ISAIA 40
40
Na tamasinga ni haganunuha
1God ki vi:
“Kanukanura na kariaku! Kanukanura!
2Haganaku parongata aporo na ai ni Jerusaleme.
Hagarongora, vi na mamasiaganiha iata ki hato,
ma na tasi iata inê kê bani bonotenigi.
Na ara ni hagaitangiha ki hato,
suria ngaira ka kasi meni renigi na tasi iata hatohato.
3Ta na ngerengereha, i vi:
“Rikia na tara igê na masusu tanga na Araha!
Hagarêa na tara igê na bagamanihê raha tanga God iaka.
4Ahunigi na ara ni maruguni hato.
Hagahataragi na ara ni hungani ma na barani.
Na hungani ka page benaga.
Na tara sutasutaga ka page manamanaga.
5Na Araha ki page vora me
igê na bâbâhana ma na raramohana raha.
Na enoni hato i maveta ka page bâsia.
Ngaia marena na Araha kani visia.”
6Ta na ngerengereha, i vi:
“Tarohenia na taroha!”
Inê kê hagate, kê vi: “Na taroha ta?”
“Gu tarohenia,
vi na enoni hatohato ga mangagi na go.
Na bâkorohata ka mangagi na takani na mahe,
ka maugu rêrê.
7Na go ka marama,
ma na takani na mahe ka maugu,
matena na Araha ki raravaigi.
I monari, na enoni ka mangagi na go.
8Ua, na go ka marama
ma na takani na mahe ka maugu.
Nga noga ma na tamasinga iana na Araha
ki asa hagetage, vige page hato.”
9Tagere igê na barana,
ma ko tarohenia igê na taroha koro tanga i Jerusaleme.
Ngerengere raha,
ma ko tarohenia na taroha koro tanga i Sione.
Tamasi raha! Siana ko magu!
Hagarongogi na hinua i Juta, ko vivi:
“Bâ, God iami ki râ me noga!”
10Bâ, na Araha God ki râ me noga.
Ngaia ki hahaneaga ma ki raramohaga teha ngavê.
Ngaia ki torera me na enoni,
i bani hagatahira tenia i Babilonia.
11Ngaia ki page marupera na kariana,
manga na mane i marupera na sipi iana.
Ngaia ki page rurura haku me na kareta na sipi,
ma ki page topera i rimana,
ma ki page hagaotora maninga kenata.
Ti ki maratorana God?
12Ti ki girara i apea na asi hagenani
i na ababa ni rimana?
Ti ki girara i kikihua na vavearo?
Ti ki girara i naka na maveta hagenani
i rarona na kâkâ?
Ti ki giraragi na higahigani na barani ma na hungani?
13Ti ki girara i hagaotoa na Araha?
Ti ki girara i hagesuria se ramatenia na Araha?
14Ti ki girara i hagamaraka obana na Araha?
Ti ki girara i hagesuria renigi na tarani ga oto?
Ti ki girara i vatea renia na giraraha?
Ti ki hagagirara renia na takoha mataha?
15Tanga na Araha na enoni hato i maveta
ka manga na marâ purua ma,
manga na êsusu gi tage na ve.
Tanga ngaia na agua raha
ka manga na akuhukuhu ma.
16Na ara ni marâ hato,
ga mauri igê na vapuni i Libanone,
ma na ario hato igê
ka pe araria, vige susu tanga God renigi.
17Na enoni i maveta ka manga na marâ purua ma tanga.
18Ti ki girara i hagararia marena renia God?
Ti ki girara manga i he God ki bâ?
19Ngaia ki pe manga na nununa na ataro,
na enoni ga tagarahia renia na golo,
se ka hagamahea renia na siliva.
20Na enoni matareha ki atea na apinige na bagora
ma ki garia ta na enoni, i girara i tahetahe,
ma ki nungia ki tahea renia na nununa na ataro,
i pe girara, vige apuri.
21Igamu kamu pe girara vari?
Igamu kamu pe hagare vari?
Ga pe bani hagarongogamu vari
renia na haganegahana?
Igamu kamu pe bani rongo vari,
vi manga i he na maveta ki haganega?
22Na ani, i oga igê na atohana,
teharirerua na vavearo ma na ano,
ngaia nga ka na ani i hagavora na maveta.
Na enoni i ano ka tarotaromega mangara na sisi.
Ngaia ki gasia na vavearo manga na gahu,
manga na ruma na gahu ga âga igê.
23Ngaia ki hagavotarira na maneraha, ga raramohaga,
ma ki katora ka manga na enoni purua.
24Ngaira ka mangagi na rauga, ga ririki
ma ka pe vagavagaraga bâkoro.
Manga na Araha, ma ki raravaigi,
ngaigi ki marama,
ma na maguara ki ahegenigi râ.
25Ti ki manga God Apuna?
Ti ki maratorana?
26Mu bâ kê i vavearo!
Ti ki hagavoragi na higu mu bâsigi?
Na ani, i hagaotogi manga na maneraha ni me,
ngaia nga ki girara, vi gi hita kani ngaigi,
ma ki girara na atana na ara ni hitangini.
Na raramohana ki raha teha!
Ngaia ki unigi,
ma ki asa vige bâ tihia tani.
27Isiraelita, renia ta mu hagagege, kamu vi,
vi na Araha ki pe hagaregi na mamasiaganiha iami,
se i pe botage renigi na marâ, ga oto tangagamu?
28Mu pe girara vari?
Mu pe rongo vari?
Na Araha ngaia ki na God,
i gâga tare nga, ki bê ki arâ.
Ngaia ki hagavora na maveta hagenani.
I asa iana, vige me na apena, se vige marumarusiga.
Mareha ta na enoni, vige aitangisigi na mangatana.
29Ngaia ki hagaramonira hete na ani,
ga marumarusiga ma ka mameaga.
30Naka ma na ani na gapu haoru,
ngaira nogata ka girara ga marumarusiga ma ka bagameme.
31Ma na ani, ga hagêguri togo renia na Araha
ma ka avarasia,
ngaira ka page ramoramo aporo.
Ngaira ka ama ni gagêmaga nga,
mangara na ahetaronga ga aheahe.
Ngaira ka tangotango,
ma ki asa vige mangumangusiga.
Ngaira ka arârâ, ma ki asa vige beto.
Currently Selected:
ISAIA 40: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
