ISAIA 44
44
Na Araha ngaia getea ma ki God
1Na Araha ki vi: “Isiraelita, kariaku, mu karinga!
Mu rongo, kariaku hetakui, raraha iana o Jakobo.
2Inê nga na Araha kani gê hagavoragamu.
Haganega me tenia na matena mu vora me igê,
inê kê tamanigamu.
Kariaku, siana kamu magu!
Inê kê ategamu ma kê takuigamu.
3“Inê be hagasivorigi na mako avagavaga,
ma be katogi na ve, ke gogo igê.
Inê be angarira na karemi
ma be koro tangara na raraha iami.
4Ngaira ka page raharaha mangagi na go, i rangisigi,
mangagi na ao i na agua igê na ve.
5“Na ara ni hitangita na enoni ki page vivi,
‘Inê na kariana na Araha.’
Ngaira ka page râ me, ke hakunira na Isiraelita.
Na ara ni hitangita ki page segea igê na rimana
na segesegeha, i vi, ‘Inê na kariana na Araha.’”
6Na Araha ki marungia ma ki anumasia i Isiraele.
Na Araha raramohaga hunia ki vi:
“Inê geteê ma kê God.
Inê kê bani oga me igê na haganegahana.
Ma igê na hagahatungina
inê kê page gâga mênga, ki bê ki arâ.
Mareha vê vi tani getea râ nikâ.
7Ti ki maratoraku? Ngaia i he?
Ti ki girara i tanugi na marâ, gê katogi inê?
Ti ki girara ki bani hinarugi me igê na haganegahana
na marâ, ga voravora me mataro me i ngekê?
Ti ki girara i hinarugi na marâ, ga page voravora me,
haganega tenia i ngekê mataro me na hatungina?
8Kariaku, siana kamu magu!
Mu bani girara, vi inê kê bani hinarugi me
na ara ni marâ, ga bani vora me,
haganega tenia i nago kere vê noga mataro me i ngekê.
Ma igamu kamu roherohe pusiê renigi.
Ti ki maratoraku? Ngaia i he?
Ti ki raramohaga hunia manga inê?
Mu girara?
Menê nogaku kê pe girara.”
Hagaru renira na enoni ga tongesurira na ataro
9Na enoni, ga tahegi na nunuta na ataro,
ka na enoni purua ma.
Na nunuta, ga ageagesigi,
ki asa vige tamanira.
Na enoni, ga vogasigi na nununi ngegê,
ngaira ka bonobonoga ma ka hite.
Ngaira ka page maki,
suria ga hagêguri baranga renigi.
10Ti ki tahea se tagarahia na nununa na ataro
ma ki vogasia na marâ, i asa vige tamania?
11Na enoni hato, ga vogasia, ka page maki.
Na enoni, ga tahegi se tagarahigi na nunuta na ataro,
ngaira ka na enoni purua ma.
Nakara ke râ me igê na tamasinga!
Ngaira ka magu, ka page maki.
12Na mane, i tagarahia na nununa na ataro
renigi na aiani, se na golo ma na marâ vigana,
ngaia ki tavoa tagua ma ki hanua.
Ngaia ki putagia, ki voravora renia na nununa.
Nga noga ma na mane, i ramo na rimana,
kani girara i tagara vikana.
Matena i tagara, ngaia ki magê,
ki pasi tono ma ki meme na apena.
13Na mane i tahetahe, ngaia ki tangaha na apinige.
Ngaia ki segea na nununa na enoni
igê na bogona na apinige.
Ngaia ki tahetahe suria renigi na gira iana.
Ma na nununa na enoni ki rikiriki me igê.
Ki bâkoro ngavê, hanana viga naka i ruma.
14Vari ngaia ki tapia so na nuri,
se i atea na riki se na votevote i bemu.
Vari ngaia ki hasia na mauru,
ma ki naasia, vi sivoria ki akê.
15Tagua na apinige ki tahea renia na nununa,
ma tagua ki totora renigi na ario.
