ISAIA 28
28
Na haganunuha tanga i Samaria
1I page era ngavê tangara na enoni raha i Samaria,
i ruguhira na vaini, ka beka ngavê.
Ngaira ka ageagesia na hinua raha iata,
i oga bê vato renigi na bena na mako koro.
Ngaia ki bâkoro era ma ki togatoga,
manga na tarepuri i bêna na maneraha.
Ma ngaia ki page vota
manga na takana na apinige i mêgu.
2Na Araha ki nahunia ta na enoni,
i ramo manga na rogaroga ahuru raha,
i toregi me na rangi ni anumaganiha
ma ki raramohaga manga na maguara raha,
manga na kumuna rangi, se na maganuha raha,
i anuigi ma ki toregi na ara ni marâ hato.
3Ga page puria so i ano na hinua raha,
na tarepuri bâkoro, ga ageagesia
na enoni raha ngegana, i ruguhira na tonoha.
4Na hinua raha, i togatoga
manga na tarepuri igê na bêna na maneraha,
suria i oga bê vato renigi na bena na mako koro,
ngaia ki mêgu noga, ma ki sugi vota.
Ngaia ki page manga na guana na fiki,
i matamata hagenago.
Na enoni, i bâsia, ki husia râ nga ma ki ngaua.
5I na matena ngekana
na kariana na Araha raramohaga hunia,
na ani ga tahitahi mêngara, ka page ageagesia,
suria tangara ngaia ki page manga na tarepuri, i togatoga,
manga na mahe renigi na takani bâkoro.
6Ngaia ki page katora na mane ni kotiha,
ka takusia na otoha,
ma ki page hagaramonira na mane ni me,
ga anumasigi na maani para
tenira na ani ga taharia na hinua.
Na poropete i ruguhira na tonoha mo Isaia
7Na poropete ma na mane ni hagarahenga
ka tariahehu nogata,
suria i ruguhira na vaini ma na tonoha ramo.
Ki aripo na maata ma ka tariahehu
renigi na vaini ma na tonoha ramo.
Na poropete ki asa, vige rongogiraragi na maruteha,
suria ga bekabekaga renia na tonoha.
Na mane ni hagarahenga ka pe girara, vige hagaotogi
na tarani, na enoni ka toregi tangara,
suria ngaira ka tono ma ki aripo na maata.
8Na momâta ka manasigi na bea ga ngêngê igê.
Na ara ni agua ki mamêkuga ngavê.
9Ngaira ka visiê, ka vi:
“I takusia, vi o ti kani ngaia?
Kani hagesurigia?
O ti ki obanigi na tamasinga iana?
I ararira ma na kare, ga kahu kasi susu.
10Ngaia ki tamasi ritia ma, ki vivi,
Katoa ikê; katoa ikana.
Siana ikê; siana ikana.
Sisite ikê; sisite ikana.”
11Manga mu usi, vigamu karingê,
God ki page atera na mahuara,
ga tamasi igê na tamasinga, i rongo hihitaga,
hanana i hagesurigamu.
12I nago ngaia ki bani vi tangagamu, ki vi:
“Mu mamaro ikê. Mu hagakaka ikê.
Na ani i meme na apemi mu mamaro.”
Ma igamu kamu usi, vigamu karinga.
13Tahema na Araha ki tamasi ritia, ki vivi:
“Katoa ikê; katoa ikana.
Siana ikê; siana ikana.
Sisite ikê; sisite ikana.”
Ma igamu kamu page gava,
mu page tapasu, mu page atobera,
ma igamu kamu page manguri.
Mu page tutu igê na etu,
ma ka page hagatotongogamu.
Na haganunuha tanga i Jerusaleme
14Hoi, igamu na mane paroparo,
mu marungira na enoni ikê i Jerusaleme,
mu karinga na tamasinga iana na Araha.
15Igamu kamu tamasi paroparo, kamu vi:
“Igami ma na Mera ma na agua iata na enoni me,
igami kami suruheri.
Matena na bevoana ga mutemute igê na enoni,
igami kami girara, vi i asa, vige tarahugami igami,
suria igami kami nahunia na agua mi rukuruku igê:
ngaia ka na hagabekaniha ma na hagaparunga.”
16Tahema na Araha God ki vi:
“Bâ, inê kê hagêrasia na u rangata i Sione.
Na rangata ngekana, i gatagata ma ki nganganihaga,
i bara vige unua akê.
I tâ i tâ.
Ma ki oga igê na segesegeha, i vi,
‘Na enoni, i tongesuri, ki asa,
vige bagahagêguri.’
17Na otoha ma na monariha ka na hagevovo iaku.
Inê kê page hagaerasigi na katoha iami,
mangagi na rangi ni anumaganiha ka katoa na maganuha raha,
i page torea na rukuruku iami,
na ani ni hagabekaniha ma ni hagaparunga.”
18Ga page aharêngia na suruheri iami henia na Mera
ma henia na agua iata na enoni ga me.
Na matena, i arâ me igê na bevoana ga mutemute igê na enoni,
ki girara, i page tarahugamu.
19Na bagabevoana ngekana ki page nahuigamu
tare ma tare, i na arani tangiani.
Mu page mamasiaga renia igê na tangiani ma na bungiani.
Na ara ni tamasinga iana God
ki page era ngavê tangagamu!
20Igamu kamu manga na enoni,
i uhungia vi mauru igê na bea i abubu
ma ki aruha renia na tokotoko i abubu.
21Na Araha ki page katoa na tarana, i tora getea,
na tarana i page hagakangigamu.
Ngaia ki page nahuira na kariana,
manga i nahuira i nago na ai ni Pilisitia
igê na hungana i Perasimi
ma igê na maruguna i Gibeone,
hanana i katoa na katoha iana.
Mareha vige mareha, ngaia ki katoa!
22Siana kamu rurusiê,
suria vigê haganunugamu.
Manga mu katokato vikana,
ki page bara ngavê tangagamu, vigamu tahi.
Na Araha raramohaga hunia
ki page hagaerasia ngavê na marê hagenani.
Inê kê rongoa, i vi.
Na takoha mataha iana God
23Mu karinga na marâ, ve visia.
Mu rongoa na tamasinga iaku.
24Na enoni i obania vi hasihasi i mu,
ki hega, i ama ni hikiru nga vari?
I hega, ngaia ki ama ni ahura nga vari?
25Matena i hikiru hato,
ngaia ki hasihasi ngêra:
na pini, na ruve ma na veko,
na atoato na êhi, na hana ma na gogo,
ma na koni ma na ohu igê na akirini.
26Ngaia ki giraragi na tagaraha i mu,
suria God ki bani hagagirara renigi.
27Ngaia ki pe retegi na pini ma na ruve
se na veko renia na bagatatapa raha.
Mareha! Na kere gê sisite ma.
28Ngaia ki pe opaopa renia na bagavato raha.
Mareha! Na kere vato ma.
Ngaia ki pe suhigi na koni.
Mareha! Ngaia ki gahoregi ma.
29Na ara ni giraraha ngegê
ka na mahatanga iana na Araha raramohaga hunia.
Na katoha iana God ka mataha,
ma ka koro teha ngavê,
ma ka akê me nga!
Currently Selected:
ISAIA 28: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
