ISAIA 50
50
Na Araha ki ramatenigi na tauhana
1Na Araha ki vi tangara na ai ni Isiraele, ki vi:
“Mu takusia vari, vi inê kê tarigenia hura kenami,
suria vigê obania, gê kasia?
Ma i he na pepa ni hekasigi?
Mu takusia vari, vi inê kê hagavuringenigamu,
suria inê kê obanigi ma na haga,
hanana vigê barubaru renigi na hagaba?
Mareha vê!
Ma ka henahuraugamu hete renigi na bagatarihami,
ma ka torea vê kenami renigi na bagaparongami.
2“Renia ta igamu kamu pe tê viteaku,
matena gê râ me kê hagatahigamu?
Renia i hega, kamu muni ma,
matena gê unigamu?
Inê kê pe raramohaga vari,
hanana vi ve hagatahigamu?
Bâ, inê kê tamasi ma,
ma ki mamata ngavê na asi,
ma na ve ka vora re na marave avagavaga.
Na siare igê ka me ma ka mapu,
suria i mareha na ve tenira.
3Inê kê girara gê katoa na mavetana, ki rotoroto hono,
manga i rotoroto na obata na enoni,
matena ga angiangi maramara.”
Na kariana mora na Araha ki tê viteana
4Na Araha God ki bâbâsuriê, matena gê tamasi,
hanana gê kanukanura na ani, ga rumakaka.
Na ara ni mavoraro ngaia ki hagariteê,
ma ki katoê, kê magêsia na hagesuringa iana.
5Na Araha God ki katoê, kê têtê viteana.
I asa iaku, ve guguruga tanga,
se vi ve murisigea.
6Inê kê naka na geriku
tangara na ani ga tahuruê.
Inê kê nakarerua na pariku
tangara na ani ga kusigi na taboturiku.
Inê kê nakara ka guhariê
ma ka pusurigi na maaku.
7Na Araha God ki tamaniê.
Tahema na guhata iata ki asa, vige erasiê.
Inê kê nganganihaga ma tangara,
manga na hê i rate.
Inê kê bani girara, vi inê ki asa be maki,
8suria na ani, i tamaniê, ki ngahisiê.
Ti ki girara i toreê igê na tamasinga?
Hoi, ge metamasi igê na kotiha.
Ti kani toreê?
Ge ura ke tamasi!
9Bâ, ngaia nga na Araha God ki roherohe pusiê.
Ti kani hagatanga monari reniê,
vigê katoa na eraha?
Ngaira hato, ga torahuriê,
ka page magahuru mangagi na tarisigani na gahu,
ga ngêgi na hasikoko.
10Igamu na ani mu hagahigasia na Araha
ma kamu tê viteana na kariana,
vari na tara, mu râ igê, ki roto hono ngavê.
Henaka i manga ngekana,
mu ama ni raruni togo nga renia God.
Mu ama ni hagêguria nga na Araha.
11Igamu na ani mu harikato renira na enoni getera,
na katoha iami ka page erasigamu igamu hete,
manga na gi, mu tanga, ma ki ngaugamu so maremi.
Ngaia marena na Araha kani katoa vikana.
Na mamasiaganiha ki page hagamesigamu.
Currently Selected:
ISAIA 50: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
