ISAIA 27
27
1I na matena ngekana na Araha ki page amuria igê
na tatapa borahu iana, i nganganihaga ma ki masi,
hanana i hagaitangia renia Leviatane, na hua raha ni eraha,
ma ki page nahuia ki meme na ega raha ngekana,
i oga i asi, ki ahaketaketa ma ki agirogiro.
2Igê na tangiana ngekana na Araha ki page vivi:
“Na mu ni vaini iaku, mu barobaro ki renia.
3Inê kê bâsuria ma kê hagavokaria tare.
Inê kê anumasia igê na bungiani ma na tangiani,
hanana siana ta na enoni ki hagaerasia.
4Inê ki hato, vi ve mangariaga tanga.
Manga na tone ma na rauga era, ma ka gâga mêngagi,
inê be ragegi otooto râ nga ma be sungigi.
5Manga na merongata na kariaku,
ma ka avarasiê, hanana vigê anumasira,
ki tuguhira, viga hekorokoro hagenago heniê.
Monari, nakara ke hekorokoro heniê.”
6I page arâ me na matena,
na ai ni Isiraele, na raraha iana o Jakobo,
ka page manga na apinige, i vagavagaraga,
ki hisihisi, ki takataka ma ki rasirasi,
ma na guana ka page aharêsia ngavê na maveta.
7Na Araha ki hagaitangira na Ai ni Isiraele
teharira vari na merongata?
Na mane ni me ni Isiraele
ka me rako vari teharira na merongata?
8Mareha! Na Araha ki hagaitangira hagarari na kariana.
Ngaia ki paira hura tangagi na agua getigi.
Ngaia ki tarigenira râ manga na roga raha,
i rogatenigi râ na ara ni marâ hato.
9Igê na tarana ngekê ngaira ka kasi meni na tasi iata,
ma ka aharia God,
ma ngaia ki bonotenigi na bagatarihata.
Ngaira ka hanunu na hê na bea ni vogasiha ni ataro
ka vora manga na ahu,
ma ka hagamagahurugi hagetage
na nununa ka Asera na ataro
ma na bea ga susu igê tanga.
Na girarana vi ngaira ka urisi parongata.
10Na hinua nganganihaga ki aruhuruhu.
Ngaia ki hihiruga manga na tênga.
Ngaia ki vora re na pariki ni puruka,
ga ngêngê ma ka mamaro igê
ma ka tataku nikâ igê na apinige.
11Na arani na apinige ka babaro ma ka maria,
ma na gete ka toregi renigi na ario.
Ma suria na enoni ka bonobonoga
ma ka pe urisi parongata,
tahema God, i hagavorara,
ki asa, vige mesira se vige takuira.
12I na matena ngekana
na Araha ki page asirira tatage igê na kariana,
haganega tenia na ve i Uparatesi tanga na ve i Esipito.
Ngaia ki page manga na enoni, i nuinuigi na koni.
13I na matena ngekana ki page angiangi igê na ahuri,
hanana ga aporo me na Isiraelita hato,
ga bani henahuraura tanga i Asiria me Esipito.
Ngaira ka page aporo me
ma ka page rahesia na Araha
igê na hungana apuna iana i Jerusaleme.
Currently Selected:
ISAIA 27: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
