ISAIA 31
31
God ki page anumasia i Jerusaleme
1I page era ngavê tangara na enoni,
ga avarasira na ai ni Esipito.
Ngaira ka tako togo renira na mane ni me ni Esipito,
suria viga rako na hosi ma na kati ni me iata,
ma na mane ni me iata ka raramohaga.
Ma ngaira ka pe hagêguri togo hete
renia na Araha God iata na Isiraelita,
i apuna teha ngavê,
ma nikâ ga pe avarasia.
2Ngaia ki tako mataha.
Ngaia ki page hagaitangira.
Ngaia ki page hagamonarigi na haganunuha iana.
Ngaia ki page hagaitangira na enoni era henira na tamata.
3Na ai ni Esipito ka na enoni purua ma.
Mareha vige God!
Na hosi iata ka mareha vi na ataro!
Matena na Araha ki taharira,
ngaira ma na tamata ka page tariahehu,
ma ka page votavota.
Ma ngaira tagenata ka mutemute.
4Na Araha ki tamasi tangê, ki vi:
“Naka ma na mane ga bâsuri sipi
ka heave ma ka ngerengere,
ki asa vige page gava na laione
tenia na sipi i ngasia.
I tagenana ma tangê inê, na Araha raramohaga huniê.
Inê be ama ni anumasia nga na hungana i Sione.
Ma ki asa ngavê ta na marâ, vige page hagabarasiê.
5Na manu ki ramoramo pusira na karena.
Tagenana ma inê na Araha raramohaga huniê
be ramoramo pusia i Jerusaleme,
ma be hagatahira ma be anumasira.”
6God ki vi:
“Ai ni Isiraele, igamu kamu tasi bâraha nga,
suria mu murisigeê.
Mu ahariê!
7I râ me noga na matena
mu page kasikasi igê na nunuta na ataro,
mu tagarahigi renigi na siliva ma na golo,
ma ka hagatasigamu.
8Asiria ki page hato hagetage renia na hearihatana,
ma ki mareha vi renia na raramohata na enoni.
Na ai ni Asiria ka page kokoke
ma ka page gavagava tenia na henahuita.
Ma na mane na gapu haoru
ka page voravora re na kare vurivuri.
9Na maneraha teha iata ki page bubununuga
ma ki page gavagava,
ma na maneraha iata na mane ni me
ka page magu ngavê ma ka page gavagava
panigi na tangaruha iata.”
Ngaia kani visia na Araha,
ga rahesia i Jerusaleme,
ga vogasia ma ka susu tanga igê.
Currently Selected:
ISAIA 31: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
