MIKA 5
5
1Ai ni Jerusaleme,
mu nanêa na hearihatana!
Na merongaka ka rihigia.
Ngaira ka taharia noga na maneraha,
i bêngenira na Isiraelita.
God ki surua na morana na maneraha
2Na Araha ki vi:
“Igo Beteleme i Eparata,
naka ma igo na kere hinua sisite ma i Juta,
ma i pasimu igo ki page vora me na maneraha,
i page marungia i Isiraele,
ma ki page tototo suriê maninga.
Ma na raraha iana ki bani haganega me
i nago kere vê noga.”
3Vikê na Araha ki page asa,
vige botage renira na kariana,
mataro me na matena na gete, i obara,
ki page apara igê na karena mane.
Igê na matena ngekana na enoni,
ga bani henahuraura,
ka page aporo me tangara na goata i Isiraele.
4Na maneraha ngekana ki page marungira na kariana,
manga na avanu ni sipi i marupera na sipi iana.
Ngaia ki page kato vikana renia na raramohana na Araha,
ma ki page hagabângenia na arahanga iana na Araha God marena.
Na kariana ka page asitatara,
suria na enoni hato i maveta ka page tê viteana,
5ma ngaia ki page katora, ka gâga igê na ramana.
Na tahinga ma na hagaitangiha
Matena na ai ni Asiria ka taharia na apanena iaka
ma ka hogegi na para ni hinua iaka,
igia ka page atera na mane ni me,
ramo ma arari, hanana ga meraheariha.
6Ngaira ka page meraheariha na ai ni Asiria,
na apanena iana o Nimirote,
ma ka page teharia ma ka page marungia.
Ngaira ka page hagatahigia tenira na ai ni Asiria,
matena ga taharia na apanena iaka.
7Na Isiraelita, na ani ga bani henahuraura
ma ka tahitahi mêngara,
ngaira ka mangagi na kârupu iana na Araha
tangara na enoni ngegana,
manga na rangi ni hasihasi.
Ngaira ka page hagêguria God,
mareha vi na enoni.
8Na Isiraelita ngegana ka page manga na laione,
i gagari i bemu se igê na pariki ni sipi.
Ngaia ki gamorahira na sipi,
ki rikihira, ki ranguira ma ki ohera,
ma ka pe raroni ni tahinga.
9Igê na tarana ngekê na Isiraelita ka page taharira
ma ka page erasira ngavê na merongata.
10Na Araha ki vi:
“Igê na matena ngekana inê be erasira ngavê
na hosi ni me iami
ma nikâ na kati ni hearihatana iami.
11Inê be hogegi na para ni hinua iami
ma be ruhuruhugi na hinua raha iami.
12Inê be hagamesira na mane mangata ma ka haritavo
henira na enoni ni hinarunga.
13Inê be menamenarigi na nunuta na ataro iami
ma na bea ni vogasiha iami.
Ma ki asa, vigamu page vogasigi nikâ
na marâ mu tahegi maremi.
14Inê be tahuru barugigi na nununa na ataro ka Asera.
15Igê na mangariaganiha raha iaku
inê be hagaitangira na enoni hato i maveta,
ga pe tê viteaku.”
Currently Selected:
MIKA 5: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
