JONA 4
4
O Jona ki mangariaga, suria God ki pe hagaitangira na ai ni Nineve
1O Jona ki pe obakoro renia na tarana ngekê, ma ki mangariaga. 2Vikê ngaia ki nunginungi, ki vi: “Araha, matena gê oga mênga i pasiku, inê kê pe bani girara vari, vi igo ko page katokato vikana? Tahema inê kê uhungia, kê gava tanga i Sipeni. Inê kê bani girara, vi igonga nga na God go takuira na enoni ma ko koro tangara, go haritagi tare, ma na takuiha iamu ki asa, vige page hato, ma ko agana tare, hanana go urusia na katoha iamu ni hagaitangiha. 3Hoi, Araha, manga ngekê, gu hagamesiê. Na ogaha iaku ma ki manga ngêke, be magahuru râ nga!”
4Na Araha ki hagatea, ki vi: “Renia ta go mangariaga? I pe oto ngavê tangago!”
5O Jona ki pania na hinua, ki bêkê, ma ki oga hatara i ano. Ngaia ki tagarahia na kere mamaruku, ki mamarusia, ma ki naasia, vi na tarana ta ke vora ke erasia i Nineve. 6Na Araha ki katoa na apinige, ki akê mamarusia o Jona, hanana i hagakoro apena o Jona, ki koro ngavê na apena renia na apinige. 7Igê na kahuagana na tangiana i muri God ki nakara na mama, ka ngêgi na vagani na apinige, ma ki me. 8Matena i hanetava na arito, God ki hagatorangenia na roga mahana tenia i kerekê. O Jona ki sugi bagamame, suria na arito ki singia na bêna. Vikê ngaia ki tako hagetage, vi meme. Ngaia ki tako marena, ki vi: “Na ogaha iaku ma ki manga ngekê, be magahuru râ nga!”
9Ma God ki hagatea, ki vi: “Renia ta go mangariaga renia na apinige? I pe oto ngavê tangago!” O Jona ki arami, ki vi: “I oto ngavê tangê hete, vigê mangariaga bâraha! Be me hete!”
10Na Araha ki vi tanga, ki vi: “Na apinige ngekana ki akê igê na bungiana gi tage, ma ki me igê na ruata na bungiana. Igo ko pe hasia, ma ko pe bâsuria. Henaka i manga ngekana, ma igo ko takuia! 11I hega, i pe tuguhiê vari, vi ve takuia bâraha ngavê na hinua raha i Nineve? Ma ku bâ, i ngekana ka oga nikâ igê na 120,000 na kare, ga mamêngara, vige girara na ta ki koro ma na ta ki pe koro, ma ki tagenana ma nikâ rako na puruka ma na sipi ma na marâ vigana!”
Currently Selected:
JONA 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
