ISAIA 48
48
Na Araha God ki hagaotoa na bevoana i muri me nikâ
1Ai ni Juta, raraha iana o Jakobo,
mu karinga na tamasinga iaku.
Igamu kamu tohe renia na Araha.
Igamu kamu vi, vi igamu kamu rahesia God,
i hagavora i Isiraele.
Ma igamu kamu hagaparu ma.
2Henaka, ma igamu kamu ageagesia,
vi igamu ka na ai ni hinua apuna
ma kamu hagêguria God iata na Isiraelita,
ga hêtana vi na Araha raramohaga hunia.
3Na Araha ki vi tangagamu, ki vi:
“I nago kere vê noga inê kê bani hinarugi me
na tarani ga vora me.
Igamu kamu bani rongogi teniê.
Inê kê parama, ma kê katogi ka voravora me.
4Inê kê bani giraragamu, mu guguruga,
mu togeaga ma kamu heheriga,
ma ki gatagata na rokomi manga na aiani.
I asa vigamu kere marogo so.
5Tahema inê kê bani hinarugi me
na marâ, ga tarahugamu.
Inê kê bani tarohenigi me na tarani ngegana
ma hemuri ka kahu vora me.
Inê kê kato vikana, suria gê pe obania,
vigamu kami vivi, vi na nunuta na harasimi
kani ga katogi na tarani ngegana.
6“Igamu kamu bani rongogi ma kamu bani bâsigi.
I hega, kamu pe vi, vi na hinarunga iaku ka monari?
Hoi, i ngekê inê be hagarongogamu
renigi na tarani haoru, ga page voravora me,
na tarani ga pinihi mênga tenigamu.
7I ngekê nga inê kê katogi ka voravora me mave.
Igamu kamu bani purunguni me renigi i nago.
Manga ge mareha, igamu kamu vi vari,
‘E, igami kami bani giraragi.’
8Inê kê bani giraragamu, vi igamu kamu hagaparu tare.
I asa ta na enoni, vige hagêguri togo renigamu.
Igamu kamu bani guguruga me kere vê noga.
Igamu kamu purunguni renigi na tarani hato ngegê.
Mareha ngavê, vigamu rongo kuruhani rârâ.
9“Inê kê piringia so na mangariganiha iaku,
hanana na enoni ka hagarahasiê.
Inê kê piringiape, hanana siana kê mutegamu.
10Inê kê hagamatarotarogamu,
mareha vi manga na siliva renia na gi,
ma renia hete na mamasiaganiha.
11Na tarani gê katogi,
inê kê katogi tangê inê mareku ma,
hanana na enoni hato ka hagarahasiê inê geteê renigi,
suria i pe koro ka hagaigê.
Ma ki bara be metongani râ nikâ o ti.”
Na Araha ki atea o Kuro ki maneraha
12Na Araha ki vi;
“Isiraelita na kariaku, mu karingê!
Inê geteê ma kê God.
Inê kê bani oga me igê na haganegahana,
ma kê page gâga tare, ki bê ki arâ.
13Inê mareku kê hagavora na maveta, ki nganganihaga,
ma igê na raramohaku inê kê gasia na vavearo.
Matena gê unirerua me na ano ma na vavearo,
ngairerua karu arâ me otooto râ nga.
14“Igamu hato, mu haku me ma kamu rongo!
Ti na ataro i hinarugi na tarani ngegê?
Inê nga kani gê atea na kariaku,
ki taharia i Babilone.
Ngaia ki page arâ surigi na katoha iaku
ma ki page marungira i Babilone.
15Inê geteê ma kani gê unia ma kê hagatora.
Inê kê bêngenia ma kê katoa ki teha.
16“Mu guru me hagarangiê ma kamu karingê.
Tenia na haganegahana inê kê bani tamasi mataha.
Inê kê pe pinihia rârâ ta na marâ tenigamu.
Tenia na haganegahana inê kê bani hagamonarigi me
na tamasinga iaku.”
Monari, na Araha God ki angariê
ma ki hagatorangeniê igê na raramohana.
Na katoha iana na Araha tangara na Isiraelita
17Na Araha God Apuna,
i hagatahira na Isiraelita, ki vi:
“Inê nga ki na Araha God iami.
Inê kê obania be hagesurigamu
renigi na marâ, ga koro tangagamu,
ma be hagaotogamu suria na tara koro,
i tuguhigamu, vigamu arâ suria.
18Manga vigamu bani marupegi na ramata iaku,
vikê na ramana ke aharêsigamu,
manga na ve i asa, vige page mamata,
ma na otoha ki asa, vige hato tenigamu,
manga na asi i arobo tare.
19Na raraha iami ke rako mangagi na one
ma ke pe mutemute,
ma inê be pe takotako mu renira.”
20Mu tari era tenia i Babilone!
Gavatenira na ai ngekana!
Ngerengere vagevage!
Tarohenia igê i na ara ni agua, kamu vivi:
“Na Araha ki hagatahira na kariana na Isiraelita!”
21Matena na Araha ki bêngenira na kariana
igê na masusu raha mahana ma avagavaga,
ngaira ki pe mamata na riota.
Ngaia ki katoa na ve ki gogogo me tenia na hê,
hanana ga totono igê.
Ngaia ki tahurua na hê,
ma na ve i pusu me.
22Na Araha ki vi:
“I mareha vê na ramana
tangara na enoni ga haritoheê.”
Currently Selected:
ISAIA 48: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
