ISAIA 25
25
Na ki ni visiha raha
1Araha, igo ki na God iaku.
Inê be hagahigasigo ma be hagarahasigo.
Na tauhamu ka hagakoneê ngavê.
Na katoha iamu i nago kere vê noga
igo ko bani tê surigi me.
2Igo ko bani ruhuruhugi
na hinua iata na merongamami,
ma ko bani hogegi na ruma nganganihaga iata igê.
Na ruma raha iata ka bani magahuru.
3Na enoni raramohaga igê na agua getigi
ka page hagarahasigo.
Na hinua ni hagamamasiaganiha ka page magutenigo.
4Na enoni matareha ma na ani i bara tangara
ka bani ruku i pasimu
ma ka asitatara igê na mateni ni bagabevoani.
Igo ko hagarukuhira tenigi na roga raha,
ma ko mamarusira tenia na singiha.
Na mane ni hagamamasiaganiha ka taharia na agua,
manga na rangi i tahusi igê na ruma,
5se manga na singiha i singia na mako avagavaga.
Ma igo, Araha, ko teharira na merongamami.
Igo ko hagamunira na mane, ga hagamamasiagagami,
manga na vaha i tâ pusia na singehana na arito.
God ki hagarêa na magotoha
6Igê nga na hungana i Sione
na Araha raramohaga hunia
ki page hagarêa igê na magotoha
tangara na enoni hato i maveta:
na magotoha ni ngêra mora ma ni vaini mora.
7I ngekana nga ngaia ki page hatungia hagetage igê
na ape ruruhinga, i aharêsira na enoni hato i maveta.
8Na Araha God ki page hatungia ngavê na mera.
Ngaia ki page taruhigi râ
na tavoni na maata na enoni hato.
Ngaia ki page hatungia na makiha tenira na kariana
i na ara ni agua ma vê ga oga igê i maveta.
Ngaia kani visia na Araha.
9I na matena ngekana ngaira hato ka page vivi:
“Ngaia nga ki na God iaka.
Igia ka hagêguri togo renia,
ma ngaia ki hagatahigia.
Ngaia nga ki Araha.
Igia ka raruni togo renia.
Ma i ngekê igia ka obakoro ma ka vagevage,
suria ngaia ki hagatahigia.”
God ki page hagaitangia i Moaba
10Na Araha ki page anumasia na hungana i Sione,
ma ka page purira so na ai ni Moaba,
manga na puruka ga purugi na ae.
11Ngaira ka page kaura rimata,
manga na enoni, i sugi tono, ki kokoro i ve.
Ma God ki page hagavotarira,
suria ngaira ka paroparo bâraha,
ma ka su na rimata.
12Ngaia ki page hogegi na hinua nganganihaga iata
henigi na para, ga akê bâraha,
ma ki page katogi, ki agorata so i ano.
Currently Selected:
ISAIA 25: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
