ISAIA 26
26
God ki page katora na kariana ka tehateha
1I page râ me na matena, na enoni i Juta ka page kiria igê na ki, i râ vikê:
“Na hinua iaka ki nganganihaga ngavê!
God marena ki anumasia.
Ngaia ki mangagi na bebetehe ma na para.
2Tangahigi na maani para,
hanana ga bêbanu me igê na enoni,
ga toto suria God,
ma ka paronga koro ma oto i maana.
3Araha, na enoni, ga ama ni toto surigo nga
ma ka hagêguri togo renigo tare,
igo ko vatera renia na morana na ramana.
4Mu hagêguri togo renia na Araha
tare, ki bê ki arâ,
suria na Araha God ki anumasigamu tare.
5Ngaia ki bani kasira so na enoni,
ga paroparo ma ka hagarahasira mareta.
Ngaia ki bani hagaerasia ngavê na hinua iata.
Ngaia ki hogea, ki aruhuruhu.
6Na enoni matareha ma na ani i bara tangara
ka arâ igê, ka puria so.”
7Igo, Araha, ko hagahataraia na tara tangara na enoni,
ga koro ma ka oto na parongata i maamu.
Na tara, ga arâ igê, ki manamanaga.
8Igami kami tê viteamu ma kami naasigo.
Igo nga kami tenigo bâraha.
9Igê na bungiani nikâ inê kê naasigo.
Inê kê naasigo i mêrihaku hagenani.
Na matena go surira igê na enoni i maveta,
ngaira ka page giraragi na tarani, ga oto.
10Naka ma go koro tangara na enoni,
ma ngaira ki asa, vige page giraragi
na tarani, ga oto,
suria ngaira ka usitenigo.
Ikê nikâ igê na agua,
ga goga igê na enoni koro,
ngaira ka bagatarihata,
suria ngaira ka usitenia na arahanga iamu, Araha.
11Na merongamu, Araha, ka pe girara,
vi igo ko page hagaitangira.
Gu hagabângenia,
vi igo ko takuira na kariamu,
hanana na merongamu ka maki.
Nakara, ke hatamia na hagaitangiha,
go bani naka tangara.
12Araha, gu vategami na ramana.
Igo ko bani hagaotogami,
ki râ bâkoro na ogaha iamami.
13God, Araha iamami,
na enoni getera ka bani marungigami.
Ma igo gi tage togo hete nga
na Araha iamami.
14Ma ngaira ka bani me,
ma ki asa, vige page mauri aporo.
Na nunuta ki asa, vige page aporo me,
suria go bani hagaitangira
ma ko bani mutera.
Ma na enoni hato ka bani hitenira.
15Araha, igo ko bani hagarakonigami,
ma ko bani katogami, kami ramoramo.
Igo ko bani haganahunigami
renigi na agua, ga rihigami.
Igê na tarana ngekê ki rongo raha na atamu.
16Araha, igo ko hagaitangira na kariamu,
ma igê na mamasiaganiha iata ngaira ka avarasigo.
17Igo, Araha, ko hagamamasiagagami, kami ngerengere,
manga na gete i harate kare, i hiote ma ki ngerengere.
18Igami kami mamasiaga ma kami ngerengere,
manga na gete i harate kare ma ki ngerengere,
ma kami mamasiaga hagaborâ ma.
Na apanena iamami ki pe teha.
Igami kami pe hagavorea rârâ ta na marâ.
19Araha, na kariamu na goamami, ga bani me,
ngaira ka page mauri aporo.
Na gahuata ka page aharaga aporo.
Ngaira hato na ani igê na anoano
ka page rite ma ka page kiki vagevage.
Na kâropu iamu ki na kâropu ni mauriha.
Manga na kâropu i hagamauria na ano.
Igo, Araha, ko hagamaurira na ani i na anoano.
God ki hagaitangira na enoni ma ki hagakorora na kariana
20Igamu na kariaku, mu banu i ruma iami
ma kamu purusigamu igê.
Mu oga pinihi sisite noga,
mataro me ki hatohato na mangariaganiha iana God.
21Na Araha ki râ me tenia i pasina,
hanana i hagaitangira na enoni i maveta
renigi na tasi iata.
Ngaia ki page ranganira na enoni,
ga nahunahu piri i maveta,
ma ki page hagabângenigi na agua,
ga bagira pinihi igê.
Currently Selected:
ISAIA 26: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
