MIKA 1
1
1Na matena ga heheuri igê o Jotamo mo Agasi mo Hesekia ka maneraha i Juta, na Araha ki hagatora o Mika, ki tora tamasinga iana. Ngaia ki na mane i Moreseti. Na Araha ki hagagirara o Mika renigi na marâ hato ngegê renirerua i Samaria me Jerusaleme.
O Mika ki mesirerua i Samaria me Jerusaleme
2Igamu hato na enoni i maveta, mu karinga!
Mu rongo, igamu hato na marâ mu mauri i maveta!
Na Araha God ki page ranganigamu
tenia igê na agua apuna iana i pasina.
3Bâ, na Araha ki hura me
tenia na agua apuna iana,
ki soso me,
ma ki page pupu tatarê
igê na barani ma na hungani.
4Ma na barani ka page rono igê na ruguhana,
manga na kantele igê na gi,
ma ka tata berabera so igê na maruguni,
manga na pupu igê na bêrugu.
5Na tarani hato ngegê ka page vora me,
suria na Isiraelita ka tasi bâraha,
ma na raraha iana o Jakobo ka pe toto suria God.
Ti ki katora na Isiraelita ka tasi vikana?
Ngaira ka na ai ni hinua raha i Samaria.
Ti ki katora na ai ni Juta, ka vogasira na ataro?
Ngaira ka na ai ni Jerusaleme.
6Tahema na Araha ki vi:
“Inê be katoa i Samaria ke aruhuruhu,
ma ke bê ni roroga.
Inê be gurugi vato na roro ngegê igê na maruguna.
Na sinopane ni hinua ke hihiruga ma ke bagora.
Na vaini ma ki araria, ga hasigi igê.
7Inê be kumukumugi na nunuta reoreoga na ataro,
ma na gi ke ngêgi na votovoto tangara na êrâ,
ga tagara i ruma ni vogasiha ni ataro.
Ma na ara ni marâ hato ni vogasiha
inê be menamenarigi ke vora re na roro.
Na ai ni Samaria ka nahunigi na marâ ngegê,
hanana ga rahesira igê na ataro
tanga na hagatakaniha.
Ma bâ, na merongata ka page toregi vê
na votovoto ngegê tangara na êrâ,
ga tagara i ruma ni vogasiha ni ataro i tagua.”
8Mo Mika ki vi:
“Tahema inê be angi ma be angi maramara.
Inê be râ renigi na êgaku gonari
ma be kâhisi ma, suria i rugu na obaku.
Inê be angi,
manga na o vasiga se na komokukuni.
9Na maara iana Samaria
ki asa, vige page mavo.
Na hagaitangiha ngekana
ki sugi tarahua i Juta nikâ,
ma ki tariha me noga i metara i Jerusaleme
i pasita na kariaku.
10Ai ni Juta,
siana kamu hagarongora na merongaka i Gata
renigi na bagabevoani, ga tarahugia.
Siana kamu angiangi maramara,
i era ma ka rongogamu.
Ai ni Beteapora, mu apuripuri i ano,
suria i rugu obami.
11Ai ni Sapiri,
na merongami ka page henahuraugamu.
Igamu kamu rupaturi ma kamu maki.
Na ai ni Sanani ka magu,
vige hura tenia na hinua iata.
Matena mu rongora na ai ni Betesele,
ga angiangi maramara,
igamu kamu girara,
vi i ngekana ki mareha na agua,
vigamu rukuruku igê.
12Na ai ni Maroti ka naasia bâraha, vige tahitahi,
ma ka bagahagêguri ma,
suria na Araha ki hagamarumungenira na merongata,
ka rihia Jerusaleme.
13Ai ni Lagisi,
mu tagirigi na kati igê na hosi iami,
ma kamu gavagava,
suria mu amaka surigi na tasi iata na Isiraelita,
ma kamu hagatasira na ai ni Jerusaleme.
14Hoita, ai ni Juta, mu angisia Moreseti Gata,
suria i sugi mu tenigamu.
Na maneraha ni Isiraele ki asa,
vige page tarahua na hetamaniha
tenira na me i Agasibi.
15Ai ni Maresa,
na Araha ki page tagarenigamu tangara na merongami,
ka henahuraugamu.
Na maneraha ni Isiraele ka page gava,
ma ka page ahiahi igê na vaba i Atulama.
16Ai ni hinua raha i Jerusaleme,
mu angi maramara renigi na kere hinua rihigamu,
suria ga mangara na karemi hetakui.
Na merongata ka page henahuraura.
Tahema mu gorogoro bê hurigamu, kamu hare.”
Currently Selected:
MIKA 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
