ISAIA 41
41
God ki botage renira na Isiraelita
1God ki vi:
“Igamu na agua hagatê,
mu muni! Mu karingê!
Mu nanê, hanana mu roherohe
pusia na apanena iami.
Mu aharaga, kamu tamasi.
Ge hagaotogi na marâ.
2“Ti ki katoa, ki arâ me tenia i kerekê
na maneraha ni me i teha?
Ti ki katoa, ki tehateha tare
igê na ara ni agua, i heariha igê?
Ti ki katoa, ki henahuraugi na agua?
Ti ki katoa, ki purira so i ano na maneraha?
Ngaia ki nahuira renia na tatapa borahu iana,
ka me ka tâ i ano mangagi na roro.
Ngaia ki hanasira ma ki sikirenira,
manga na roga i ahegenigi na rauga maria.
3Ngaia ki tarigenira,
ma ki ama ni arâ tatarasi nga surira.
Ngaia ki tango teha vê, manga i gaha.
4Ti ki katoa, ki vora me na tarana ngekê?
Ti kani bani nakagi me vigana
tenia na haganegahana tanga i ngekê?
Inê nga na Araha,
kê bani oga me igê na haganegahana.
Inê nga na Araha,
kê page gâga mênga i murina na hagahatungina.
5“Na enoni surigi na marê hagatê
ka bani bâsia na mane ni me ngekê i teha.
Ngaira ka magu ma ka bubununuga.
Vikê ngaira ka haku me.
6Na enoni, ga girara ga tahetahe,
ka hetamani ma ka haganganira heri.
7Na ani, i tahea na nununa na ataro,
ki hagangania na ani, i parua renia na golo.
Na ani i katoa ki mamao,
ki hagangania na ani i ratorato.
Ngaira ka vi, vi na puru ki koro ngavê.
Ngaira ka rapusia igê na atohana,
hanana siana ki apuri se i votavota.
8“Ma igamu na Isiraelita na kariaku,
igamu nga ka na ani gê bani ategamu tangê mareku,
igamu na raraha iana o Abaramo, na kariaku koro.
9Inê kê bani toregamu
tenigi na agua hagatê era i maveta.
Inê kê bani unigamu me
tenigi na hinua hagatê ngavê i maveta.
Inê kê visigamu, vi igamu nga ka na kariaku.
Inê kê pe bani kitenigamu,
ma kê ategamu hete.
10Siana kamu magu!
Inê kê ngahisigamu.
Inê nga ki na God iami.
Siana kamu magutenia ta na marâ.
Inê be hagaramonigamu ma be tamanigamu.
Inê be anumasigamu ma be hagatahigamu.
11“Bâ, na ani ga mangariaga tangagamu
inê be teharira ma be hagamakira.
Na ani, ga megamu heariha, ka page meme,
12ma ka page magahuru tenia na maveta.
Naka ma mu garira, ki asa, vigamu page tarahura.
13Inê nga ki na Araha God iami.
Inê kê hagaramonigamu, ma kê vi,
‘Siana kamu magu!
Inê be tamanigamu.’”
14Na Araha ki vi:
“Igamu na Isiraelita,
naka ma mu pe rako
ma kamu pe ramo manga na ngêngêrio,
siana kamu magu!
Inê kê tamanigamu.
Inê, God Apuna i Isiraele,
inê nga kani gê hagatahigamu.
15Inê be katogamu, kamu manga na kêke,
na ani haoru i masi na rivona.
Igamu kamu page garasigi na barani, ka amenamena
ma kamu page katogi na hungani ka maromoromo.
16Igamu kamu page kasikasi akê
ma na roga ki page rogatenigi râ,
ma na maguara ki page ahegenigi vê.
Igamu kamu page vagevagesiê, inê na Araha,
ma kamu page hagarahasiê
inê God Apuna i Isiraele.
17“Matena na kariaku, ga matareha ma ki bara tangara,
ka mamata na riota ma ka pe tarahua na ve,
inê na Araha be aganarigi na avarasiha iata.
Inê na God i Isiraele ki asa, ve page panira.
18Inê be nakagi na ve, ke gogo igê na barani ma na hungani,
ma na ve banga ke pusu igê na maruguni.
Inê be katoa na masusu avagavaga ke ranoranoga,
ma igê na mako bêratega ke vora me igê na ve banga.
19Igê na bagamanihê raha inê be hagavakarigi igê na apinige,
na ani raha, na ani sisite, ma na apinige ni ngêra.
Igê na bena mamao inê be hagavakarigi igê
na ani ma vê na apinige, ka voravora re na vapuni.
20Na enoni ka page rigia na tarana ngekê,
ma ka page girara, vi inê nga na Araha
kani gê kato vikana.
Ngaira ka page tahetara reniê,
vi inê nga God Apuna i Isiraele
kani gê katogi ngegana.”
God ki hagahagatera na ataro
21God na Araha iata na Isiraelita ki vi:
“Igamu na harasita na enoni getera
mu tamasi igê na apanena iami.
Mu roherohe pusia,
hanana mu hagatanga monari renia.
22Râ me kamu tamasia na hinarunga iami,
hanana igami kami girara na matena ta
ki page voravora me igê.
Mu ramatenigi tangagami na tarani,
ga bani vora me i nago,
ma kamu visigi me na girarani.
23Mu hagarongogami renigi na ta
ka page voravora me i muri me,
hanana mi girara, vi igamu ka na ataro monari.
Mu katogi na mena, na ani koro se na ani era,
hanana mi konekone ma kami bubununuga renigi.
24Bâ, igamu ka na marâ purua ma,
ma ki mareha makoko vê,
vigamu hagavoregi ta na marâ!
Ma na enoni, ga hagarapegamu,
ka paronga iera ngavê,
suria ga vogasigamu igamu.
25“Inê kê bani atea tani na mane i kerekê,
ki page rahesiê.
Ngaia ki bani râ me noga.
Inê kê naka, hanana i meraheariha na maneraha.
Ngaia ki purira so manga na makomako,
manga na mane, i tagarahigi na pi na hê,
i purigi na makuni na mako.
26Hoi, ti na hitangimi i hinarua na tarana ngekê,
hanana igami kami girara i ngekê,
vi na hinarunga iami ki monari?
Mareha rârâ na hitangimi, vige tamasia.
Mareha rârâ ta na enoni, vige rongogamu, mu visia.
27Inê, na Araha, inê nga kê hagenago,
kê hagarongoa Sione renia.
Inê nga kani gê hagaguhia na mane tora tamasinga
tanga i Jerusaleme henia na taroha koro, i vi,
‘Na kariamu ka sugi aporo me noga.’
28Inê kê bâ tatarê renira na ataro.
Ma ki mareha ngavê na hitangita,
vige ruhea na harana.
Mareha tani vige aramiê rârâ.
29E, ngaira ka na marâ purua ma!
Ngaira ka pe hagavorea rârâ ta na marâ.
Na nunuta ka na rogaroga purua ma
ma na guruni purua ma.”
Currently Selected:
ISAIA 41: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
