ISAIA 46
46
Na ataro ni Babilone ka na marâ purua ma
1I hato noga iata na ataro ni Babilone!
Ngaira i ngekana, ga bani vogasirerua me
na ataro Belo ma Nebo,
ka hagarutangirerua igê na tonki,
ma ka hagahigera na tonki,
ki meme na apeta renirerua.
2Ka henahuraurerua ma ka torererua vê,
karu hetagitagi igê na gerita na tonki.
I hato noga iata na ataro ni Babilone!
3God ki vi:
“Karingê, igamu na raraha iana o Jakobo,
igamu na kariaku mu tahitahi mêngagamu.
Inê kê bani marupegamu me
haganega tenia na matena mu vora me igê.
Inê kê topegamu.
4Inê nga ki na God iami.
Inê be marupegamu,
mataro me kamu gemêa
ma ka gohogohoraga na bêmi.
Inê kê hagavoragamu,
ma be ama ni makuanigamu nga.
Inê be tamanigamu ma be hagatahigamu.
5“Ti kamu hagararia reniê?
Ti ki maratoraku?
6Na enoni ka karangigi na golo tenigi na kato iata.
Ngaira ka nakanaka na higahigani na siliva.
Ngaira ka vuria na mane,
hanana i tagarahia na nununa na ataro renigi,
ma hemuri ka susure tanga ma ka rahesia.
7Ngaira ka tugia rârâ,
ma ka naka igê na atohana.
Ma ki gâga tonge igê,
ma ki asa hagetage vige guru râ tenia.
Ma na matena na enoni ka avarasia,
ngaia ki asa vige aramira,
se vige hagatahira tenigi na bagabevoani.
8“Igamu na enoni, mu aharêngigi na ramata,
mu takotako, ma kamu takusia na matena i nago.
9Mu takusigi aporo na tarani,
ga bani vora me i nago kere vê noga.
Mu aitangisiê, vi inê geteê ma kê God,
ma ki mareha tani, vige maratoraku.
10Matena ga mamêngagi, vige voravora me,
inê kê bani hinarugi.
Inê kê bani hinarugi me i nago kere vê noga
na tarani ga vora me.
Inê kê vi, vi na katoha iaku ka tâ ga tâ,
ma be hagamonarigi na ara ni katoha iaku.
11Inê kê unia me ta na mane tenia i kerekê.
Ngaia ki râ me noga.
Ngaia ki page hagavato manga na tehe,
ma ki page hagamonarigi na katoha iaku.
Na tamasinga iaku ka page monari.
Inê kê page akê me henigi na katoha iaku.
12“Enoni mu guguruga, mu karingê!
Igamu kamu vi ma, vi na tahinga ki hagatê mênga.
13Ma hete inê kê katoa ki hagarangi me.
Mareha ngavê, vige hagatê mênga.
Na tahinga ki asa, vige hagarihu.
Inê be hagatahia i Jerusaleme,
ma ki page rongo raha na atata na Isiraelita reniê inê.”
Currently Selected:
ISAIA 46: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
