ISAIA 29
29
Na bagabevoana ma na tahinga tanga i Jerusaleme
1Ki page era ngavê tanga i Jerusaleme,
na hinua i oga igê na bea ni vogasiha iana God.
Ki page era ngavê tanga i Jerusaleme,
na hinua o Tavite ki oga igê.
I murina na harisi gi tage se gi rua
henigi na tangiani raha ni rotu ma ni magotoha
2God ki page merâ me igê na bagabevoana tanga na hinua,
ga hêtana vi “Bea ni vogasiha iana God.”
Na enoni i ngekana ka page angiangi
ma ka page angiangi maramara.
Na hinua hagenani
ki page manga na bea ni vogasiha, i gagapuga.
3God ki page taharia na hinua,
ki page hagabarasigi na ara ni teha,
ma ki page rapigi ma tahakurugi na para ni hinua.
4Ka page ruhuruhua Jerusaleme.
Matena i tâtâ i ano, ngaia ki page tamasi,
ma na ringena ki page rongo
manga na ringena na enoni, i bani me,
se i page rongo sisite manga na ringena na enoni,
i anuia na mako.
5Jerusaleme, na ai mahuara hato, ga taharigo,
ka page gavagava mangagi na momo, i ahegenigi na roga.
Na mane ni me ni hagabubununugaha ka page gava
mangagi na ahani na rê igê na maguara.
6Na Araha raramohaga hunia
ki page parama, ma ki hagakakangi me,
hanana i hagatahigamu
renigi na gugusuhia ma na nunu,
garu hagakuru bêta,
renigi na roga raha ma na maguara,
renia na bagagi raha,
i hagamakakagi na ara ni marâ hato.
7Ma na mane ni me i na agua getigi,
ga taharia na hinua,
i oga igê na bea ni vogasiha iana God,
ma na tangaruha hato iata,
ma na marâ hato getegi tanga na hearihatana,
ngaira ma na ara ni marâ hato iata ka page magahuru
manga na maruteha, se na bagaririteha.
8Ngaira hato na mane, ga haku,
hanana viga sugaria Jerusaleme,
ka page manga na enoni, i magê ngavê
ma ki marute, vi ngê,
ma ki magê mênga, matena i riterite.
Se manga na enoni, i mamata roro na riona
ma ki marute, vi tono,
ma ki mamata mênga na riona, matena i riterite.
Na enoni ka pe tongesurigi na haganunuha
9Igamu kamu bonobonoga!
Hoi, mu râ suri parongami!
Igamu ki guru na maami!
Hoi, mu râ suri parongami!
Ga aripo na maami, mareha vi renia na vaini.
Mu tariahehu, mareha vi renia na tonoha.
10Na Araha ki katogamu, kamu mamêruga,
ma ki sugia ma, vigamu mêru bore.
Na poropete ka na maata na enoni,
ma God ki bara pusigi na maata.
11Na girarani na ara ni maruteha iata na poropete
ka pinihi tenigamu
manga na tamasinga igê na bani buka,
ga pe tangahia rârâ.
Manga gu vatea na buka ngekê
tanga na enoni, i girara i tomatoma,
hanana vige tomania tangago,
vikê ngaia ke vi:
“E, i bara, suria i purupuru.”
12Manga gu vatea na enoni, i pe girara ge tomatoma,
hanana vige tomania tangago,
vikê ngaia ke vi:
“E, inê kê pe girara ve tomatoma.”
13Na Araha ki vi:
“Na enoni ngegê ka ki, vi ngaira ka rahesiê,
ma hete ga tamasi i harata ma,
ma igê na aitangihata
ngaira ki asa ngavê, vige takusiê.
Na rotu iata ki ramata ma
ma na tauhata ma na enoni,
ma ka giraragi ma i harata.
14Vikê inê be hagakangira na enoni ngegê
renigi na tarani, ga pe bani giraragi i nago
ma ka page hagakonera ngavê.
Na giraraha iata na enoni ga tako mataha
ki page magahuru henigi na takoha mataha iata.”
Piringiape ma
15Ki page era ngavê tangara na enoni,
ga uhungia, viga pinihigi na katoha iata tenia na Araha.
Ngaira ka katogi pinihi na katoha iata,
ma ka vivi ngaira, “Ti ki girara i bâsigia?
Ti ki girara i tarahugia?”
16Ngaira ka era ngavê,
suria ga hagarehagi na ara ni marâ.
Na ta ki teha,
na mane i tagarahia na apira,
se na bogona na apinige, i tahea renia?
I hega, na apira ki girara
i vi tanga vari na mane, ki vivi:
“Igo ko pe taheê inê!”
Se i vivi: “Igo ko hite!”
17I page arihu, ma na vapuna i Libanone
ki page vora re na mu,
ma hemuri ki page vapuga aporo.
18Igê na matena ngekana
na enoni i pungu na karingata
ka page rongoa igê na buka, ga tomania tangara.
Na enoni, ga guru taropuru,
ka page rite ma ki marava na maata.
19Na enoni haritagi ka page vagevagesia aporo na Araha,
ma na enoni matareha ka page obakoro aporo
renia God, na Isiraelita ka rahesia.
20Ka page magahuru na ani ga hagamamasiagara na enoni getera
ma ka ruhia God,
ma na enoni hato, ga erataga, ka page mutemute.
21God ki page hagaerasira ngavê na ani,
ga hagatoraira na enoni getera,
ma na ani, ga roherohe pusira na enoni era,
hanana siana ka hagaitangira meni na bagatarihata,
ma na ani ga tohetohe vero,
hanana na enoni koro ka pe tarahugi na marâ i oto tangara.
22Tahema na Araha, i hagatahia o Abaramo,
ki tamasi tangara na raraha iana o Jakobo, ki vi:
“Kariaku, igamu ki hato, vigamu page maki,
ma ki hato, vige page arikuku na maami.
23Matena mu bâsira na karemi, gê page vategamu,
igamu kamu page aitangisiê,
vi inê ki na Araha God iata na Isiraelita.
Igamu kamu page hagarahasiê
ma kamu page hagahigasiê ngavê.
24Na enoni, ga bonobonoga, ka page bâ hagagara,
ma na ani, ga heheriga, ka page ageagesia na hagesuringa.”
Currently Selected:
ISAIA 29: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
