ISAIA 33
33
Nungi ni avarasiha
1I page era ngavê tangara na merongaka.
Ngaira ka banga ma ka hagahagaparu,
naka ma i mareha ta na enoni,
vige hanago tenira se hagaparura.
Ma ki page hato na matena
ni hanagoha ma ni hagaparunga iata,
ma na tarani ngegana ka page apariri bê aporo me
tangara mareta hete.
2Araha, gu takuigami.
Igami kami raruni togo renigo.
Gu anumasigami i na ara ni tangiani,
ma ku hagatahigami tenigi na bagabevoani.
3Matena go ramo pusigami igê na hearihatana,
na merongamami ka gava.
4Na enoni ka henahuraugi na nahuninga iata
manga na ruruha ni pê ga hagavato tangagi na mu
ma ka sinogi vê na ara ni mu hato.
5Na Araha ki raramohaga hunia.
Ngaia ki marungira na ara ni marâ hato.
Ngaia ki page katora na ai ni Jerusaleme,
ka paronga koro ma ka otooto i maana,
ma ka nganganihaga igê na otoha,
6ma ka gâga igê na ramana.
Ngaia ki page anumasira tare na kariana
ma ki page vatera renigi na takoha mataha ma na giraraha.
Na tarana i raha ngavê tangara
ki na hagahigasiana na Araha.
7Na mane ramo ka avaravara.
Na enoni, ga tarohenia na komaniha,
ka angiangi bâraha.
8Na tara raha ka hagamamakuku
ma na enoni ka magutenigi.
Na enoni ka pe hagamonarigi
na suruheri ma na suruha iata.
I bâ manga na enoni ki na marâ purua ma.
9Na mu ka tâ purua ma ka pe ganora.
Na vapuni i Libanone ka maria.
Na maruguna ni mako koro i Sarone
ki bâ manga na masusu avagavaga.
Na apinige i Basani ma igê na hungana i Karamele
ka turi tanga ga maria.
Na Araha ki haganunura na merongana
10Na Araha ki vi tangara na merongana, ki vi:
“Hoi, i ngekê nga! I mareha ve hagarihu!
Inê be hagabângenia tangagamu,
vi inê kê raramohaga teha.
11Igamu kamu katogi na katoha purua ma,
ma kamu hagavoregi ma na roro.
Na raramohaku ki manga na gi, i page ngaugamu.
12Igamu kamu manga na ahu,
ga sungia ki makahukahu,
se mangagi na tone,
ga retegi ma ka sungigi.
13Igamu na merongaku igê na agua,
na ani hagarangi se hagatê,
mu giraragi na tauhaku,
ma kamu aitangisiê,
vi inê kê raramohaga huniê.”
14Na enoni i Sione, ga erataga,
ka magutenia God ma ka bubununuga, ka vi:
“God ki manga na anguruna na gi, i tarê tare.
Ti na hitangika ki girara, i tahitahi tenia?”
15Na enoni, i paronga koro ma ki otooto
ma ki tamasi monari tare,
ngaia kani girara i tahitahi.
Siana kamu hagabekasira na enoni matareha.
Siana kamu aganarigi na vatevate,
se na haga renigi ta na tarani era getegi.
Siana kamu hakunira na ani ga harikato,
viga nahunahu enoni, se renigi na eraha getigi.
16Vikana igamu kamu page tahitahi.
Igamu kamu page asitatara
manga vi igamu gâga igê na ruma nganganihaga ngavê.
I asa vige page hato tenigamu na ngêra ma na ve.
Na matena koro i muri me
17Ta na tangiana igamu kamu page bâsia igê nikâ
na maneraha, i raramohaga ma ki hahaneaga,
ma ki marungia na agua, i raha teha ngavê.
18Igamu kamu page takusira aporo na enoni,
ga bani hagamagusigamu i nago, ma kamu vivi:
“I he nga na enoni ga totora takesi tenigia?
I he nga na merongaka ga hahutugigia pinihi?”
19I hato, vigamu page bâsira nikâ na ai mahuara,
ga ruhigamu ma ka tamasi igê na tamasinga,
mu pe giraragi ma ki râ getegi.
20Mu bâsia i Sione.
Ngaia ki na hinua mu hakuhaku tare igê
tange na tangiani raha ni rotu.
Mu rigia i Jerusaleme.
Ngaia ki na hinua i oga suri parongana,
hanana viga gâga igê.
Ngaia ki manga na ruma,
i nganganihaga ma ki gâga tare.
Na u i asa hagetage, vige page kakaga.
Ki asa hagetage, vige page ahari na gerina.
21I ngekana na Araha ki page hagabâsigia igê
renia na raramohana raha.
I Sione, na hinua iaka,
ki oga igê na papani na ve,
na ani raha ma na ani sisite.
Na haka ni me iata na merongaka
ki bara vige râ me igê.
22-23Na varo hato igê na haka ngegana ka gugubaga,
ma ki bara vige oke gagasigi na selo.
Igia ka page tonganigi na nahuninga
ma na ruruguha hato iata na merongaka.
Na ruruguha ma na nahuninga ngegana ka upuga teha ngavê.
Naka ma na enoni, i abogo ma ki atata i hemuri,
ngaia ki girara i torea na apanena iana, i araria.
Na Araha ngaia marena ki page hagaotogia,
ma ki page marungigia ma ki page anumasigia.
24Ma ki hato vige page maeha nikâ
ta na enoni i pasika.
Ma God ki page bonotenigi
na tasi hato iata na enoni i ngekana.
Currently Selected:
ISAIA 33: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