Tagua ki tangatanga gi renigi,
hanana i rangia, se i hagamako ngêra igê,
ma tagua ki tahea renia na ataro, ma ki vogasia.
16Tagua ki tangatanga gi renigi,
ma ki hanunu igê na ganiani,
i ngaugi ma ki masumasu renigi.
Ngaia ki hagarara, ma ki vivi:
“Aige, i mahana koro era!
Na gi koro era vê!”
17Tagua ki tahea renia na nununa na ataro,
ki bêtuhia, ki vogasia ma ki rahesia, ki vivi:
“Igo ki na harasiku.
Gu hagatahiê.”
18Na enoni, ga katokato vikana,
ngaira ka tako beka ngavê.
Ngaira ka guru ma ki bono na obata,
suria ga pe obania, vige girara na monariha.
19Na enoni, i tahea na nununa na ataro,
ngaia ki bono ngavê na bêna,
ma ki pe nahunia rârâ ta na kere takotakoha.
Manga vige mareha, ngaia ke vi hete:
“Tagua kê sungigi tange na garapa
ma kê hagamako igê na ngêra,
kê hanunu igê na ganiani ma kê ngêngê.
Tagua kê tahea renia na nununa na ataro.
Inê kê pe beka vari,
matena gê vogasia na bogona na apinige?”
20Manga vi ngaia, ma ki pe beka,
ngaia ki pe beka nikâ, matena i ngêngê na rahu!
Na takoha bekabekaga ka hagabekasia ngavê,
ma ki bara vige urisi parongana.
Ngaia ki asa ngavê tanga, vige vi:
“Bâ, na nununa na ataro kani gê taua ikê.
Ngaia ki mareha vi na ataro.
Ngaia ki na marâ purua ma.”
Na Araha ki botage tare renira na kariana
21Na Araha ki vi:
“Isiraelita, mu takusia tare,
vigamu ka na kariaku.
Inê kê hagavoragamu,
hanana mu tototo suriê tare.
I asa iaku, ve pe botage renigamu.
22Inê kê bani hagamagahurugi na tasi iami
manga na vaha i anu.
Inê kê bani vuri pusigamu.
Mu ahariê!”
23Vavearo, ngere vagevage!
Rutuni na maveta, mu ngerengere!
Mu kiki, igamu na barani, na vapuni
ma na ara ni apinige hato igê.
Na Araha ki bani hagabângenia na raramohana,
suria i hagatahira na Isiraelita na kariana.
24Na Araha ki vi:
“Inê nga ki na Araha, gê hagatahigamu.
Inê nga kani gê hagavoragamu.
Inê nga ki na Araha,
gê hagavorara na ara ni marâ hato.
Inê geteê ma kê gasia na vavearo.
Matena gê hagavora na maveta,
ti ki tamaniê?
25Inê kê katora na enoni ni hinarunga
ka voravora re na enoni ni hagaparunga.
Na tamasinga iata na enoni ni giraraha
inê kê kasigi râ, suria ga râ bekabekaga,
naka ma ngaira ka vi, viga tako mataha.
26Manga inê, ma be katoa na kariaku, ke hinahinaru,
se hagatorangenia, ke tarohenigi na katoha iaku,
inê be hagamonarigi hete
na katoha ma na hinarunga ngegana.
Inê kê hinaru,
vi na enoni ka page oga aporo i Jerusaleme.
Inê kê hinaru,
vi na enoni ka page tagarahigi aporo na hinua i Juta.
Na hinua, ga aruhuruhu i ngegana,
ka page rêra aporo.
27Inê kê tamasi ma,
ma na asi ma na ve ka mamata!
28Inê kê vi tanga o Kuro, kê vi:
‘Igo ko manareha tangara na kariaku.
Go bâbâsurira manga na avanu ni sipi.
Go arâ nga surigi na katoha iaku.
Go bonasira nga na enoni,
hanana ga tagarahia aporo Jerusaleme
ma na Ruma ni Rotu nikâ.’”
Currently Selected:
ISAIA 44: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
