ISAIA 49
49
Na Araha ki katoa na kariana mora ki tavoraha maninga
1Mu karingê, igamu na ai ni tarasini,
igamu na ai ni agua hagatê.
Matena i mamênga ve voravora me,
na Araha ki bani ateê.
Matena i obana mênga kenaku,
ngaia ki bani kasiê, kê vora na kariana.
2Ngaia ki katogi na tamasinga iaku
ka manga na tatapa, i masi ngavê.
Ngaia marena ki ngahisiê ma ki anumasiê.
Ngaia ki katoê, kê manga na mage i masi,
i taua i rimana.
3Ngaia ki vi tangê, ki vi:
“Isiraele, igo nga ki na kariaku.
Renigo igo na enoni ka page hagarahasiê.”
4Inê kê tako kê vi:
“E, inê kê tagara purua ma.
Ki meme hagaborâ na apeku.”
Henaka, ma inê kê girara nga,
vi na Araha ki page katoê,
kê tavoraha maninga igê na tagaraha iaku.
Ngaia ki page vuriê renigi na tagaraha iaku.
5I mamênga be voravora,
ma na Araha ki kasiê, kê vora na kariana,
hanana gê torera aporo na Isiraelita tanga,
ma kê hagahakura me, suria ga totoko.
Na Araha God ki hagarahasiê
ma ki hagagatagataniê.
6Na Araha ki vi tangê, ki vi:
“I pe mataku tangago, vigu vora na kariaku,
suria i tuguhigo, vigo hagahakura na Isiraelita,
na ani ga tahitahi mêngara,
hanana ga nganganihaga aporo.
Ma inê be kasigo nikâ,
ku mavesigi nogani na obata na enoni getera hato,
hanana na enoni hato i maveta ka tahitahi.”
7God Apuna, i hagatahira na Isiraelita,
ki vi tanga na ani, na enoni ka ruhia bâraha, ki vi:
“Na enoni i maveta ka kitenigo ngavê.
Igo ki na kare rakuraku iata na maneraha.
Ma ki page hato, vigu vora re na kare rakuraku.
Ma na maneraha ngegana ka page bâsigo, go aharupa,
ma ka page hagahigasigo ma ka page tubê tangago,
hanana ga hagarahasigo.”
Na tarana ngekê ki page vora me,
suria na Araha God Apuna i Isiraele
ki bani atea na kariana,
ma ki hagamonarigi tare na suruha iana.
Na aporoha tanga i Jerusaleme
8Na Araha ki vi tangara na kariana, ki vi:
“Igê na matena tangê inê be aganarigamu.
Igê na matena ni tahinga inê be tamanigamu.
Inê be ngahisigamu ma be anumasigamu.
Inê be kasigamu, hanana mu hagamonarigi
na suruha iaku tangara na enoni hato i maveta.
Inê be nakagamu kamu aporo i pasimi,
i na apanena iami, i hihiruga ma ki avagavaga.
9Inê be vi tangara na enoni, ga bani henahuraura
ma ka oga igê na roto na ruma ni hagaitangiha, kê vivi:
Hura me! Mu asitatara!
Ngaira ka page mangara na sipi ga ngêngê
i na akereni na tara ma i na tarihani na hungani.
10I asa vige page magê, se vige mamata na riota.
Na arito ma na roga mahana ki asa, vige page singira,
suria na ani, i bêngenira, ki takuira.
Ngaia ki page hagaotora tangagi na ve banga.
11“Inê be naka na tara raha,
ki aharêvoro igê na hungani.
Inê be maningaia na tara koro tangara.
12Na kariaku ka page aporo me
tenigi na agua hagatê ngavê,
tenia i kerekê, tenia i kereso,
tenia i Asevane ma tenigi na ara ni agua hato.”
13Vavearo, kiki vagevage!
Maveta, ngere vagevage!
Hungani, mu kiki!
Na Araha ki page hagakoro obata na kariana,
ma ki page botage renira,
suria ga mamasiaga.
