MIKA 3
3
O Mika ki ramonira na maneraha iata na Isiraelita
1Maneraha iata na Isiraelita, mu karinga!
I tuguhigamu, vigamu botage renia na otoha.
2Ma hete, igamu kamu kitenia na koroha
ma kamu tenigi ma na eraha.
Igamu kamu mangara na o vasiga.
Mu ohera hemêri na kariaku,
ma kamu hasihasira tenigi na surita.
3Igamu kamu sibira,
ma kamu barugigi na surita.
Igamu kamu ninira
mangagi na ganiani mu kukira.
Igamu kamu ngêra na kariaku.
4I sugia ma,
ma igamu kamu page avarasia nga na Araha,
ma ngaia ki asa, vige aganarigamu.
Ngaia ki page usitenigi na nunginungi iami,
suria i era ngavê na parongami.
5Poropete ni hagaparunga, mu karinga!
Igamu kamu surua na ramana tangara na enoni,
ga vurigamu ma ka hagangêgamu.
Ma na ani ga pe katogamu vigana
igamu kamu haganunura renia na hearihatana.
6Na Araha ki vi, vigamu kamu hato noga.
Na arito ki susu noga!
Suria igamu kamu hagabekasira na kariana,
ngaia ki asa, vige hagamarutegamu nikâ,
ma igamu ki hato, vigamu page hinahinaru.
7Igamu na ani mu hinahinaru,
igamu kamu page maki,
suria na hinarunga iami ka pe monari.
Igamu kamu page maki ma kamu page munimuni,
suria God ki pe hagamonarigi na hinarunga iami.
8Ma tangê inê, na Araha ki angariê
ma ki hagaramoniê
ma ki hagagirarê renia na otoha,
ma ki hagagatagataniê,
kê ramonira na Isiraelita renigi na tasi iata.
9Igamu na maneraha iata na Isiraelita, mu karinga!
Igamu kamu kitenigi na otoha,
ma kamu urusigi na marâ, ga oto, igê na eraha.
10Igamu kamu tagarahirerua na hinua i Sione me Jerusaleme,
suria mu nahunigi rako na haga ma na ramoha,
renia mu nahu enoni,
ma kamu katogi na tarani, ga pe oto.
11Na maneraha i hinua ka tamanira ma na enoni,
na ani ga vatera na haga.
Na mane ni vogasiha ka ramatenigi na ramata,
suria ma viga vurira.
Na poropete ka tarohenia na tamasinga iana God,
suria ma viga vurira.
Ma ngaira hato ka takusia,
vi God ki tamanira, ka vi,
‘Na hagaitangiha ki bara, vige tarahugia.
Na Araha ki ngahisigia, iê?’
12Renia nga igamu, na maneraha,
i Sione ka page hikirua manga na mu.
Jerusaleme ki page aruhuruhu.
Na hungana, i oga igê na Ruma ni Rotu,
ki page vapuga.
Currently Selected:
MIKA 3: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
