ISAIA 30
30
Siana kamu raruni togo renia i Esipito
1Na Araha ki vi:
“I page era ngavê tangara na enoni raha i Juta,
suria ga guguruga bâraha tangê.
Ngaira ka râ surigi na katoha,
ga mareha vi na aniku inê.
Ngaira ka suru henia i Esipito.
Na tarana ngekê inê kê usutenia.
Ngaira ka ama ni tasi bâraha ngavê.
2Ngaira ka râ i Esipito, ka nungia na hetamaniha,
ma ka pe rongoê i nago inê.
Ngaira ka obania, vi i Esipito vi anumasira.
Tahema ga raruni togo renia na maneraha i Esipito.
3Ma ngaira ka page raruni era renia,
suria na maneraha i Esipito ki bara, vige anumasira.
Ma ngaira ka page maki ngavê renia.
4Naka ma na mane tora tamasinga iata
ka bani ata i Esipito, i hinua i Soane me Ganesi,
5na ai ni Juta ka page tako hemuri,
suria ngaira ka tako togo renira na ai ni Esipito,
renia i asa, vige hagamonarigi na tamasinga iata.
Tahema ki asa, vige tamanira,
suria ga hagahagaparu tare,
ma na ai ni Juta ka page maki ngavê.”
6God ki vi:
“Na mane tora tamasinga ka ri i Negeve,
na bagamasusu raha, i sutaga ma ki hagamamagura,
na agua ga oga igê na laione ma na ma gara hunu,
ma na hua raha ga gaha.
Na tonki ma na kamelo ka toregi na mamahatanga ni ruruguha,
ga vatera purua na ai ni Esipito,
i asa vige tamanira rârâ.
7Ngaira ka tamasia purua na hetamaniha.
Tahema inê kê hagavoravora atana i Esipito,
vi ‘Hua Raha Hagaborâ’.”
Enoni guguruga
8God ki vi tangê, ki vi:
“Gu segegi so igê na buka,
vi manga i he ki bâ na bagatarihata na enoni,
hanana ga girara nogata na enoni i muri me.
9Ngaira ka haritohea bâraha God.
Ngaira ka hagahagaparu tare.
Ngaira ka usitenigi tare na hagesuringa iana na Araha.
10Ngaira ka vi tangara na mane ni hinarunga, ka vivi,
‘Siana kamu marute.’
Ngaira ka ramonira na poropete, ka vi,
‘Siana kamu tamasigi tangagami na tarani, ga oto.
Mu visigi tangagami hete na marâ mi pasi rongogi.
Siana mu erasigi na takoha iamami,
naka ma ga pe monari.
11Tari era kamu râ!
Siana kamu hagabarasigi na taramami.
Igami kami pe pasi rongogamu,
mu tamasi renia na Araha God iata na Isiraelita.
Na God iami igamu ngekana!’”
12Ma God, i koro ma oto teha ngavê,
na Araha iata na Isiraelita, ki vi:
“Igamu kamu usitenigi na tamasinga iaku,
ma kamu hagêguri togo
renigi na hearihatana ma na hagaparunga.
13Tahema igamu kamu tasi bâraha.
Igamu kamu manga na para raha ni hinua,
i asita, ki agorata ma ki ahoge noga.
Igamu kamu parama, ma kamu vota.
14Igamu kamu page maromoromo,
manga na pi na hê ga kamakamaria ngavê.
Na ameameagani ka taromega ngavê,
ma ki pe arari, vige apegi renigi na maraha,
se vi na ve tenia na nonganonga.”
15Na Araha raramohaga hunia iata na Isiraelita,
God i apuna teha ngavê, ki vi:
“Mu aporo me, ma kamu piringiape,
ma kamu hagêguri togo reniê,
hanana mu tahitahi, mu ramoramo, ma kamu asitatara.”
Ma igamu kamu usi.
16Ma igamu kamu vi ma:
“Igami kami gavagava tenira na merongamami
igê na hosi iamami, ga tango teha ngavê.”
I monari, mu page gavagava.
Mu vi, vi na hosi iami ka tango teha ngavê.
Ma na hosi iata na merongami hete
ka tango teharira ngavê na animi.
17Manga mu bâsia na ani gi tage togo ma
na hosi ma na mane ni me igê,
na rehagaro na hitangimi ka page gavagava tenia.