14Ma na ai ni Jrusaleme ka vi:
“Na Araha ki pe botage renigia.
Ngaia ki bani kasi renigia.”
15Tahema na Araha ki aramira, ki vi:
“I hega, na gete ki pe botage renia vari na kare gari iana?
I hega, na gete ki pe takuia vari na kare, i apara?
Manga vi na gete, ma ke pe botage renia na karena,
tangê inê ki bara ngavê!
16Jerusaleme, i bara ngavê tangê,
be tako mu renigo.
Inê kê bani rapusia na atamu i rimaku,
ma igo ko gâga tare igê na mangataku.
17“Ga sugi aporo me na karemu,
ma ngaira ka page tagarahigo aporo.
Ma na merongamu, ga bani hagasuhigo,
ka page gavatenira.
18Gu ahaukê ma ku bâ!
Na kariamu ka haku me!
Ga aporo me!
Igo ko page ageagesira na kariamu,
manga na gete êragi haoru,
i ageagesigi na rêni iana.
Ngaia nga kani gê visia,
inê na God, gê mauri tare.
19“Na apanena iamu ki hihiruga ma ki vapuga mênga,
ma na hinua igê ka aruhuruhu mêngagi.
Ma ngaia ki page pe ararira na kariamu,
hanana vige goga igê, suria ga rako makira.
Ma na merongamu, ga ruhuruhugo,
ka page tari era tenigo.
20Na kariamu, ga vora igê na agua,
na enata ka henahuraura tange,
ngaira ka page vi tangago, ka vivi,
‘Na agua ikê ki sisite era.
Mareha na matora tangagami,
hanana vigami gâga igê.’
21Ma igo ko page tako, ko vivi,
‘Ti kani aparara na kare hato ngegê tangê?
Inê kê gemêa, ma kê tê tara renira na kareku.
Ga henahurauê ma ka toreê vê.
Ti ki bâsurira na kare ngegê?
Inê kê hita so, inê getegeteê ma.
I he kani ga râ me igê na kare ngegê?’”
22Na Araha God ki vi tangara na kariana, ki vi:
“Inê kê tagarenia akê na rimaku,
kê hagarari tangara na enoni i maveta,
ma ngaira ka page torera aporo me tangagamu na karemi.
Ngaira ka page topera, ka bahara ma ka sungira.
23Na maneraha ka page marupegamu,
manga vi ngaira ka na vaemami hagareha,
ma na gete iata ka page hagangêgamu,
manga vi ngaira ka na kenami.
Ngaira ka page tubê so i ano i maami,
ma ka page siginigi na êgami,
hanana ga hagahigasigamu.
Ma igamu kamu page aitangisiê,
vi inê ki na Araha.
Mareha vê na enoni, i raroni togo reniê,
vige raruni era reniê.”
24Jerusaleme ki hagate, ki vi:
“Ti ki girara i tavogi aporo tenia na mane ni me ramo
na marâ, i bani hanagogi?
Ti ki girara i hagatahira tenia na maneraha ramo
na enoni, i bani henahuraura?”
25Na Araha ki arami, ki vi:
“Ngaia ngekana!
Ga page tavogi aporo tenia na mane ni me ramo
na marâ, i bani hanagogi.
Ga page hagatahira tenia na maneraha ramo
na enoni, i bani henahuraura.
Inê be meheariha na ani ma vê na enoni, i megoheariha.
Inê be hagatahira na karemu.
26Inê be katora na enoni, ga hagamamasiagago,
ke nahuira heri ka meme.
Ngaira ka page tunumi heri na gaputa.
Ma na enoni hato i maveta ka page aitangisiê,
vi inê nga ki na Araha,
na ani gê hagatahigo ma kê vuripusigo.
Ngaira ka page tahetara reniê,
vi inê nga ki na God raramohaga huniê i Isiraele.”
Currently Selected:
ISAIA 49: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
