ISAIA 45
45
Na Araha ki atea o Kuro
1Na Araha ki vi tanga o Kuro, ki vi:
“Inê kê kasigo, ko maneraha.
Inê kê ngahisigo,
hanana go teharigi na agua getegi.
Na enoni raha igê ka page tuturiha renigo
ma ka page tangahigi na maani para ni hinua.
2Inê mareku be nanago taramu,
be hagahataragi na barani ma na hungani.
Inê be hogegi na maani para na aiani
ma be barugigi na raburini.
3Inê be vatego renigi na ruruguha ma na nahuninga,
ga pinihigi na enoni ngegana.
Igê na tarana ngegana igo ko page aitangisiê,
vi inê kani gê Araha, na God iata na Isiraelita,
ma inê nga kani gê unigo ma kê atego.
4Inê kê atego,
hanana go tamanira na Isiraelita na kariaku hetakui.
Inê be katogo, ke rongo raha na atamu,
naka ma igo ko hiteniê.
5“Inê geteê ma kê Araha.
Inê geteê ma kê God.
Inê be hagaramonigo,
naka ma igo ko hiteniê.
6Inê kê kato vikana,
hanana na maveta hagenani ki aitangisiê,
vi inê geteê ma kê Araha ma kê God.
7Inê kê hagavorarerua na roto hono ma na marara.
Inê kê katorerua na ramana ma na bagabevoana.
Inê nga na Araha kani gê katogi na tarani ngegana.
8Inê be hagatorangenia na tahinga
tenia na vavearo,
ki soso manga na rangi,
ki sivoria na maveta,
hanana na ramana ma na otoha karu manasia.
Inê nga na Araha kê page katoa vikana.”
Na Araha ki na hunani na ara ni marâ hato
9I era ngavê tanga na enoni,
manga i mehetuguri God.
I hega, na apira ki girara vari,
i mehetuguri na mane, i tahea?
Na bogona na apinige vari ki girara,
i hagatea na mane i tahea, ki vivi:
“Go taheê tanga na ta?”
Na apira vari ki girara,
i hagatea na mane, i tahea, ki vivi:
“Go hite! I he nga na bogoku?”
10Na kare ki girara vari,
i hagatererua na enana, ki vivi:
“Renia ta kamu aparê vikê?”
11Na Araha God Apuna i Isiraele ki vi:
“I pe oto tangagamu, vigamu hagateê
renigi na tarani, gê page katogi i muri me,
se renira na kariaku, gê hagavorara,
se vi renigi na tagaraha iaku.
12Inê nga kê hagavora na maveta
ma kê hagavorara na enoni igê.
Inê nga kê gasia na vavearo renia na raramohaku
ma kê hagaotogi na arito, na hageha ma na higu.
13Inê nga kani gê hagatorangenia o Kuro, ki râ me,
hanana i hagamonaria na katoha iaku
ma ki hagaotogi na marâ hato.
Inê be hagahataragi na tara tarana.
Ngaia ki page tagarahia aporo na hinua iaku i Jerusaleme,
ma na kariaku, ga bani henahuraura,
ngaia ki page katora, ka aporo i pasita.
Ngaia ki page kato vikana,
mareha vi suria ta na enoni ki vuria,
se vige vatevatea.”
Ngaia kani visia na Araha raramohaga hunia.
Na Araha ngaia gi tage ma ki God
14Na Araha ki tamasi tangara na Isiraelita, ki vi:
“Igamu kamu page nahunigi
na ruruguha ma na nahuninga i Esipito me Etiopia.
Na mane, ga borahu i Seba,
ka page vora re na kare rakuraku iami.
Igamu kamu page herehere varota igê na seni.
Ngaira ka page tubê tangagamu, ka vivi:
‘God ki ngahisigamu.
Ngaia getea ma ki God.
Mareha vi tani râ nikâ.
15God, i hagatahira na Isiraelita na kariana,
ngaia ki gâga pinihi.
16Ngaira hato, ga tahegi na nunuta na ataro,
ka page maki ma ka page ruruhi.
17Ma na Araha ki page hagatahira na Isiraelita,
ma ngaira ka page tehateha tare, ki bê ki arâ,
ma ki asa hagetage vige page maki.’”
18Na Araha ki hagavora na vavearo.
Ngaia getea ma ki God.
Ngaia ki hagavora na maveta
ma ki nakagi na ara ni marâ igê na atohani.
Ngaia ki pe hagavora na agua,
vige hagagara era tangara na enoni,
ma na agua i hagagara koro hete tangara.
Ngaia nga ki vi: “Inê nga ki na Araha.
Mareha vi tani râ nikâ.
19Inê kê pe tamasi pinihi,
se vi ve pinihia na katoha iaku.
Inê kê pe vi tangara na ai ni Isiraele,
hanana vige gariê igê na agua, i hagagara era.
Inê nga ki na Araha.
Inê ki asa be hagaparu.
Inê kê tamasi monari tare.
20“Ai ni agua getegi, mu tahitahi mêngagamu,
mu haku me tanga na kotiha.
Igamu kamu toregi rârâ na nunuta na harasimi,
mu tahegi renigi na bagorani na apinige.
Igamu kamu avarasira na ataro,
ma ngaira ki asa ngavê, vige hagatahigamu.
Igamu kamu beka ngavê.
21Mu râ kamu hekarigi,
ma kamu kahu tamasi igê na apanena iami.
Ti ki bani hinarugi me kere vê noga
na tarani ga vora me?
Inê nga na Araha God, kê hagatahira na kariaku.
Inê geteê ma ki God.
Mareha vi tani râ nikâ.
22“Igamu hato na enoni i maveta hagenani
mu ahariê inê, ma inê kê page hagatahigamu,
suria inê getegeteê ma kê God.
23Inê kê tohe reniê mareku,
vigê hagamonaria na tamasinga iaku.
I asa ve urisi parongaku.
Inê kê vi, vi na ara ni enoni hato
ka page arâ me ma ka page bêtuhiê,
ma ka page surusuru, viga tototo suriê.
24Ngaira ka page visiê, vi inê nga
kani gê hagatahira ma kê hagaramonira.
Ma na ani hato, ga kiteniê, ka page maki.
25Inê nga ki na Araha, gê page hagatahira
na raraha hato iana o Jakobo,
ma ngaira ka page hagarahasiê.”
Currently Selected:
ISAIA 45: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
