JOBE 40
40
1Na Araha ki vi tanga o Jobe, ki vi: 2“Igo ko hagagege renia God raramohaga hunia.
I manga go torea igê na tamasinga.
I hega, tani nikâ na hagagegeha?
I hega na aramiha i pasimu?”
3O Jobe ki arami, ki vi:
4“E, Araha, inê kê tamasi bekabekaga.
Gê arami bâ hega?
Inê be muni so ma.
5Gê tamasi hagetage ma.
I arari noga. I hato vê.”
6Na Araha ki tamasi nikâ igê na roga raha
tanga o Jobe, ki vi:
7“Gu aharaga, manga vi igo na mane
ma ku aramigi nga na hagatenga iaku tangago.
8I hega, go uhungia vari
vigo tahetara reniê, vi inê kê aharê?
I hega, go uhungia vari, vigo hagatanga monari,
vi inê kê aharê ma igo ki mareha?
9I hega, igo ko ramo manga inê?
I hega, na ringemu ki girara vari
i gugusuhia manga na ringeku inê?
10Manga ngekana, hoi, gu hagabângenigi
na raramohamu ma na bâkorohamu.
Gu hagabângenia, vi igo ka na Araha raramohaga.
11Gu hahutugira na ani ga paroparo.
Gu sirihira renia na mangariaganiha iamu
ma ku hatungira na enoni era.
12Kasira go hatungira na enoni era.
Gu hagamagahurura râ hagetage nga i ngekê.
13Gu ahunira hato i ano.
Gu purusira banu igê na agua
ga oga igê na enoni ga bani me.
14Manga ngekana hoi, inê be hagarahasigo hagenago,
suria igê na raramohamu maremu kani igo go teha.
15Bâsia na bagamarâ raha ga visia vi na hipopotamo.
Inê kê hagavoragamurua, ngaia ma igo.
Ngaia ki ngêngê na go manga na puruka.
16E, ma na apena ki bâ raramohaga ngavê.
Na varugina igê na obana ma igê na tangana
ka huhuragani!
17Na kerena ki ura manga na apinige i rapu oto.
Na varugina na êgana ma na rimana ka ramo.
18Na suri ravoravona ki nganganihaga manga na kapa higa.
Na êgana ma na rimana ka mangagi na apini na aiani.
19Ngaia nga ka na ani i teharira
na ara ni marâ mamauri gê hagavorara.
Inê ma kanigê teharia.
20Ngaia ki tarahugi na go i ngaugi
igê vato pere igê na hungani
ga ogapisi igê na marâ vasiga.
21Ngaia ki rukuruku i ruguhani na rauga
ma na asire igê na sugusugu.
22Ngaia ki tâtâ i berarogani na rauga
ma na apinige ga akê i na akerena na ve.
23Ngaia ki pe magutenia na ve i maganu.
Ngaia ki pe gagêmaga,
matena na âgogona na ve i Jotano
ki hitaria na maana.
24Ti ki girara i ranguia na bêna,
se i siviria ki baroa na barisuna,
hanana vi torea vê?
Currently Selected:
JOBE 40: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
