NA MARAMARÊRAVA 14
14
1Na gete ni takoha ki katoa na ruma
ki hagagara koro ni ogaha
ma na gete bekabekaga ki hagaerasia.
2Manga na ogaha iamu ma ki koro i maana God
igo ko hagabângenia vi igo ko hagahigasia na Araha.
Manga i mareha, ki mareha.
3Na enoni bekabekaga i paroparo
ki hagaratena marena suria i manitavaragi.
Na tamasinga iana na enoni ni takoha
ki manga na bêata iana.
4Manga go pe nahunira na puruka ni tagaraha i mu
na ruma ni ngêra iamu ki baguru.
Ma ki manga go nahunira
ngaia ki vunuvunu mamasuaga.
5Na enoni ni monariha
ki tamasigi na monariha igê na kotiha
ma na enoni ni hagaparunga ki hagaparu ma.
6Na enoni i bâ bêso renira na ani getera
ki asa iana vige vora re na enoni ni takoha mataha,
ma ki mataku ma hete tanga na ani i nahuni takoha.
7Siana ko hakunira na enoni ga bekabekaga,
suria ngaira ka hite vige hagesurigo.
8Na enoni ni takoha ki girara
i arâ suria na otona na tara.
Ma na bekabekaniha ki katoa na ani i bekabekaga
ki hagatasia na tara.
9Na enoni bekabekaga ka tako hagamamahasigi na tasi
ma na enoni koro ka obanigi na hagaotonga.
10Na vagevageha ma na obaruguha igê na aitangihamu
igo getego ma ko aitangisigi maninga.
Mareha rârâ vi ta na enoni râ nikâ.
11Na ruma iana na enoni era ki page aruhuruhu
ma na anina na enoni koro ki page tavoraha bâkoro.
12Na tara go takusia vi i koro,
vari ngaia ki bêngenigo tanga na mera.
13I pe asa na enoni i mamana, vige rugu na obana.
Matena i hatohato na vagevageha
na obaruguha ma ki gâga so.
14Na enoni era ka page nahunigi
na meta ga ararigi na bagatauhata,
ma na enoni koro ka page nahunigi
na meta renigi na tauhata koro.
15Na enoni bekabekaga ki tongesurigi na ani mavê na marâ
ma na enoni ni takoha ki hagakitagi hagenago.
16Na enoni ni takoha ki mamakuku tenigi na eraha
ma na ani ga bekabekaga ka pe hagakitagi hagenago
ma ka tatahigi hete na marâ.
17Na enoni ga bagamangamangariaga
ngaira ka katogi na tarani ga bekabekaga,
ma na anoni ni takoha ka gâga haritagi ma.
18Na enoni ga pe nahuni takoha
ka nahunigi na meni ararigi na bekabekaniha iata,
ma na ani ga nahuni takoha
ka page nahunigi na giraraha.
19Na enoni era ka page tubêso tangara na enoni koro
ma ka page avarasira.
20Na enoni ka ruhia na enoni matareha
henaka vi ngaira nikâ ka na tamana.
Ma na enoni ruruguha na enoni rako ka girara.
21Manga go obania vigo obakoro,
hoi, go korokoro tangara na enoni matareha.
Manga go ruhia ta na enoni, igo ko tasi.
22Manga go uhungia vigo katogi na tarani ga oto
na enoni ka hagahigasigo ma ka hagêguritogo renigo.
Ma ki manga go gâga sutaga, igo ko aharê.
23Gu tagara, hanana go nahunigi
na marâ go mauri re.
Manga go oga ma ko tamasi
igo ko page matareha.
24Na aitangisiha raha ki na tarepuri
tangara na enoni ni takoha mataha,
ma na enoni ga pe nahuni takoha
ka hagabângenia na bekabekaniha iata.
25Na enoni i tamasi igê na monariha igê na kotiha
ngaia ki hagatahia na mêrihana na enoni getea,
ma na ani i hagaparu, ki hagarateta na ani getera.
26Na hagahigasiana na Araha
ki manga na ve banga ni mêriha
ma ki katoa na ruma iana ki gâga purupurunguniaga.
27Na hagahigasiana na Araha
ki manga na ve banga ni mêriha
ma ki hagatahigo tenia na basu ni mera.
28Na raramohana na maneraha ki raharaha
manga na enoni i marungira ka rakorako ngavê.
Manga i mareha, ngaia ki hatohato.
29Manga go haritagi, igo ko hagabângenia
vi igo ko nahuni takoha mataha.
Ma ki manga go bagamangamangariaga
igo ko hagabângenia, vi igo ko bekabekaga.
30I togotogo na obamu, igo ko apekoro.
Ma na hengariha ki manga na maeha raha i apemu.
31Manga go hagamamasiagara na enoni matareha,
igo ko pe hagahigasia God i hagavorara.
Manga go korokoro tangara, igo ko hagahigasia God.
32Na enoni era ka hagaerasira mareta renigi na bagatauhata.
Na enoni koro ka tahi renigi na parongata koro,
naka ma i arâ me na mera.
33Na takoha mataha ka oga igê na aitangihana na enoni ni takoha
ma ki mareha igê na aitangihana na enoni i bekabekaga.
34Na otoha ki kasia akê na haku na enoni
ma na tasi ki hagamakia.
35Na maneraha ki vagevagesira na gavumane iana,
manga ga giraragi maninga na tagaraha iata.
Ma ngaia ki hagaitangira na ani ga hagêrahu.
Currently Selected:
NA MARAMARÊRAVA 14: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
