NA MARAMARÊRAVA 15
15
1Na haritagiana na aramiha ki bana na mangariaganiha
ma na tamasinga ramo ki surea akê.
2Na tamasinga iana na enoni ni takoha mataha
ka hagabângenia na aitangisiha.
Ma na enoni bekabekaga ka pusurenigi ma na bekabekaniha.
3Na Araha ki bâsigi na ara ni marâ hato,
henaka vi i he.
Ngaia ki hahutugira na enoni,
na ani koro ma na ani era.
4Na tamasinga haritagi ka manga na apinige ni mêriha
ma na tamasinga i mamasiaga ki katogo ko rumakaka ngavê.
5Manga go usitenigi na hagaotonga iana o vaemamu tangago,
igo ko beka.
Ma ki manga go aganaria, igo ko nahuni takoha.
6Na ruruguha ka aharêsia tare na ruma iana na enoni koro
ma na enoni era ka anumanuma renigi
ma ka tê tara renigi.
7Na enoni ni takoha ka tokorenia na aitangisiha
ma na enoni bekabekaga ka mareha.
8Na Araha ki vagevagesigi na nunginungiha iata na enoni koro,
ma ki kitenigi na vogasiha iata na enoni era.
9Na Araha ki kitenigi na bagatauhata na enoni era
ma ki takuira hete na enoni ga paronga oto.
10Manga go bagatauhamu,
na hagaitangiha raha ki page tarahugo.
Manga go kikitenigi na hagaotonga tangago,
igo ko page meme.
11Na Araha ki aitangisigi na ara ni marâ hato
igê na agua iata na enoni ga bani me.
Ma ki manga i he na enoni ki girara
i pinihigi na takoha iana tenia God?
12Na enoni i kasia akê marena
ngaia ki usisitenigi na hagaotonga tanga.
Ngaia ki asa vige garigari giraraha
tenira na ani ga tako mataha.
13Manga go obakoro, igo ko mamanamui.
Ma ki manga i rugurugu na obamu,
igo ki arikuku na maamu.
14Na enoni ni takoha ki garigari na aitangisiha.
Ma na enoni i bekabekaga
ki togotogo na aitangihana renia na hiteniha iana.
15Tanga na enoni i matareha
na ara ni tangiani ka na tangiani ni mamasiaganiha.
Ma na enoni ga obakoro ka vagevagesigi
na ara ni tangiani igê na ogaha iata.
16Manga go matareha ma ko hagahigasia na Araha,
igo ko teharia na enoni i ruruguha ma ki anumanuma.
17Na apira ni ruve henia na hetakuiha
ki teharia na puruka binibinikaga henia na kiteniha.
18Na bagamangamangariaganiha
ki hagavoregi na hetuguriha
ma na haritagiana ki hagavorea na marapeha.
19Na tara iana na enoni i babaga ki tonetonega
ma na tara iana na enoni koro ki mave matarotaro.
20Na kare i takotako ki hagakoro obaterua na enana
ma na ani i bekabekaga ki ruhirerua.
21Na bekabekaniha ki hagamura na enoni ga bekabekaga
ma na enoni ni takoha ka barigigi na tarani ga oto.
22Manga go garigari giraraha bâraha
na katoha iamu ka page tavoraha bâkoro.
Manga i mareha, igo ki asa vigu akê me.
23Manga go nahunia na aramiha
igê na matena i arari tangago,
igo ko vagevage.
Na tarana ngekana ki hagakoro obamu ngavê.
24Na enoni ni takoha mataha
ki arâ suria na tara ni mêriha i akê,
mareha vi na tara i vatovato
tanga na agua iata na enoni ga bani me.
25Na Araha ki ruhuruhugi na ruma iata na enoni ga paroparo
ma ki anumasigi na pereperegani na mako iata na gete na nâ.
26Na Araha ki kitenigi na harikatoha iata na enoni era
ma ki obakoro renigi na tamasinga ni hetakuiha.
27Na enoni i ravarava haga
ngaia ki hagaratena na ruma iana marena.
Siana ko aganarigi na vatevate,
i era ma ko me bumu.
28Na enoni koro ka arami takotako
ma na enoni era ka arami purupuru
ma vikana ka akê me na tarani ga pe koro.
29Na Araha ki aganarigi na nunginungiha iata na enoni koro
ma ki pe karingara rârâ na enoni era.
30Na mamanamuiha ki hagakoro obamu
ma na taroha koro ki hagagatagatanigo.
31Na enoni i aganarigi na hagaotonga tanga
ngaia ki nahuni takoha mataha.
32Manga i usi vige karingagi
ngaia ki hagaratena marena.
Ma ki manga i aganarigi
na aitangisiha iana ki akê me bâkoro.
33Na hagahigasiana na Araha
ki bêngenigo tanga na aitangisiha,
manga igo ma ko kasigo so maremu.
Currently Selected:
NA MARAMARÊRAVA 15: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
