ISAIA 37
37
O Hesekia ki rongo tarana i pasina o Isaia
(2 Maneraha 19.1-7)
1Matena o Hesekia ki rongora, ga hagarongoa, ngaia ki tarisia râ na tuguni iana, suria i hata era na obana. Ngaia ki hagesuru renigi na tarisigani na gahu, ma ki banu igê na Ruma ni Rotu iana na Araha. 2Ngaia ki hagaguhira o Eliakimo, i bâsuria na ruma iana, mo Sebena na mane segesege igê na kotiha, ma na bani mane ni hagarahenga tanga na poropete o Isaia, karena o Amose. Ngaira hato ka hagesuru renigi na tarisigani na gahu. 3Ngaira ka vi vikê tanga o Isaia, ka vi: “O Hesekia ki vi, ‘I ngekê ki na matena ni mamasiaganiha, ni hagaitangiha ma ni makiha. Igami kami manga na gete i riki na gerina ma ki bara vige apara, suria i pe ramo na apena. 4Na maneraha teha i Asiria ki hagatorangenia na maneraha ni me iana, hanana i tamasi erasia God mamauri. I arari ma, vi na Araha God iamu ke rongogi na guhata ngegê, ma ke hagaitangira renigi na ani ga tamasi vigana. Tahema gu nungia God tangagami na ani mi tahitahi mêngagami.’”
5Matena o Isaia ki rongoa na tamasinga iana na maneraha o Hesekia, ga torea me na kariana, 6ngaia ki vi tangara, ki vi: “Mu hagarongoa o Hesekia, vi na Araha ki vi, ‘Siana ko magutenigi na tamasinga iana na maneraha teha i Asiria, i vi, vi i asa iaku, ve hagatahigo. 7Bâ, inê be katoa, ke tongesuria ta na rongoha, hanana ngaia ki page aporo i pasina, ma ka page nahuia igê ki meme.’”
Na ai ni Asiria ka haganunua nikâ i Jerusaleme
(2 Maneraha 19.8-19)
8Na maneraha ni me ki rongoa, vi na maneraha teha i Asiria ki bani pania i Lagisi, ma ki meheariha na hinua i Libena i ngekana. Vikê ngaia ki râ i ngekana, hanana i rongo tarana i pasina. 9Na ai ni Asiria ka rongo, vi o Tirihaka, i marungia i Etiopia, ki bêngenira na mane ni me i Esipito, hanana viga meraheariha. Matena na maneraha teha i Asiria ki rongo vikana, ngaia ki hagatorangenia na tamasinga tanga o Hesekia, na maneraha i Juta. 10Ngaia ki vi tanga o Hesekia, ki vi: “Siana ko tongesuria na ataro, go hagarapea. Ngaia ki hagabekasigo, ki vi, vi na maneraha teha i Asiria ki bara, vige henahuraua i Jerusaleme. 11Bâ, igo ko bani girara na tarana, i katoa na maneraha teha i Asiria tanga na ani ma vê na agua, i obania vi hagasuhia. Go takusia vari, vi igo ko girara go tahitahi tenia? 12Na uvariku ka bani hagasuhigi na hinua i Gasani, i Harani ma i Resepe, ma ka bani mutera na ai ni Beteteni, ga oga i Telasare. Ma na harasita ki asa, vige hagatahira. 13I he ngaira nga na maneraha surigi na hinua i Hamata, i Arapata, i Vepavaimi, i Hena ma i Iva?”
14O Hesekia ki tavoa na leta tenira na mane tora tamasinga, ma ki tomania. Ma hemuri ngaia ki râ i Ruma ni Rotu, ma ki naka na leta i maana na Araha. 15Ngaia ki nunginungi, ki vi: 16“Araha raramohaga hunigo, God iata na Isiraelita, igo ko oga bê vato renira na ani ga tonga gagahata. Igo getego ma ko God. Igo getego ma ko Araha tangara na maneraha hato i maveta. Igo ko hagavorarerua na vavearo ma na ano. 17Araha, gu karinga, ma ku aganarigami. Araha, gu bâsigi na tarani ga tarahugami. Gu takusigi na tamasinga iana o Senagaribi, i guharigo renigi. Igo nga nga na God mamauri. 18I monari, Araha, na maneraha teha i Asiria ka bani mutera rako na enoni igê na agua getigi, ma ka bani hagasuhigi na agua ngegana. 19Ngaira ka bani sungigi na nunuta na harasita. Ngaira ka mareha vi na ataro. Ngaira ka na apinige ma na hê purua ma, ga tagarahigi. Tahema i pe bara, vige sungigi. 20Vikê, Araha God iamami, gu hagatahigami tenira na ai ni Asiria, hanana na enoni hato i maveta ka page girara, vi igo getego ma ko God.”