Ma na vere rima na mane ni me
ka page hagavasigamu igamu hato.
I asa vi na hitangita na mane ni me iami,
vige page hita so,
nga noga ma na gahu na girarata igê na hungana.
18Naka ma, ma na Araha ki nanê tare,
hanana i takuigamu.
Ngaia ki nanê, hanana i takuigamu,
suria ngaia ki na God ni otoha.
Ga babarisi na enoni,
ga hagêguri togo renia na Araha.
God ki page hagakorora aporo na kariana
19Igamu na ai ni Jerusaleme,
ki page hato, vigamu angiangi.
Na Araha ki hetaki,
ma ki page aganarigamu,
matena mu avarasia.
20Naka ma na Araha ki hagangêgamu
renigi na ngêra ni mamasiaganiha
ma ki hagatonomigamu renia na ve na bagabevoani,
ma ngaia ki page ngahisigamu,
hanana i hagesurigamu.
Ma ki hato, vigamu page garia,
suria igamu kamu bâsia re maami maremi.
21Matena mu hagatasia na tara,
tanga na otomi se na mahami,
igamu kamu page rongoa, i tamasi i murimi,
ki vivi, “Na tara ikê. Mu râ suria.”
22Na nunuta na harasimi,
i gahuigi na siliva ma na golo,
igamu kamu page kasigi râ mangagi na roro,
ma kamu ngere, kamu vivi, “Kasigi râ vige va!”
23Na mateni mu hasihasi ngêra,
na Araha ki page hagasivorigi,
hanana ga akê koro ma ka ganora ngavê.
Ma na puruka ma na sipi ki page aharêsira na go.
24Na puruka ma na tonki, ga tagara i mu iami,
ka page ngêngê na ngêra koro, ga maningaigi maninga.
25Igê na matena ga henahuraugi igê
na hinua nganganihaga iata na merongami
ma ka nahuira ka me na enoni igê,
na ve oto ka page gogogo
tenigi na ara ni barani ma na hungani.
26Na hageha ki page mave manga na arito.
Ma na arito ki page sina teharia i ngekê:
na ararina na mavetani na tangiani gi pi.
Igê na matena ngekana
na Araha ki page baraigi na maara
ma ki page hatungigi na mamasiaganiha,
i bani nakagi tangara na kariana.
God ki page hagaitangia i Asiria
27Bâ, na Araha raramohaga hunia ki kere râ noga.
Ngaia ki bâ hahanetaga.
Na gi ma na roborobona ka hagabângenia na mangariaganiha iana.
Na tamasinga iana ka mangagi na vavatani na gi.
Na meana ki manga na anguruna na gi.
28Na manavasua iana ki manga na maganuha raha,
i ahegenira na ara ni marâ hato.
Ngaia ki voasira na enoni ga pe Siu,
ma ki kasira râ mangagi na roro.
Ngaia ki urura tanga na hagaitangiha,
ma ki hatungigi na katoha era iata.
29Ma igamu na kariana God,
igamu kamu page kiki vagevage
manga igê na bungiana na tangiana raha na rotu.
Igamu kamu page obakoro mangara na enoni,
ga râ suria na ringena na êhihi,
matena ga râ tanga na Ruma ni Rotu iana na Araha,
i anumasira na Isiraelita.
30Na Araha ki page tamasi raha,
hanana na enoni hato ka rongoa
ma ka hatamia na raramohana na mangariaganiha iana,
i manga na aguruna na gi,
na kumu na rangi, na roga raha,
na maganuha, na rogaroga huru ngavê.
31Na ai ni Asiria ka page bubununuga ngavê,
matena ga rongoa na ringena na Araha
ma ka hatamia na raramohana na hagaitangiha tangara.
32Na Araha ki page tahurura
surigi na ringeni na gogo ma na gita,
ga tahurugi na kariana.
Ngaia marena God ki page meraheariha na ai ni Asiria.
33I na agua, i nago kere vê noga,
ka bani hagarêa igê na bagagi raha,
i page ngaua na maneraha teha i Asiria.
Ngaia ki so ngavê ma ki aberabera teha,
ma ki hatarêa ki akê ngavê.
Na manavasua iana na Araha,
i manga na anguruna na gi,
ngaia ki page hagatarêa.
Currently Selected:
ISAIA 30: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
