ISAIA 24
24
Na Araha ki page hagaitangia na maveta
1Na Araha ki page erasia ngavê na maveta,
ma ki page katoa, ki hihiruga.
Ngaia ki page pinoa na basina,
ma ki page tokorenira na enoni igê.
2Na tarana gi tage ki page tarahura na ara ni hitangita:
na mane ni hagarahenga ma na enoni,
na kare rakuraku ma na avanuta,
na ani ga vurivuri ma na ani ga hagavuri,
na ani ga hagaba ma na ani ga totora hagaba,
na ani ga ruruguha ma na ani ga matareha.
3Na maveta ki page erataga ma ki baguru ngavê.
Ngaia kani visia na Araha.
4Na maveta ki avagavaga ma ki marama.
Na maveta hagenani ki mameaga.
Na ano ma na vavearo karu êvariga.
5Na enoni ka erasia na maveta,
suria ga aharêngigi na ramata iana God
ma ka pe tê viteana,
ma ka kasia na suruheri iana henira,
i araria vi gâga tare.
6Tahema God ki hagaitangia na maveta.
Na enoni ka kasikasi meni na bagatarihata.
Ngaira ka meme tatage.
7Na varo na vaini ka maugu,
ma na tavoni na vaini ki pe rakorako.
Na ani, ga obakoro i nago,
ka oba era i ngekê.
8Na mâha ki hatohato.
Na tarotaroha ma na kahenga ka hatohato.
Ki hatohato nikâ, vige tarugigi na gita ma na ukelele.
9I hatohato vige kiki, matena ga totono na vaini.
Na vaini ki mahe tangara.
10Na hinua raha ki sutasutaga ma ki aruhuruhu.
I bara vige banuhigi na ruma.
11Na enoni ka hagagege i tara,
suria i mareha na vaini.
Na vagevageha ki mumute.
Ki apu na ageageha igê na agua.
12Na hinua raha ki aruhuruhu.
Na maani para ka ahogehoge.
13Na tarana ngekê ki page tarahura
na ara ni enoni hato i maveta hagenani.
Ngaia ki maratorana na matena,
ga husigi igê na guani na apinige ni ngêra.
Ga bani ngingia na apinige ni olive
ma ki anunu hato na guani,
ma ka bani husigi hato na guani na vaini.
14Na ani ga tahitahi mêngara
ka page kiki vagevage.
Na ani i kereso ka page hagarahasia na Araha,
15ma na ani i kerekê ka page visia raha.
Na enoni igê na tarasini ka page hagahigasia
na Araha God iata na Isiraelita.
16Tenigi na agua hagatê era i maveta
igia ka page rongora nikâ, ga kiria na Araha,
i koro ma oto tare na parongana.
Ma inê kê vi, vigê pe tako ni tahinga.
Inê kê mameaga.
I era ngavê tangê!
Na enoni ni hagaparunga
ka ama ni hagahagaparu nga.
Na hagaparunga ki ama ni ramoramo nga.
17Mu karingê, igamu hato!
Na perenga, na sutasutaha ma na etu
ka nanê tangagamu.
18Na ani, i uhungia vi gavagavatenia na perenga,
ki page vota igê na suta.
Na ani i huhura tenia na suta
ki page tutu igê na etu.
Na kumu na rangi ki page arâ me tenia na vavearo
ma na gatani na maveta ka page angingi.
19Na ano ki page avagavaga ma ki page gisigisi
ma ki page tahatahaga.
20Na maveta ki page tariahehu
manga na mane i ruguhia na tonoha,
se manga na ruma i angingi,
matena na roga raha.
Na tasi ka page hagahigea na maveta.
Ngaia ki page votavota su ngavê.
21I na matena ngekana
na Araha ki page hagaitangira igê
na ani ga raramohaga i vavearo
ma na maneraha i maveta.
22God ki page hagaitangira na maneraha
ma ki page kasira so haku igê na kiru.
Ngaia ki page purusira igê na kiru ngekana,
mataro me na matena ni hagaitangiha tangara.
23Na hageha ki page roto,
ma na arito ki hato, vige page mave,
suria God raramohaga hunia ki page Araha.
Ngaia ki page Araha i Jerusaleme i na hungana i Sione,
ma ki page hagabângenia na raramohana
tangara na maneraha iata na enoni.
Currently Selected:
ISAIA 24: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
