ISAIA 23
23
Na tamasinga renia i Punisia
1Ikê na tamasinga renia i Taire.
Igamu na mane mu tagara igê na haka i avoa,
mu angiangi raha,
suria i Taire, na hinua igê na sugu iami,
ki aruhuruhu.
Na ruma igê ka tâ hato i ano.
Na sugu igê ki era ngavê.
Mu page girara, matena mu aporo me tenia i Saipero.
2Igamu na ai ni tarasini,
igamu na mane ni hagavarahi haga,
mu angiangi raha.
3Igamu kamu hagaguhira na kariami
igê na haka tangagi na agua getigi,
hanana viga vurivuri ma ka hagavuri na ngêra i Esipito.
Igamu kamu mauri re na hagavarahi haga
henira na ara ni agua getigi.
4Ai ni Sitone, mu maki!
Na asi ma na rutuni i avoa
ka mu tenigamu, ka vi:
“Inê kê pe apara kare rârâ.
Inê kê pe marupe kare, mane se hehene.”
5Na ai ni Esipito nikâ ka gasuga,
ma ka hetaki,
matena ga rongoa, vi Taire ki aruhuruhu.
6Ai ni Punisia, mu angiangi raha!
Mu uhungia, kamu gavagava tangagi ta na agua.
7Ikê vari ngaia i Taire na hinua,
ga bani tagarahia i nago kere vê noga
ma na enoni ka vagevage tare igê?
Ikê vari ki na hinua, i kasira na enoni
tangagi na agua getigi, ka gâga igê?
8Ti ki kato, vi hagavotaria i Taire?
I nago ngaia ki marungigi rako na agua.
Na enoni, ga hagavarahi haga, ka maneraha
ma ki rongo raha na atata i maveta hagenani.
9Na Araha raramohaga hunia kani katoa vikana.
Ngaia ki katoa vikana,
hanana i hatungia na paroparoha iata
renigi na tagaraha iata,
ma ki kasira so na enoni, i rongo raha na atata.
10Igamu na avanuni na haka ni tagaraha
mu banu i mu, ma kamu tagarahigi na mu ni ngêra.
Mareha tagua, vigamu rukuruku igê.
11Na Araha ki otoa na rimana tanga na asi,
ma ki hatungigi na raramohata na maneraha.
Ngaia ki bonasira na merongata, ka hogegi
na hinua nganganihaga iata na ai ni Punisia.
12Ngaia ki vi: “Hinua i Sitone,
na vagevageha iamu ki hato,
ma na kariamu ka mamasiaga.
Naka ma ngaira ka gavagava i Saipero,
i asa iata, vige page asitatara.”
13Na ai ni Babilone hete, mareha vi na ai ni Asiria, kani ga ruhuruhua i Taire, ki vora na agua tangara na marâ vasiga. Na ai ni Babilone kani ga tahakurugi na para ni hinua i Taire, ka hogegi na ruma nganganihaga igê, ma ka ruhuruhua na hinua.
14Igamu na mane,
mu tagara igê na haka i avoa,
mu angiangi raha,
suria na hinua nganganihaga iami,
mu tanga pupu renia,
ki aruhuruhu.
15I na matena ngekana ka page takotako mu renia i Taire surigi na tangahuri harisi gi pi, na ararina na matena i mauri suria na maneraha. Matena ga hatohato igê na harisi ngegana, i Taire ki page manga na êrâ igê na ki, i râ vike:
16“Go, êrâ matareha,
ga bani bonotenigo.
Gu torea na gita.
Ku rihia na hinua.
Tarugia bâkoro
na gita iamu.
Gu ki ke rongo koro,
hanana na mane
ka takusigo aporo.”
17Matena ga hatohato igê na tangahuri harisi gi pi, na Araha ki page nakara na ai ni Taire, ka haganega aporo, ka hagatagarahigi na haka, ma na maneraha hato i maveta ka page taharigi. 18Na haga, ga tarahugi igê na tagaraha iata, ngaira ka page vatea na Araha. Ngaira ka pe nakagi râ, ma na enoni, ga rahesia na Araha, ka page vurigi re rako na ngêra ma na gahu bâkoro.
Currently Selected:
ISAIA 23: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
