NA MARAMARÊRAVA 13
13
1Na kare i nahuni takoha
ki aganarigi na hagaotonga iana o vaemana.
Ma na ani i bâ bêso renira na enoni
ki asa ge vi, vi ngaia ki tasi.
2Na enoni koro ki mauri renigi na takoha mataha
ma na enoni era ka magêsigi ma na ogasutaganiha.
3Gu tamasi takotako,
hanana go anumasigo maremu.
Na enoni i bagatamasi ki hagaratena marena.
4Na enoni i babaga ki asa vige nahunia ta na marâ,
henaka vi rapasigi bâraha.
Ma na enoni i tagara ramo
ki page nahunigi na marâ i obanigi.
5Na enoni ni monariha ki kitenigi na hagaparunga
ma na enoni ni hagaparunga
ki hagaerasia ma ki hagamakia so marena.
6Na paronga koro ki bêngenira na enoni koro
suria na tara i oto,
ma na eraha ki hagavotarira na enoni tasi.
7Tani na enoni ka maramara enoni ruruguha
ma ngaira ka baguru hete.
Tani ka maramara enoni matareha
ma ngaira ka ruruguha hete.
8Na enoni i ruruguha ngavê
ki ngahingahi renigi na haga iana
ma na enoni matareha ki mareha.
9Na enoni koro ki manga na laiti i mave bâkoro
ma na enoni era ki manga na laiti
i piripiringi na maana ma ki me.
10Na enoni i takusia,
vi ngaia ki girara teharira na ani getera,
ngaia ki hagareke tangara na enoni.
Ma na enoni i aganaria na hagaotonga ki mareha.
11Na ruruguha ga arâ me purua tangago
ngaigi ki page soso rêrê,
ma na ruruguha go tagara bâraha tangagi
ngaigi ki page akê haharitagi.
12Manga go nanasi baguru, igo ko ape era.
Manga go nanasi togo, igo ko vagevage ngavê.
13Manga go usitenia na hagaotonga koro,
hoi, igo ko page tarahua na bagabevoana.
Ma ki manga go aganaria, hoi, igo ko page asitatara.
14Na hagesuringa iata na enoni ni takoha
ka mangagi na ve banga ni mêriha.
Ngaigi ki tamanigo ko tahitahi tenigi na basu na mera.
15Manga go nahunia na takoha koro
na enoni ka hagahigasigo,
ma na hagaparunga ki asa vige hagatahigo.
16Na enoni ni takoha ki katogi takotako na marâ.
Na enoni i pe nahuni takoha
ki hagabângenia na bekabekaniha iana.
17Na enoni tora tamasinga ga hagahagaparu
ngaira ka hagavoregi ma na eraha,
ma na ani ga tamasi monari
ngaira ka hagavorea na marapeha.
18Na enoni i usitenia na hagaotonga
ngaia ki page matareha ma ki maki
ma na ani i aganarigi na hagaotonga
ka page hagahigasia.
19Manga i togotogo na barigiha iamu,
e, igo ko vagevage ngavê!
Ma na enoni ga bekabekaga
ka vanasigi ma na eraha.
20Manga go hakunira na enoni ni takoha
igo ko page nahuni takoha mataha.
Manga go hakunira na enoni ga bekabekaga,
na tarana ngekana ki page erasigo ngavê.
21Na eraha ki tarigenira tare na ani ga bagatauhata
ma na meta na enoni koro, ngaigi ka na marâ koro.
22Na esina na enoni koro
ka page nahunigi na nahuninga iana.
Na enoni koro ka page nahunigi
na nahuninga iata na enoni tasi.
23Na enoni matareha ki oto tangara
viga tagarahia na mu igê na mako i oga purua
hanana ga mauri re.
Ma ki pe oto vi na avanuna na mako
vi ge manimania tenira.
24Manga go pe hagaitangia na karemu
igo ko pe takuia.
Manga go takuia, hoi, igo ko hagaotoa.
25Na enoni koro ki girara i togotogo na obaniha iana
ma na enoni era ki hagatage tare.
Currently Selected:
NA MARAMARÊRAVA 13: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
