ISAIA 60
60
Na bâbâhana i Jerusaleme i na matena i muri me
1Aharaga, Jerusaleme!
Ura igê na marara!
Na raramohana na Araha ki takirigo.
2Na enoni hato getera i maveta
ka page oga igê na roto hono,
ma na Araha ki page mavesigo igo,
ma ko page togatoga, suria i ngahisigo.
3Na mararamu ki page okera me
na enoni getera i maveta henira na maneraha,
suria na mararamu ki manga na arito, i raboa.
4Gu bâ arigu igo!
Na kariamu ka aporo haku me!
Na karemu ka page râ me hagatê,
ma ka page topera mangara na kare.
5Matena go bâsira, igo ko page vagevagesira ngavê,
ma ki page koro ngavê na apemu renira.
Na enoni getera i maveta ka page tagarenigi tangago
na ruruguha ma na nahuninga iata.
Ngaira ka page migirâ me tenigi na agua hagatê.
6Rako teha na kamelo ni Mitiani me Epa me Seba
ka aharêsigo, ma ka page toregi me
na golo ma na marâ ga sigini koro, matena na sungigi.
Ngaira ka page tarohenia na taroha koro
renigi na tauhana na Araha.
7Ga page hakura me na sipi ni Ketare me Nebaiote
tanga na vogasiha tanga na Araha,
hanana ga hagakoro obana renira.
Vikana i Ruma ni Rotu iana ngaia ki page hagabângenia igê,
vi na raramohana ki raha teha ngavê.
8Na ta kani ga manga na parêru igana?
Na ta kani ga ahehahe manga na manu igana?
9Na haka ka râ me tenigi na agua hagatê ngegana.
Na haka iata na ai ni Tasisi ka hagenago.
Ga mera aporo me na karemu.
Ngaira ka migirâ me na siliva ma na golo,
hanana viga hagarahasia re na Araha God iamu,
na God Apuna iata na Isiraelita,
i katogo, ki rongo raha na atamu.
10Na Araha ki vi tanga i Jerusaleme, ki vi:
“Na ai ni mahuara ka page tagarahigi aporo
na para rihigo,
ma na maneraha iata ka page tagara tangago.
I nago inê kê hagaitangigo,
suria gê mangariaga tangago.
Ma i ngekê inê be makuanigo ma be takuigo.
11Na maani para ka page tahataha tare
ma ki asa vige purupuru,
hanana na maneraha henira na kariata
ka migibanu tangago na ruruguha iata.
12Ma na maneraha henira na kariata,
ga usi vige tê viteamu,
ka page mutemute ngavê.
13“Jerusaleme, na ara ni apinige koro hato,
na ani ga oto, ga borahu ma ka bagora,
ka page râ me tangago tenigi na vapuni i Libanone,
hanana ga page tagarahigo aporo renigi,
ma ka page torea aporo re na Ruma ni Rotu iaku.
Ngaigi ki page hagabâkoroa na Ruma ni Rotu.
Inê be katoa na hinua iaku, ke rongo raha na atana.
14Na kareta na ani, ga hagamamasiagago i nago,
ka page arâ me, ka tu bê, hanana ga hagahigasigo.
Ngaira hato na ani, ga ruhigo i nago,
ka page susure i maamu.
Ngaira hato ka page visigo,
vi igo, Sione, go hinua iana na Araha,
go hinua iana God Apuna iata na Isiraelita.
15I nago na enoni ka panigo ma ka usitenigo.
Igo ko hihiruga manga na tênga.
Ma inê be hagakorogo aporo, ke rongo raha na atamu,
ma ko page vora renia na hinua ni vagevageha,
na vagevageha i asa vige page hato.
16Na maneraha i maveta henira na kariata
ka page hagangêgo ma ka page marupego,
manga na gete i hagasusua na karena.
Igo ko page tahetara reniê,
vi inê nga na Araha kani gê hagatahigo,
vi inê nga God raramohaga huniê i Isiraele
ka na tahingamu.
17“Inê be vatego na golo urusina na siliva.
Inê be vatego na siliva urusina na aiani.
Inê be vatego na aiani urusini na apinige ma na hê.
Na enoni raha iamu ki hato, vige page hagamamasiagago.
Inê be katora ke marupego
igê na otoha ma na marapeha.
18Ki asa, vige page vora me nikâ na hearihatani,
ga ruhuruhugi na hinua ma ka erasigi na mu.
Inê be anumasigo manga na para i rihuigo,
ma igo ko page hagarahasiê, suria gê hagatahigo.
19“Na arito ki hato, vige page mavesigo igê na tangiani.
Na hageha ki hato, vige page mavesigo igê na bungiani.
Inê nga hete na Araha, kani gê page mavesigo tare ma tarema.
Igo ko page togatoga renia na raramohaku inê, God iamu.
20Na matena ni hetakiha iamu ki page hato.
Inê na Araha ki na arito iamu, i asa be su.
Inê ki na hageha iamu, i asa be su.
Inê be mavesigo tare ma tarema.
21Na kariamu ka page katogi ma na tarani, ga oto,
ma ka page gâga hagahu igê na agua.
Inê kê hagavorara ma kê hasira,
hanana vi na enoni ka hagarahasiê.
22Na ahemata, ga pe rako, ki page tataka
ma ki page gahuia na agua raha hagenani.
Inê nga na Araha kani gê page katokato vikana
igê na matena tanga.”
Currently Selected:
ISAIA 60: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