Na tamasinga iana o Isaia tanga o Hesekia
(2 Maneraha 19.20-37)
21Ma hemuri o Isaia ki kasia na tamasinga tanga na maneraha o Hesekia, ki vi: “Na Araha God iata na Isiraelita ki vi, ‘Igo ko avarasiê, vigê rêra pusia o Senagaribi, na maneraha teha i Asiria.’ 22Ikê nga na aramiha iaku:
“Jerusaleme ki ruhigo, ki rurusigo,
ma ki manavatenigo, suria go gava.
23“Go takusia vi o ti kanigo tamasi erasia?
Go takusia vi o ti kanigo guharia ma ko ruhia?
Igo ko guhariê, inê na God apuna teha ngavê,
na Araha raramohaga huniê iata na Isiraelita.
24Na tamasinga iamu, ga torea me na kariamu,
igo ko tamasi paroparo, ko vi,
‘Henigi na kati ni me iaku
inê kê tagere igê na barani i Libanone.
Inê kê tapigi so na apinige igê,
na ani ga borahu ma ka koro ngavê.
Inê kê arâ hagatê ngavê i toro.
25Inê kê oparigi na ve karu ma kê totono igê.
Inê kê puria râ na ve i Esipito
ma ngaia ki mamata ngavê.
26“Hoi, Senagaribi, i hega?
Igo ko pe bani girara vari,
vi inê kê bani kato renigi na tarani ngegê
i nago kere vê noga?
I ngekê inê kê akê me henigi.
Inê kê hagamarumungenigo,
hanana go ruhuruhugi na hinua nganganihaga.
27Na enoni igê ki bara tangara.
Ngaira ka bubununuga ma ka tugupu ngavê.
Ngaira ka mangagi na go i mu,
se na rauga, ga akê i gerina na ruma,
ma ka maria, matena igê na arito ru.
28“ ‘Inê kê girara erasigo ngavê,
naka ma na marâ go katogi,
naka ma i he ko arâ igê,
naka ma go mangariaga ma ko guhariê.
29Suria igo ko tamasi erasiê ngavê
ma ko paroparo bâraha,
tahema inê be naka na ringi i barisumu
ma be barogo manga na hosi,
ma be oke paririgo aporo
tanga na agua go râ me igê.’”
30Mo Isaia ki vi tanga o Hesekia na maneraha, ki vi: “Ikê nga na girarana na tarana, i page voravora me. I na harisi ngekê ma i na ani i muri me igamu kamu page ngêngê ma na marâ, ga akê mareni i bemu. Ma na harisi i muri vê igamu kamu kahu hasihasi ma kamu kahu opaopa, ma kamu kahu ngaugi na vaini, mu hasigi. 31Na ai ni Juta, ga tahitahi mêngara ka page mangagi na apinige ni ngêra, ga vagavagaraga bâkoro ma ka hunguhungu. 32Renia na enoni, ga tahitahi mêngara, ka page tataka tenia i Jerusaleme, tenia na hungana i Sione. Na Araha raramohaga hunia ki togeaga, hanana i voravora me na tarana ngekana.”
33Tahema na Araha ki vi: “Na maneraha teha i Asiria ki asa, vige page henahuraua na hinua ikê, se vige page hanasia renia na apena gi tage ma na mage. Na mane ni me ki asa hagetage, vige page kari me hagarangia na hinua henigi na bêata iata. Ki asa iata, vige page rapia. 34Ngaia ki page aporo suri ugana, ma ki asa vige page henahuraua na hinua ikê. Ngaia kani gê visia, inê na Araha. 35Inê kê page roherohe pusia na hinua ikê, ma kê page anumasia, hanana gê hagabângenia na raramohaku ma kê hagamonaria na suruha iaku tanga o Tavite na kariaku.”
36Na angero iana na Araha ki banu igê na tênga iata na ai ni Asiria, ma ki nahuira ka me na mane ni me 185, 000. Matena i tangi mahogo, ngaira ka me hagetage ma ka tâ totoko na gahuata. 37Ma hemuri o Senagaribi, na maneraha teha i Asiria, ki apariri aporo tanga i Nineve.
38Ta na tangiana ngaia ki vogasi igê na ngêsu tanga na Nisirogo na harasina. O karena gi rua o Atarameleki mo Saresere karu nahuia ki me renigi na tatapa borahu iaterua, ma hemuri karu gava tanga na marê i Ararata. O Esahatone, tani o karena, ki urusia ki maneraha teha.
Currently Selected:
ISAIA 37: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
