JAKOBO 5

Mu bâbâ, na enoni ruruguha

1Hoita, mu rongoê, igamu na enoni ruruguha! I ararigamu, vigamu angiangi bâraha ngavê renigi na marâ era, ga page tarahugamu! 2Na ruruguha iami ka bani kakaga, ma na hasihasi ka bani ngêgi na gahu iami. 3Na golo ma na siliva iami ka bani hegahegaraga. Ma na hehegani ngegana ka page tamasi pusigamu, ma ka page ngaugi na hasigomi manga na gi. Igamu kamu bani hakugi na ruruguha, matena i meme noga na maveta. 4Igamu kamu pe vurira na mane, ga tagara i mu iami. Mu rongogi na tamasinga iata pusigamu, suria gamu pe vurira. Ma God, na Araha raramohaga hunia, ki rongogi na ringeta na enoni, ga nakanaka na harisi iami! 5Na mêrihami i maveta ka vunu renigi na ruruguha raha, ma na vagevageha raha iami maremi. Igamu kamu katogamu maremi, kamu binibinikaga mangara na puruka igê na tangiana, ga nanahuigamu igê. 6Igamu kamu bani erasira, ma kamu bani nahuira na enoni koro, ma ngaira ka pe ura pusigamu.

Na piringiapeha ma na nunginungiha

7Goaku, mu piringiape mataro me na matena, i arâ me igê na Araha. Mu takusia na mane, i tagara i mu. Ngaia ki piringiape, matena i gâga karia na mu iana mataro me na matena, i mariri igê na harisi koro iana. Ngaia ki piringiape, ma ki naasia na arana boro, ma na rangi ni hagahisi. 8Igamu nogami ki ararigamu, mu piringiape! Mu ramoramo, suria i hagarangi me noga na tangiana, i page arâ me igê na Araha.

9Goaku, siana kamu tamasi ngurunguru renigamu heri, hanana God ki pe surigamu. Na Araha ni suriha ki sugi banu me noga! 10Goaku, mu takusira aporo na poropete, ga tamasi urusia na Araha. Ngaira ka hagabângenia na piringiapeha, matena ga hatamia na mamasiaganiha. 11Igia ka visira, vi ga hagâvo, renia ga gatagata nga tare, mataro me igê na hatongina na mamasiaganiha iata. Igamu kamu bani girara vi o Jobo, ki piringiape, ma kamu bani girara na marâ, i katoa God tanga, matena i hato na mamasiaganiha iana. Suria na Araha ki teha i pasina na takiha ma na hetakiha.

12Goaku, siana hagetage kamu tohetohe, matena mu katoa na suruha renia ta na marâ. Siana kamu tohetohe renia na vavearo, se vi renia na maveta, se vi renia na ani mavê na marâ getea. Manga mu tako kamu vi “Ua”, mu vivi nga “Ua”. Ma ki manga mu tako kamu vi “Mareha”, mu vivi nga “Mareha”, hanana God ki pe surigamu ki hagaitangigamu.

13Ta na hitangimi vari i takotako bâraha? Ngaia ki araria, i nunginungi. Ta na enoni vari ki vagevage? Ngaia ki araria, i kiki. 14Ta na hitangimi vari ki maeha? Ngaia ki araria, i unira na maneraha igê na rotu, ma ngaira ka page nunginungi tanga, ma ka page monea igê na raramohana na Araha. 15Manga na enoni, ga nunginungi, ma ka nganganihaga igê na tongesuriha nikâ, na enoni maeha ki page komaga renia. Na Araha ki page hagakomaga, ma ki page bonotenigi na tasi iana. 16Tahema igamu ma na tamami kamu visigi mataha heri na tasi iami, ma kamu nunginungi tangagamu heri, hanana mu page komaga. Na nunginungiha iana na enoni koro ki raramohaga hunia renia na mena iana God. 17O Elia ki na enoni manga igia. Ngaia ki nunginungi bâraha, hanana vi siana ki rangirangi. Ma ki mareha, vi ge rangi surigi na harisi gi oru ma na hageha ge ono. 18Ma hemuri ki nungi nikâ, ma ki kahu rangi aporo, ma ka kahu akê koro aporo na ngêra i mu.

19Goaku! Manga na hitangimi, ma ki aharê tenia na monariha, ma na tamana ki hagaporosia tanga na monariha, 20mu takusia maninga: na anima na enoni, i hagaporosia na enoni era tenigi na parongana iera, ngaia ki page hagatahia na atarona na enoni era ngekê tenia na mera, ma igê na tarana ngekê God ki bonotenigi rako era na tasi.

Currently Selected:

JAKOBO 5: KCB

Highlight

Copy

Compare