ISAIA 32
32
Na maneraha i koro
1Ta na tangiana ki page oga na maneraha,
i page marungira na kariana igê na otoha.
Ma na enoni raha igê na gavumane
ka page kato vikana nogata.
2Na ara ni hitangita ki page manga na mamaruku
pusigi na roga ma na tangi era.
Ngaira ka page mangagi na ve oto,
ga gogogo igê na masusu avagavaga,
manga na mamarugana na hê raha
igê na bagamanihê raha.
3Ngaira ka pe tê pusigi na maata,
se vige bunigi na karingata,
suria ga obania viga giraragi
na ta ka visigi na enoni.
4Ngaira ki hato, vige page tê hurahura,
ma ka hahutugigi i nago hete,
ma ka pe bubuhigi pinihi na marâ.
5Na enoni, i bonobonoga, ki hato,
vige visia, vi ngaia ki tako mataha.
Na enoni ni hagaparunga ki hato,
vige visia vi ngaia ki tamasi monari.
6Na enoni bonobonoga ki tamasi bekabekaga ma,
ma ki takusigi ma na tarani, ga era.
Ngaia ki guguruga tanga na Araha
ma ki tamasi erasia.
I asa iana, vige hagangêra na enoni, ga magê,
se vige hagatonomira na ani, i mamata na riota.
7Na enoni ni hagaparunga ki erataga
ma ki katogi na katoha era.
Ngaia ki harikato renira na enoni matareha,
ma ki hagahagaparura ma ki hagabarasira,
hanana siana ka tarahugi na tarani, ga oto tangara.
8Ma na enoni koro, i tako mataha,
ngaia ki koro ma ki oto na parongana
ma ki nganganihaga tare igê na otoha.
Na hagaitangiha ma na hagakoroha
9Igamu na gete mu oga suri barisumi,
mu karingê!
Igamu na gete haoru mu tako bare,
mu rongoê!
10I ngekê vari igamu kamu pe hinahinaru.
Na ararina i ngekê i na harisi haoru
igamu kamu page tugupu ngavê,
suria ga mareha na guani na vaini,
hanana vigamu husihusi.
11Igamu na gete mu oga suri barisumi
ma kamu tako bare ma,
mu tatata ma kamu bubununuga.
Mu tasigi râ na gahu koro iami,
ma kamu hagesuru renigi na tarasigani.
12Mu apeape ruruhi,
suria na mu igê na mako koro
ma na pariki ni vaini ka era ngavê.
13Na tone ma na rauga era karu rubuhigi
na mako hagenani iata na kariaku.
Mu angisigi na hinua ma na ruma,
ga magahuru henira na enoni, ga obakoro igê.
14Na ruma raha iana na maneraha ki page baguru,
ma na hinua raha ki page hihiruga ngavê.
Na bebetehe ma na ruma nganganihaga ka page aruhuruhu.
Na tonki vasiga ka page oga igê,
ma na totoha ni sipi ka page ngêngê igê.
15Ma God ki page angarigia aporo.
Na mako era ki page vora re na mako koro,
ma na mu ka page ganora ngavê.
16Surigi na ara ni hinua hato,
naka ma na ani raha se sisite,
na enoni igê ka page paronga koro ma ka otooto
ma ka page nganganihaga igê na otoha.
17Tahema na marapeha ma na ramana
karu page gâga nga, ki bê ki arâ.
18-20Na kariana God ki hato, vige page anumanuma,
ma ka page apeape haritagi ma ka page asitatara hete.
Ngaira hato na enoni ka page obakoro,
suria na rangi ki katogi na mu,
ka ganora bâkoro ngavê,
ma na go ka aharêsira na tonki ma na puruka.
Ma na rangi anumaga ma na rogaroga ahuru
ka page hagaerasia ngavê na mu iata na merongata,
ma na hinua iata ki page aruhuruhu ngavê.
Currently Selected:
ISAIA 32: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
