ISAIA 47
47
Na hagaitangiha tanga i Babilone
1Na Araha ki vi: “Babilone,
gu vato tenia na âgâga iamu
ma ku oga hurihuri i ano.
I nago ka visigo, vi na kare viru,
suria igo na hinua go teha.
Ma ki hato vigu marumu, se vigu mamakaga,
suria i ngekê ko vora re na kare rakuraku.
2Taketake na ngêra!
Garasi na ni!
Gaia râ na gahu i bêmu!
Tasia râ na tuguni iamu.
Rumia akê na gahu iamu
ma ko tarêhigi na ve.
3Na enoni ka page bâsigo, go rupaturi,
ko arikuku ma ko maki.
Inê kê page barua na siva
ma ki asa hagetage be page tihia tani.”
4God Apuna i Isiraele ki hagatahigia.
Na atana ki na Araha raramohaga hunia.
5Na Araha ki tamasi tanga i Babilone, ki vi:
“Oga so! Muni!
Oga igê na agua i roto!
I hato, vige page visigo nikâ,
vigo raha teharigi na agua hato getegi.
6Inê kê mangariaga tangara na kariaku
ma kê kasi renira,
ma kê nakara ma tangago.
Ma igo ko pe takuira rârâ,
ma na gemêa nikâ igo ko katora bera ngavê.
7Igo ko vi ma, vi igo ko tehateha tare.
Tahema go pe botage renigi na haganunuha,
se renigi na tarani ga vora me.
8“Gu rongo, kani go hagatage renigi na teniha iamu.
Igo ko vi ma, vi igo ko asitatara,
ma ki asa ta na marâ vige tarahugo.
Igo ko vi, vi igo ko teha.
Mareha tani vige maratoramu.
Igo ko vi ma, vi igo ki asa vigu nâ,
se vigu magari.
9Ma na tarani gi rua ngegana
karu parama, ma karu page tarahugo
i rarona nga na tangiana gi tage togo.
Naka ma go katogi rako teha na harikua ma na maru,
igo ko page magari ma ko page nânâ.
10“Igo ko raruni togo renigi na bagatarihamu,
ma ko vi ma, vi mareha rârâ ta na enoni, vige bâsigo.
Na giraraha ma na takotako iamu ka hagatasigo,
ma ko tako maremu, ko vivi,
‘Inê nga kani gê God.
Mareha tani vige maratoraku.’
11Na bagabevoani ka page tarahugo,
naka ma vigo marumaru se vigu harikua.
Igo ko page parama, ma ko aruhuruhu.
Na aruhuruhunga i ataraha ma go marutea.
12Gu ama ni katogi nga na harikua ma na maru,
manga go bani katogi me, matena go karekare mênga.
Ngaigi ki tamanigo vari?
Se ga hagamagusira na merongamu vari?
13I asa vigu hagatahigo maremu,
naka ma ga rako na enoni, ga vatego na takoha.
Ma igo ki meme na apemu renigi.
Nakara ke râ me ke hagatahigo.
Nakara ke râ me na enoni,
ga hagakitakitagi na higu
ma ka segegi so, vi manga i he na vavearo.
Ma i na ara ni mateni i hagenani igê na hageha,
ngaira ka hinarugi na marâ, ga page tarahugo.
14“Ngaira ka mangagi ma taromegani na go maria,
ma na gi ki page ngaura.
I asa iata, vige hagatahira mareta.
Manga i he ka girara viga hagatahigo?
Na gi ngekana ki ramo teha ngavê
ma ki pe arari, vige hagarara igê.
15Na enoni ngegana, ga giraragi na tarani na higu,
ka manga ngegana.
Ngaira ka vatego na takoha,
haganega me tenia go sisite.
Na tarana ngekê ki tamanigo vari?
Ngaira hato ka page panigo tatage,
ma ki asa tani vige hita so,
hanana vige hagatahigo.”
Currently Selected:
ISAIA 47: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
