JAKOBO 4
4
Na hearihatana i pasita na enoni
1Na hemerongeana ma na hearihatana i berarogami ka râ me tenia i he? Ngaira ka râ me tenigi na teniha era iami, ka heariha tare i obami. 2Mu obanigi na marâ, ma ki asa tangagamu, vi gamu nahunigi. Tahema mu tako hagamamahasia na nahuta ninuni. Mu tenigi na marâ, ma ki asa, vigamu nahunigi. Tahema mu heariha, ma kamu hemeronge. Mu pe nahunia na marâ, mu obania, suria mu pe nungia God renia. 3Ma na matena mu nunginungi, ma ki mareha, vi gamu tavoa na marâ, mu nungia, suria ga era na obaniha iami; mu nungigi na marâ tangagamu igamu maremi ma. 4I asa, vi ge page tongesurigamu! Mu pe girara vari, manga vi gamu takuia na eraha, igamu ki na merongana God? Ma na anima na enoni, i obania na eraha, ngaia ki katoa so marena, ki voravora renia na merongana God. 5Siana kamu takusia, vi na Buka Apuna ki tamasi purua ma, matena i vi, “Na ataroka, God i vategia, ki vunu renigi ramo na obaniha.” 6Ma na hetamaniha, God i vategia, ki ramo teharigi na obaniha ngegana. Renia na Buka Apuna ki vi, “God ki urapusira na enoni paroparo, ma ki votoa na hetamaniha iana tangara na enoni, ga haritagi.”
7Tahema kamu têtê na viteana God. Kamu rêrapusia Satana, ma ngaia ki page gavagava tenigamu. 8Mu guruguru me hagarangia God, ma ngaia ki page guruguru me hagarangigamu. Mu manuhi rima, igamu na enoni era! Mu taruhigi ke matarotaro na aitangihami, igamu na enoni babanga! 9I araria, i rugurugu na obami, mu angiangi, ma kamu angitenigi na tasi iami. Siana kamu mamana, suria vi igamu kamu angi! Siana kamu vagevage, suria vi igamu kamu bâbâ heruruhi! 10Mu kasigamu so maremi i maana God, ma ngaia ki page kasigamu akê.
Na guhaguha ki era
11Goaku, siana kamu heguhaguha. Na enoni, i tamasi erasia na goana, se i suria, ngaia ki tamasi erasia na Ramata, ma ki suria na Ramata vi i pe koro. Manga vi igamu, ma kamu suria na Ramata, igamu kamu pe marupea na Ramata, ma kamu suria na Ramata. 12God ngaia getea ma ki vategia na Ramata, ma ki surigia. Ngaia getea ma ki girara i hagatahira na enoni, se i hagaerasira ngavê. Mu takusia, vi o baga ti raha kanigamu, mu surira na enoni getera?
Siana ka paroparo
13Hoi, mu rongê, igamu na ani mu vi, “I ngekê, se i gomaha igami kami page arâ tanga ta na hinua raha, ma kami page gâga igê suria na harisi gi tage, ma kami page tanugi igê na tagaraha, ma kami page tavogi rako na haga.” 14Mu naka noga! Igamu ki asa iami, vi gamu girara ta na marâ renia na tangiana i gomaha. Na mêriha iami ki page bâ manga i he? Igamu kamu manga na kere vaha, i hatani voravora me, ma ki hatani magahuru râ nikâ. 15Ma ki ararigamu, mu tamasi vikê: “Manga vi na Araha, ma ki obania, igami kami page mauri, ma kami page katokato vikê ma vikana.” 16Ma i ngekê igamu kamu paroparo, ma kamu ura haha. Na paroparoha hato ngegana ka era.
17Tahema, na mane, i pe tanua na tagaraha koro, i tuguhia, vi tanua, ngaia ki tasi.
Currently Selected:
JAKOBO 4: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
