MIKA 2
2
God ki page hagaitangira na enoni ruruguha ga hagamamasiagara na enoni matareha
1I page era ngavê tangara na eragani nuni,
ga pe mauru igê na bungiani,
ma ki vunu i bêta na katoha,
ga hagaerasira re na enoni.
Matena i tangitangi,
manga viga nahunia na teha,
ngaira ka hata ni katogi na katoha iata.
2Manga viga tenigi na mako,
ngaira ka parênigi.
Manga viga tenigi na ruma,
ngaira ka tavogi
tenira na enoni matareha,
i bara tangara, vige baru na hagaba iata.
Ngaira ka girara ga raugi ma
igê na tarani ngegê.
3Bâ, na Araha ki vi tangagamu,
na eragani nuni, ki vi:
“Inê be naka na hagaitangiha raha tangagamu,
ma igamu ki bara, vigamu page gavatenia.
I page era ngavê tangagamu!
Ma ki hato nikâ, vigamu page hagarahasigamu maremi.
4Igê na matena ngekana na enoni ka page tamasigamu
renia na hagaitangiha, i tarahugamu, eragani nuni.
Ma ngaira ka page baro ki renigamu,
suria mu bagahagêguri, kamu vi,
‘Igia ka tê tara renigi na ara ni marâ.
Igia ki hato hagetage iaka!
Na Araha ki paigia hura tenia na mako iaka,
ma ki haganahunira renia na enoni, ga henahuraugia.’”
5Tahema o Mika ki vi:
“Matena na kariana na Araha
ka page tongania aporo igê na mako,
igamu hato kamu page nagia ve,
ma kamu hato nikâ, vigamu vora na kariana.”
6Na enoni ka tamasi bê aporo, ka vi:
“Igami kami pe pasi rongoa na ateateha iamu.
Siana ko ateate vigana tangagami.
God ki asa, vige hagamakigami.
7God ki merongasira vari na Isiraelita?
Na Araha ki bagamangamangariaga vari?
Ngaia ki page katokato nga vigana vari?
Ngaia ki pe meratamasi bâkoro vari
na enoni koro ma oto?”
8Na Araha ki arami i harana o Mika, ki vi:
“Igamu kamu taharira na kariaku,
manga vi igamu ka na merongata.
Tani na mane ka aporo tenia na hearihatana,
ma ka ata vê i pasita,
ma ka vi ngaira, viga tahi.
Ma na ta kamu katogi, igamu?
Igamu kamu ura henanasi mangara na manero,
hanana vigamu hanagogi na tuguni iata,
suria i bara tangara, vige baru tangagamu na hagaba.
9Igamu kamu tarigenira hura na gete na kariaku
tenigi na ruma iata, ga vagevagesigi.
Ma igamu kamu hagabarasira na kareta
tenigi na mahatanga koro iaku,
gê obania, vigê vatera.
10Tari era, kamu râ tenia i pasimi!
Mareha nikâ vigamu oga ikê.
Mu page meme renigi na bagaparongami.
I page era ngavê tangagamu!
11Igamu na eragani nuni,
igamu kamu obania ma na poropete,
na ani i hagahagaparu ma ki hagabekasigamu,
na ani i vi tangagamu, ki vivi,
‘Na vaini ma na tonoha getegi
ka page aharêsigamu.’
12“Igamu na ai ni Isiraele,
na ani mu page tahitahi mêngagamu,
inê be hagahakugamu aporo.
Inê be hagahakugamu manga na avanu ni sipi,
i torera aporo na sipi iana tanga na panisi iata.
Na enoni ka page manasia aporo na apanena iami,
mangara na sipi ga manasia na pariki ni go.”
13Mo Mika ki tamasi noga, ki vi:
“God ki page tamanira, ka gavagava,
ma ki page bêngenira hura tenigi na agua,
ga bani henahuraura tange.
Ngaira ka page hogegi na maani para ni hinua,
ma ka page arâ tatarasi.
Mareha vi na enoni, na Araha nga,
ngaia marena ki page bêngenira hura.”
Currently Selected:
MIKA 2: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
