ISAIA 38
38
O Hesekia ki maeha ma ki komaga aporo
(2 Maneraha 20.1-11; 2 Sihonga 32.24-26)
1Igê na matena ngekana nikâ o Hesekia ki maeha ma ki haga ni me. Na poropete o Isaia, karena o Amose, ki râ ki vatugia, ma ki vi tanga, ki vi: “Na Araha ki obanigo, vigo hagaotogi na ara ni marâ, suria igo ko sugi meme noga. I asa vigu page komaga aporo. Hoi, gu nanê.”
2O Hesekia ki ahoro râ i na apê ma ki nungia na Araha, ki vi: 3“Araha, bâ, inê kê toto surigo tare i mêrihaku hagenani. Inê kê aganarigi tare na marâ, go bonasiê renigi.” Ma ki nahuia na angiha.
4Ma hemuri na Araha ki bonasia o Isaia, ki vi: 5“Gu aporo i pasina o Hesekia, ma ko vi tanga, ko vivi, ‘Inê, na Araha, na God i rahesia na êvarimu o Tavite, inê kê rongoa na nunginungiha iamu, ma kê bâsigi na tavoni na maamu. Igo ki asa gu me i ngekê. Inê kê naka akê nikâ tangago na harisi tangahuru matare rima. 6Inê be hagatahigo, igo ma na hinua ikê Jerusaleme tenia na maneraha teha i Asiria, ma be ama ni anumasia nga na hinua.’”
21O Isaia ki vi tanga o Hesekia na maneraha, ki aba na mamanuha iana renia na meresini, ga tagarahia renigi na guani na fiki, ma ki kahu komaga aporo. 22Mo Hesekia na maneraha ki hagatea, ki vi: “Na girarana ta na Araha ki page vateê renia, hanana gê girara, vigê komaga aporo ma kê page arâ nikâ kê rotu?”
7O Isaia ki arami, ki vi: “Na Araha ki page vatego renia na girarana, hanana i hagagirarago, vi ngaia ki page hagamonaria na suruha iana tangago. 8Hoi, matena go akê suria na tara, i tagarahia na maneraha o Agasi, na Araha ki page katoa na nununa na kere matena na apinige ni pepe ni rito igê na manurahi, ki bâbâ manga na nununa na kere matena na apinige ni pepe ni rito igê na ritovagana.”
Na ki iana o Hesekia
9Matena o Hesekia na maneraha i Juta ki komaga aporo tenia na mera iana, ngaia ki segea na ki ikê:
10Inê kê takusia ma,
vi inê kê meme vurusia na mêriha iaku.
Inê kê takusia ma,
vi inê kê arâ i pasita na enoni, ga bani me.
Inê kê vi ma,
vi i kere arege râ na mêriha iaku.
11Inê kê vi ma,
vi i asa ve bâsia nikâ na Araha i maveta ikê.
Inê kê vi ma,
vi i asa ve bâsia nikâ ta na enoni i maveta ikê.
12Inê kê vi ma,
vi na mêriha iaku ka hatungia makoko vê,
manga na bana ga rumia,
se manga na gahu ga retea tenia na rupina.
Inê kê takusia ma,
vi God ki hatungia ngavê na mêriha iaku.
13Igê na bungiani inê kê angiangi ma kê gegege.
I harahara ngavê na apeku,
i hata manga vi na laione ki kurukurugi na suriku.
Inê kê takusia ma,
vi God ki hatungia ngavê na mêriha iaku.
14Na ringeku ki rongo marumu manga na gapagapêsu.
Inê angi kê mumu manga na kuvê.
Garu hara na maaku,
suria gê ata akê, kê avaravara.
Araha, gu hagatahiê
tenigi na mamasiaganiha ma na anumanumaha iaku.
15Ma na ta be visia?
Na Araha kani vi tangê vikana.
Ma ngaia ki kato vikana.
I asa ve mêru,
suria gê hata era ngavê.
16Araha, na mêriha iaku ki tangago, igo getego.
Gu hagakomagê ma ku hagamêriê.
17Na hataerana iaku ke vora na apekoroha tangê.
Igo ko hagatahia na mêrihaku tenia na mera.
Igo ko bonotenigi na tasi iaku hato.
18I asa ta na enoni i me, vige hagarahasigo.
Na enoni ga me ki asa, vige tako togo
renia na totosurihamu.
19Na enoni ga mauri hete kaniga hagarahasigo,
manga inê, gê hagarahasigo i ngekê.
Na enani kare ka hagagirarara na kareta
renia na totosurihamu.
20Araha, igo ko bani hagakomagê.
Igami kami page tarugigi na gita
ma kami page kirigo.
Igami kami page kiki kami hagarahasigo
igê na Ruma ni Rotu iamu
surigi na mêrihamami hagenani.
Currently Selected:
ISAIA 38: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
