ISAIA 43
43
God ki suru vi hagatahira na kariana
1Na Araha ki vi: “Isiraele, inê kê hagavoragamu.
Inê kê hagamaurigamu.
Vikê, siana kamu magu!
Inê be hagatahigamu.
Igamu ki na aniku.
2Matena mu tarêhigi na ve,
ga maganu inê be ngahisigamu,
hanana siana na bagabevoani ka susu henigamu.
Matena na gi ki rarogamu,
ki asa iami, vigamu tihu:
na mamasiaganiha ki asa, vige tarahugamu.
3Renia inê ki na Araha God iami,
na God Apuna i Isiraele, i hagatahigamu.
Inê be vuri pusigamu renia i Esipito.
Inê be urusirerua i Etiopia me Seba renigamu.
4Inê be tagarenira na enoni i na agua rako
meni na mêriha iami,
suria inê kê makuanigamu,
kê takuigamu ma kê hagahigasigamu.
5Siana kamu magu!
Inê be ngahisigamu.
“Tenia i kerekê hagatê ma tenia i kereso hagatê,
inê be torera aporo me tangagamu
na karemi ma na goami.
6Tangara na ai ni agua kereso inê be vi,
‘Nakara ke aporo!’
Ma tangara na ai ni agua kerekê inê be vi,
‘Siana kamu tê apurusira!
Nakara na kariaku ke aporo tenigi na agua hagatê,
tenigi na ara ni agua i maveta hagenani.
7Inê nga kani gê hagamarahura.
Inê nga kani gê hagavorara,
hanana ga hagarahasiê,
suria ngaira ka na tagaraha iaku.’”
Na Isiraelita ka rohe pusia na Araha
8God ki vi:
“Unira me na kariaku tanga na kotiha.
Ngaira ki tonga na maata, ma ngaira ka guru.
Ngaira ki tonga na karingata, ma ngaira ka guguruga.
9Unira me nikâ na enoni getera tanga na tamasinga.
Ti na hitangita na harasita ki girara
i hinarua ta na marâ tanga i muri me?
Ti na hitangita ki bani hinarugi me
na marâ ga vora me i ngekê?
Na ataro ngegê ke merabanu me nga
na enoni, ga roherohe pusira,
hanana ga hagatanga monari renira.
Ti na hitangita na enoni ngegana ki girara i vivi,
vi na tamasinga iata na ataro ki monari?
10“Isiraelita, igamu kamu rohe pusiê.
Inê kê ategamu, kamu vora na kariaku,
hanana mu aitangisiê ma kamu tongesuriê,
ma kamu girara, vi inê geteê ma kê God.
Na ataro ka mareha vê vi God,
mareha vê i nago, se i ngekê, se i hemuri me nikâ.
11Inê geteê ma kê Araha.
Inê geteê ma kê girara, gê hagatahigamu.
12Inê kê bani hinarugi me na marâ, ga vora me.
Ngaia kani gê hagatahigamu.
Na ataro ki bara, vige kato vikana.
Igamu nga ka na ani mu rohe pusiê.
13Inê geteê ma kê God,
ma kê God tare, ki bê ki arâ.
I asa ta na enoni, vige gavatenia na raramohaku.
I asa ta na enoni, vige urapusiê, se vige hagabarasiê.”
Na Isiraelita ka page gavatenia i Babilone
14Na God Apuna i Isiraele, i hagatahigamu, ki vi:
“Suria inê kê obania, vige hagatahigamu,
tahema inê be hagatorangenira na mane ni me,
ke meheariha i Babilone.
Inê be hogegi na maani para ni hinua,
ma na ai ni Babilone ka page ngerengere angiangi.
15Inê nga ki na Araha God Apuna iami.
Isiraelita, inê nga kani gê hagavoragamu.
Inê nga kani gê Araha iami.”
16I nago kere vê noga
na Araha ki voasia na asi, ki vora na tara,
na tara i gupuna na asi aputaputa.
17Ngaia ki hagatonomira ka me igê rako na mane ni me
ma na kati ni me ma na hosi ni me.
Ngaira ka me, ka tâ hagetage i ano.
Ngaia ki uhi mesira,
manga na kere vavatana na mangate ga hunuia.
18Ma na Araha ki vi:
“Siana kamu takusigi ma na marâ,
ga bani vora me i nago,
se vigamu tâtâ gatagata igê.
19Mu bâbâ renia hete na marâ, gê sugi katoa.
Ngaia ki vora noga.
Mu pe bâsia?
Inê be naka na tara,
ke aharêvoro igê na masusu raha,
ma be katogi na ve, ke gogo i ngekana.
20Na marâ vasiga i bemu nikâ ka page hagahigasiê.
Ma na o vasiga ma na auvê nogata,
matena gê katogi na ve, ka gogogo igê na masusu,
hanana gê hagatonomira re na kariaku hetakui.
21Ngaira nga ka na enoni, gê bani hagavorara tangê mareku,
ma ngaira ka page hagarahasiê.”
Na tasi iata na Isiraelita
22Na Araha ki vi:
“Isiraelita, igamu kamu pe rahesiê,
suria i usi na apemi reniê.
23Igamu kamu pe susu tangê renira na sipi.
Igamu kamu pe hagahigasiê ma kamu pe vogasiê.
Inê kê pe hagamarâ apemi, vigamu vogasi tangê.
Inê kê pe hagame apemi, vigamu susu tangê.
24Igamu kamu pe hagakoro obaku,
matena mu susu tangê renigi na marâ i sigini koro,
se matena mu vogasiê renigi na êbeta na puruka.
Igamu hete kani mu hagamarâ apeku inê
renigi na tasi iami.
Igamu hete kani mu hagame apeku inê
renigi na bagatarihami.
25Naka ma, ma inê nga God
gê bonotenigi na tasi iami,
hanana gê hagabângenia, vi o ti inê.
I asa iaku, ve takusigi nikâ na tasi iami.
26“Hoi, nika, ge râ igê na kotiha, ke hekarigi!
Mu tamasi igê na apanena iami!
Mu hagatanga monari renia na apanena iami!
27Na uvarimi hagenago ngaia ki tasi.
Na maneraha iami ngaira ka pe tê viteaku.
28Tahema inê kê hagaitangira
ma kê hagaerasia ngavê i Isiraele,
ma kê nakara na merongata na kariaku,
ka guharira ma ka hagamakira.”
Currently Selected:
ISAIA 43: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
