JOBE 42
42
1O Jobe ki aramia na Araha, ki vi: 2“Araha, inê kê girara,
vi igo nga ko raramohaga hunigo
ma ki pe bara tangago ta na marâ.
3Igo ko hagateê,
vi tanu hega kanigê pe magu
kê hagaigago vigo pe tako mataha,
henaka inê kê pe girara.
I monari, inê kê tamasigi
na marâ gê pe aitangisigi.
Inê kê tamasigi na mena
ga bara tangê vi ve giraragi.
4Igo ko vi tangê, kê karinga,
matena go tamasi,
hanana gê uhungia kê aramigi
na hagatenga iamu tangê.
5I nago inê kê girarago,
suria ma na enoni ka hagarongoê renigo
ma i ngekê inê kê bâsigo renigi na maaku mareku.
6Tahema inê kê maki surigi na tamasinga hato iaku.
Inê kê oga so i ano ma na rahu i bêku,
suria gê kasi mena.”
O Jobe ki nahunia aporo na ramana
7Matena na Araha ki tamasi hato tanga o Jobe, ngaia ki vi tanga o Elipasi, ki vi: “Inê kê mangariaga tangagamu, igo ma na vererua na tamamu, suria na tamasinga iami reniê ki pe oto, ma ki pe manga hete o Jobe na kariaku. 8Tahema mu torera me na puruka mane gi pi ma na sipi mane gi pi tanga o Jobe, ma kamu susu renira meni na tasi iami, matena o Jobe ki avarasiê tangagamu. Inê be aganaria na avarasiha iana ma ki asa be hagamakigamu, hanana vige ararigamu. Igamu kamu pe tamasia na monariha reniê manga ngaia.”
9O Elipasi, o Bilitata mo Sopare ka tê viteana na Araha ma na Araha ki aganaria na avarasiha iana o Jobe.
10Hemuri, matena o Jobe ki avarasia hato na Araha tangara na tamana gi oru, na Araha ki haganahunia aporo o Jobe renigi na ramana ma ki vatea aporo renigi na nahuninga iana ma ki hagatonganigi. 11Ngaira hato o goana ma ka goana ma na bani tamana ka râ me ka vatugia ma ka magoto henia i ruma iana. Ngaira ka haganaku parongana ma ka hetaki suria na Araha ki nakagi na bagabevoani ki tarahua. Na ara ni hitangita ki vatea o Jobe tani na haga ma na ringi na golo.
12Na Araha ki koro tanga o Jobe teharia manga i nago. O Jobe ki nahunira na 14,000 na sipi, na 6,000 na kamelo, na 2,000 na puruka ma na 1,000 na tonki. 13Ngaia ki aparara o karena gi pi ma ka karena gi oru. 14Ngaia ki hêtana ka karena hagenago vi ka Jemina, na ruata kani ka Kesia ma na oruta kani ka Kereni Hapuku. 15Ka karena o Jobe ka bâkoro ngavê teharira na gete hato i maveta. O vaemata ki tonganira o goata ma ngaira renigi na nahuninga iana.
16O Jobe ki oga surigi na harisi 140 i murina ngekana. Ngaia ki bâsira na esina ma na kareta na esina. 17Ngaia ki kahu me matena i merahaga ngavê.
Currently Selected:
JOBE 42: KCB
Highlight
Share
Compare
Copy
Want to have your highlights saved across all your devices? Sign up or sign in
© 2011 Bible Society of the South Pacific
