe râ suria na tara
i râ tanga na eraha.
Hoi, go bâbâ taramu, i era ma ko me.
18Na paroparoha ki hagavoregi na bagabevoani
ma na heruruhiana ki hagavotarigo.
19Manga go matareha henira na ani ga mamasiaga,
igo ko teharira na ani ga ruruguha
ma ka hagamamasiagara na enoni ga matareha.
20Manga go agaranigi na hagesuringa tangago,
igo ko page akê me bâkoro.
Go hagêguritogo renia na Araha
ma ko page obakoro.
21Go kasia akê na enoni i tako mataha
renia na aitangisiha iana.
Na tamasinga ga arâ haritagi
ka katora na enoni ka aganarigi.
22Na aitangisiha ki manga na ve banga ni mêriha
tanga na enoni ni takoha mataha.
Na enoni i bekabekaga ki hagaratena marena
renia na bekabekaniha iana.
23Tenia na aitangihana na enoni i tako mataha
ka huhura me igê na tamasinga
ga katora na enoni ka aganarigi.
24Na tamasinga ga arâ haritagi
ka manga na pirui i mamaki i haramu
ma ka koro tanga na apekoroha iamu.
25Na tara go takusia vi i koro,
vari ngaia ki bêngenigo tanga na mera.
26Na magêha ki katoa na enoni ki tagara ramo,
suria i obania vi uhuhu na magêha iana.
27Na eragani nuni ki gâga sutaga.
Na tamasinga iana ka manga na gi i ngaugo.
28Na enoni era ka bagatabotabohara,
suria ngaira ka hagatoraira na ani ga hemanatange
ka kahu hemeronge.
29Na eragani nuni ki hagabekasia
na ani i manatangenia
ma ki bêngenia tanga na tarani ga era.
30Na ani ga rengasima ma ka ususu hara,
ki kakaga na aitangihana ma ki bagatauhana.
31Na mena na ogaha koro ki na mêriha arihu.
Na gohogohoraga ki na tarepuri bâkoro.
32Manga igo ka na enoni haritagi
igo ko koro teharia na mane ni me ramo.
Manga go ototo surigo maremu,
igo ko teharia na ani i marungigi na hinua rako.
33Na enoni ka ngarangaranigi na hê
ma na Araha ma kani girara na aramiha.
Currently Selected:
NA MARAMARÊRAVA 16: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
