1 PETERO 1
1
1Inê Petero, na aposotolo iana o Jesu Kirisito.
Inê kê sege tangagamu na kariana God, mu mahuara, ma kamu totoko surigi na apanini i Ponto, i Galasia, i Kapatosia, i Asia me Bitinia. 2God Vaemaka ki bani ategamu suria na katoha iana marena, hanana vigamu voravora re na enoni koro renia na Higona Apu, ma kamu têtê viteana o Jesu Kirisito, ma kamu matarotaro renia na gapuna.
Inê kê obania, garu tehateha i pasimi na hetamaniha iana God ma na marapeha.
Na vuripusiami
3Ge visia raha God, na Vaemana na Araha iaka o Jesu Kirisito. Renia ngaia ki takuigia bâraha, ngaia ki vategia na mauriha haoru, suria ngaia ki bani hagamêria aporo o Jesu Kirisito tenia na mera. Manga ngekana, igia ka nahunia na naasiha monari. 4Tahema igia ka naasia, vi ge nahunigi na ruruguha koro era, God i bani nakagi tangara na kariana. Ngaia ki bani nakagi tangagamu i pasina. Tahema i asa, vi ge page kakaga, se vi ge page era, se vi ge page magahuru. 5Ngaigi ngegana ka tangagamu, suria igamu kamu tongesuria God raramohaga hunia, i anumasigamu, matena mu naasia na vuripusiami, God i page vategamu i na matena, i page aporo me igê na Araha.
6Mu vagevage renia na tarana ngekê, naka ma i rugurugu na obami i na kere matena i ngekê renigi na ara ni mamasiaganiha, mu hatamigi. 7Na mamasiaganiha ngegana ka hagamonaria na tongesuriha iami, vi monari. Mu takusia na golo. Ngaia ki girara i aera. Ma na enoni ka uhungia renia na gi, hanana vi korokoro na golo. Hoita, na tongesuriha iami ki teharia na golo. Ma ki koro nikâ, viga uhungia, hanana i korokoro tare. Manga ngekana, ka page visigamu koro, ma ka page visigamu raha, ma ka page kasigamu akê igê na tangiana, i page arâ me igê o Jesu Kirisito. 8Mu takuia, henaka vigamu pe bâsia. Mu tongesuria, henaka vigamu pe bâsia i na matena i ngekê. Tahema i koro era na obami renia na vagevageha raha. Ma na tamasinga ki asa, vi ge hagatea na vagevageha iami, 9renia mu tavoa noga na mena na tongesuriha iami: ngaia ka na tahingani na ataromi.
10Na poropete ka garia maninga na tahinga ngekana, ma ka naasia bâraha, ma ngaira ka bani takusia, vi na votovoto ngekana God ki vategamu. 11Ngaira ka uhungia, vi ga tarahua, vi i na keta kani page arâ me igê, ma ki arâ me marata. Renia na Higona Apu iana o Kirisito, i angarira, ki usia na matena ngekana tangara, matena i tamasi renigi na mamasiaganiha o Kirisito i page hatamigi, ma renia na arahanga, i page tarahua. 12God ki bani hagagirara na poropete ngegana, vi na tagaraha iata ki mareha vi tanga na koroha iata mareta, ma tangagamu igamu hete, suria ga tamasi renigi na morani na marâ, mu bani rongogi. Na mane tora tamasinga renia na Taroha Koro ka visigi tangagamu na marâ, ga monari ngegana. Ngaira ka tamasi igê na raramohana na Higona Apu, i râ me tenia God. Na angelo ka obania bâraha, vi ga rongorongo giraragi nogata na marâ, ga monari ngegê.
Gamu paronga koro
13Mu nananê tange na tagaraha. Mu bâbâ, ma kamu takusigi ma na marâ koro, i page vategamu renigi o Jesu Kirisito i na matena, i page arâ me igê nikâ. 14Mu têtê viteana God, ma siana na teniha iami ka raharaha tangagamu manga i nago, matena mu hite mênga. 15God ki bani ategamu. Ngaia ki koro ma ki oto. Tahema i tuguhigamu nogami, vi gamu paronga koro, ma kamu ototo igê na ara ni marâ, mu tanugi. 16Renia na Buka Apuna ki vi, “I ararigamu, vigamu korokoro ma kamu ototo, suria inê kê koro ma kê oto.”
17Igamu kamu hêtana God vi “Vaemamami”, matena mu rahesia. Ngaia ki na ani, i surira tagenata na enoni hato surigi na parongata hegitigi. Manga ngekê, mu hanetasia igê na mêriha iami i maveta ikê mataro me na matena, mu meme igê. 18Renia mu bani girara vi na vuriha, ki vuripusigamu tenigi na tarani na mêriha purua iata na êvarimi. Ga pe vuripusigamu renia na siliva, se vi na golo. Na taraterua ngegana karu girara garu soso. 19Ma na mena raha, i vuripusigamu, ngaia ki na mera iana o Kirisito, i manga na karena sipi, i matarotaro ma ki komaga bâkoro. 20God ki bani atea i nago, matena na maveta ki mamênga, ma igê na tangiani kere me ngegê ngaia ki hagabângenia, vi o Kirisito ki hagatahigamu. 21Renia o Kirisito igamu kamu tongesuria God, i bani hagamêria tenia na mera, ma ki bani atea, ki Araha. Manga ngekana, tahema God ki hagagatagatanigi na tongesuriha iami ma na naasiha iami.
22Hoi, igamu kamu bani hagamatarotarogamu maremi, suria mu tongesuria na Taroha Koro, ma kamu katogi na tagaraha mora. Ma nikâ igamu kamu takuira maninga na tamami, ga tongesuria o Kirisito. Igamu kamu hetakuiheri igê na mêrihami hagenani. 23Igamu kamu bani vora me nikâ. O Vaemami ki mareha vige me, ma ki asa hagetage, vi ge me. Igamu kamu bani vora me renia na tamasinga mamauri ma tarema iana God. 24Suria na Buka Apuna ki vi,
“Na enoni hato ka manga na rauga,
ma na ara ni bâkorohata ka manga na takani.
I meme na rauga, ma na takana ki votavota.
25Ma na tamasinga iana na Araha ki gâga tarema.”
Na tamasinga ngekê ki na Taroha Koro, mu bani rongoa.
Currently Selected:
1 PETERO 1: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
