MIKA 4
4
Na ramana iana na Araha ki manasia na maveta
1Ta na matena i muri vê
na hungana, i oga igê na Ruma ni Rotu,
ki page akê teha ngavê,
ma ki page teharigi na barani hato i maveta.
Rako na enoni tenigi na agua hato i maveta
ka page tihuri tanga.
2Ma ngaira ka page vivi:
“Nika, ge akê i hungana iana na Araha
tanga na Ruma ni Rotu iana God,
na Isiraelita ka rahesia.
Ma ngaia ki page hagesurigia
renigi na obaniha iana tangagia.
Ma igia ka page arâ surigi na hagesuringa iana tangagia,
suria na hagesuringa iana na Araha
ki râ me tenia i Jerusaleme, tenia i Sione,
na agua i tamasi igê tangara na kariana.”
3Na Araha ki page bana na bevoa
i berarogata na enoni hato i maveta,
naka ma na ani hagarangi se na ani hagatê ka raramohaga.
Ngaira ka page retegi na tatapa borahu iata
ma ka katogi re na matemate.
Na maani na ora ni me iata
ngaira ka page tagarahigi renigi na kêke iata.
Na marê ka page hato vige heariha,
ma ki asa, vige page botage,
vige hagarêgi nikâ na hearihatana.
4Na enoni hato i maveta ka page gâga igê na ramana.
Na ara ni enoni ki page nahunigi na mu iana
ma na apinige ni ngauha iana.
Ngaia ki page gâga tatarasi,
ma ki asa, vige page magutenia ta na enoni.
Ngaia kani visia God raramohaga hunia.
5Naka ma na enoni i na agua getegi ka vogasira
ma ka toto surira na harasita mareta,
ma tangagia igia,
igia ka vogasia ma ka toto suria hete
na Araha God iaka, tare ma tarema.
Na Isiraelita ka page aporo tanga i pasita
6Na Araha ki vi:
“I ta na matena inê be hagahakura na enoni,
gê hagaitangira, ma ka mamasiaga igê na agua,
ga henahuraura tange,
ma ka totoko mangara na sipi.
7Ngaira ka page arâ abogobogo hagatê me tanga i pasita.
Ma inê be haganega aporo nikâ
henira na ani ga tahitahi mêngara.
Ma ngaira ka page rakorako ngavê.
Inê be oga igê na hungana i Sione,
ma be marungira,
haganega tenia i ngekana, ki bê ki arâ.”
8I monari, Jerusaleme,
God ki bâsurigo manga na avanu ni sipi,
i oga igê na bebetehe iana,
ma ki bâsurira na sipi iana.
Ma igo ko page vora aporo na hinua raha,
i page gâga igê na maneraha,
i page marungia na marê hagenani manga i nago.
9I hega go gegege, manga na gete i harahara?
Renia ta go mamasiaga, manga na gete i harate kare?
I hega, suria vari vi igo ko pe nahunia na maneraha?
Suria vari vi na kariana na maneraha ka me?
10Igamu na ai ni Jerusaleme, mu hiote,
manga na gete i hiote kare,
suria na merongami ka sugi tarigenigamu hura
tenia i pasimi,
ka henahuraugamu ma ka megamu râ
igê na bagamasusu raha tanga i Babilone.
Ma i ngekana na Araha ki page hagatahigamu igê
tenira na merongami.
11Na merongami tenigi na agua hato getegi
ka bani rihigamu, hanana viga taharigamu.
Ngaira ka vi: “Ge nahuia nga Jerusaleme.
Ke aruhuruhu nga!”
12Ma na merongami ngegana ka pe hagarea
na katoha iana na Araha.
Ngaira ka pe girara,
vi na Araha ki hagahakura me,
hanana vi menamenarira,
manga na enoni i garasi ngêra.
13Na Araha ki vi:
“Ai ni Jerusaleme, mu râ
kamu barubarugira na merongami.
Inê be katogamu, kamu ramo manga na puruka mane
henigi na êgana ma na hona raha,
ga nganganihaga ngavê.
Ma na nahuninga, ga bani henahuraugi,
ki tuguhigamu, mu vogasiê igê.
Inê ki na Araha,
gê nahunia na maveta hagenani.”
Currently Selected:
MIKA 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
