MIKA 6
6
Na Araha ki ranganira na Isiraelita
1Mu karinga na Araha, i ranganira na Isiraelita.
Araha, gu tamasi igê na apanena iamu.
Igamu na barani ma na hungani,
mu rongoa na tamasinga iana.
2Igamu na barani ma na gatani nganganihaga na maveta,
mu karinga na Araha, i tamasi igê na apanena iana.
Na Araha ki ranganira na kariana.
Ngaia ki tamasi igê na apanena iana renira na Isiraelita.
3Na Araha ki tamasi, ki vi:
“Kariaku, inê kê katogamu bera vari?
Inê kê hagamamasiaga apemi vari?
Mu aramiê!
4Inê kê toregamu hura tenia i Esipito.
Inê kê hagatahigamu tenigi na mamasiaganiha i Esipito.
Inê kê hagatorara o Moise mo Aroni ma ka Miriama,
ka bêngenigamu.
5Kariaku, mu takusia na maneraha o Balaka i Moaba.
Ngaia ki obania vi erasigamu.
Ma na poropete o Balama, karena o Beore, ki vi tanga,
vi inê kê takusigi ma na marâ koro tangagamu.
Mu takusia matena mu tarêhia na ve i Jotano,
matena mu tavoraha tenia i Sitimi tanga i Gilegale.
Mu takusigi na tarani ngegana, ma kamu girara,
vi inê kê katogamu bâkoro tare.”
Na obaniha iana na Araha
6Na ta kê page vogasia renia na Araha God, i raha teha,
matena gê rahesia?
Inê kê susu tanga renira na bêhâgata na puruka vari?
7Manga vi inê ma be vogasia
renira na rehagaro ma na rehagaro na sipi iana,
se renia na oile ni olive, i gogogo manga na ve raha,
na Araha ki vagevagesigi vari?
I arariê ma vari, vi inê be vogasia God
renia na bêbê ni kare iaku,
hanana vige bonotenigi na tasi iaku?
8Mareha! Na Araha ki bani hagagiraragia
renigi na tarani ga ararigia, viga tanugi.
Na tarani, na Araha ki bonasigia renigi, ka manga igê:
Ga gâga igê na otoha.
Ka nganganihaga igê na hetakuiha.
Ka toto suria haritagi God,
ma ka obâbahaku henia.
Na Araha ki page hagaitangira na kariana
9Na enoni, i takotako maninga,
ngaia ki hagahigasia na Araha.
Na Araha ki tamasi, ki vi:
Igamu na ai ni Jerusaleme,
ma na ani mu arâ tare i ngekana manga bani hanana,
mu karinga!
10I ruma iata na enoni erataga
ka pe oga vari igê na nahuninga, ga toregi,
matena ga hagabekasira na enoni?
Ngaira ka ravarava haga igê na higahigata.
Na tarana ngekê inê kê kitenia ngavê.
11Manga i he kê girara gê bonotenigi
na tasi iata na enoni,
ga ravarava haga igê na higahigani na marâ?
12Igamu na enoni ruruguha,
igamu kamu hagamamasiagara na enoni matareha.
Igamu hato ka na enoni ni hagaparunga!
13Suria mu bani tasi bâraha,
tahema inê kê haganega noga kê hagaitangigamu
ma kê hagaerasigamu ngavê.
14Igamu kamu page ngêngê,
ma ki asa, vigamu ngê masu,
ma kamu ama ni magê ngavê hete.
Igamu kamu page nakanaka na harisi iami,
ma ki asa, vige tâ suri parongani.
Na ara ni marâ hato mu nakanaka,
inê be hagaerasigi igê na hearihatana.
15Igamu kamu page hasihasi na mu,
ma ki asa, vigamu opa maremi.
Igamu kamu page rusigi na oile
tenigi na guani ni olive,
ma ki asa tangagamu maremi.
Igamu kamu page tagarahigi na vaini,
ma ki asa, vigamu tonomogi maremi.
16Na tarani ngegê ka page tarahugamu,
suria mu râ surigi na bagatauhaterua
na maneraha o Omeri mo Agaba, na karena.
Igamu kamu ama ni amaka surigi nga na bagatarihaterua.
Tahema inê be hagasuhigi na hinua iami,
ma na enoni hato ka page kitakitagamu.
Na enoni hato igê na agua getegi ka page ruhigami.”
Currently Selected:
MIKA 6: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
