JOBE 41
41
1Takusia Leviatana na bagahua raha.
I hega, igo ko girara vari go hagarea renia na hinu,
se go baroa na paratena renia na varo?
2I hega, go girara vari
go surua na varo i barisuna
se go garea na paratena renia na hinu?
3I hega, ngaia ki page vi tangago vari,
ki vivi, ‘Hetaki. Gu nakê so!”
4I hega, ngaia ki page vi tangago vari,
ki vivi, ‘Garu heaganari.
Inê kê suru, vigê tagara tare tangago.’
5I hega, go girara vari go mebare
manga na manu manimani iamu?
I hega, go girara vari go baroa,
hanana na gete rakuraku iamu ka mebare?
6I hega, na mane hugohugo ka obania vari
viga vuria tenigo?
I hega, na enoni ni hohoronga
ka metaria vari tanga na hagavuringa?
7I hega, go girara vari vigo rapurapusia
na apena renigi na marata,
se go rupurupukurua na bêna renia na ora?
8Gu hataria hagetage râ
ma ki page taritari na ataromu renia.
I asa iamu vigu page bonotenia.
9Manga na mane i takusia, vi araria ma i taua
pusina ma i bâsia râ, ngaia ki vivi,
‘E, ve rumakaka mavê.’
Na maguha ma kani katoa manga i bagamame.
10Matena ga hagamangaria,
ngaia ki garagara ngavê.
I asa ta na enoni vige memato hetanga.
11Na mane i taharia ma ki tahitahi pania,
inê be haganahunia renia na maveta hagenani.
12Hoi, be hagarongogo renigi na êgana ma na rimana
ma na gerina raha ma raramohaga.
13I asa ta na mane vige sibia râ na gavona
se vige takekurua na ênahina.
14Ti ki girara i tahia na paratena
na harana henigi na rivona ga hagamamaguraga?
15Na ênahina raha ka gahuia na gerina
ma ka hepuruge haku ma ka rate manga na hê.
16Ngaigi ki puru haku gatagata,
hanana siana na roga ki bêbanu i berarogani.
17Ngaigi ki hekavikavi ki puru haku.
I bara ngavê vige hasuigi hegitigi.
18Matena i ramesi, ki sisiki manga na gi
ma na maana karu togatoga
manga na arito i raboa.
19Na vavatani na gi ka huhura me tenia na harana
ma ka sisiki.
20Na roborobo ki huhura me i hengohengona
manga na vavangana na ve i agobogobo.
21Na manavasua iana ki tanga na gi.
Na vavatani ki huhura me tenia na harana.
22Na riona ki raramohaga ngavê
ma ki hagabubununugara ngavê na enoni.
23I mangasi ngavê na gavona na apena hagenani.
Ngaia ki rate ngavê manga na aiani.
24Na bunaniana ki manga na hê.
Ngaia ki rate ngavê manga na hê ahe.
Ngaia ki asa vige magu.
25Matena i aharaga,
henaka na mane ni me ramo teha,
ngaira ka magutenia ma ka gavagava.
26Na tatapa borahu ki bara vige hagamamaria,
ma na ora, na mage ma na marata nogani.
27Tanga ngaia na aiani ki manga na go maria
ma na kapa higa ki manga na kakagana na apinige.
28Na mage ki asa vige hagavasia.
Na hê ga hêsigogoa renigi
ka mangagi na go maria ga hêhêgi.
29Tanga ngaia na buritahuru ki manga na ri maria.
Ngaia ki rurusigi ma na ora
na mane ga takea renigi.
30Na obana ki sutasutaga.
Na sutani ngegana ki harasigi na sugusugu
manga na vato ni ahura.
31Ngaia ki katoa na asi ki babaruru
manga na ve se na oile i agobogobo.
32Matena i tangotango
na asi na asêsuna ka agobogobo i murina
ma ki katoa na asi ki hutohutoga.
33I mareha rârâ ta na marâ i maveta vige maratorana.
Ngaia ki asa vige magu.
34Ngaia ki bâruhira na ara ni marâ mamauri,
henaka ngaira ka paroparo ngavê.
Ngaia ki marungira na marâ vasiga hato.”
Currently Selected:
JOBE 41: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
