ISAIA 22
22
Na tamasinga renia i Jerusaleme
1Ikê na tamasinga renia na Maruguna ni Maruteha.
Ai ni Jerusaleme, na ta ikê?
Tanu hega igamu kamu heogasi ma kamu magoto
i gerini aberabera na ruma iami?
2Renia ta mu barongo?
Renia ta mu ngerengere vagevage?
Na mane ni me iami, ga me igê na henahuita,
ngaira ka pe me suria vige togeaga.
3Na maneraha hato iami ka kasi na tangaruha ma ka gava,
ma na merongata
ka hagatotongora.
Naka ma ngaira ka gava ka râ hagatê,
ma ngaira ka têra tatage.
4Tahema mu nakê so,
hanana gê angiangi maramara
renira na kariaku hato ga me.
Siana kamu hagamuniê.
5I ngekê ki na matena ni bagatatakoha,
ni perenga ma ni heraonge
igê na Maruguna ni Maruteha,
ma God, na Araha raramohaga hunia,
ki nakagi tangagia.
Na para ni hinua ka agorata noga.
Na hungani ka tagitagi renigi na avaravaraha.
6Na mane ni me ni Elama
igê na hosi ma igê na kati ni me
ka râ me henigi na epage ni me ma na mage.
Na mane ni me i Kire ka bani ngahi
renigi na bêata iata.
7Na kati ni me ka gahuigi na maruguni i Juta,
na maruguni na mako koro.
Na mane ni me igê na hosi
ka ura i maani para i Jerusaleme.
8Ngaira ka râ tatahura i Juta.
Igê na tangiana ngekana
igamu kamu rurugugi na tangaruha
tenia na ruma ni tangaruha.
9-10Igamu kamu haharirigi na para i Jerusaleme,
ma kamu tarahugi na agua, ga sugi agorata noga.
Igamu kamu haharirigi na ruma i Jerusaleme,
ma kamu hogegi tani,
hanana mu hagagatagatanigi aporo na para renigi.
Hanana mu hagepuria na ve,
11igamu kamu karua na hê i rarona na hinua,
hanana i nonganonga igê na ve,
i arâ me tenia na bani nonganonga.
Ma igamu kamu pe takusia God.
Igamu kamu pe botage renia,
vi ngaia ki bani nakagi me na tarani ngegê
i nago kere vê noga,
ma ki katogi, ka voravora me.
12Igê na tangiana ngekana
na Araha God raramohaga hunia
ki bonasigamu igê, hanana mu angiangi,
ma kamu angiangi maramara,
ma kamu gorogoro bê huri,
ma kamu gahugahu tatari.
13Ma hete mu ruru ma kamu magoto ma.
Igamu kamu nahuira na sipi ma na puruka
tanga mu ngêngê masu renira,
ma kamu totono papasi na vaini.
Igamu kamu vi: “Nika!
Ge ngêngê ma ke totono!
Vari i gomaha igia ka meme!”
14Ma na Araha God raramohaga hunia
ngaia marena ki tamasi tangê, ki vi:
“I asa hagetage be bonotenia na bagatarihata ngekê
naka ma ga meme.
Ngaia kani gê visia,
inê na Araha God raramohaga hunia.”
Na tamasinga renia o Sebena
15Na Araha raramohaga hunia ki bonasiê, kê râ i pasina o Sebena, i bâsurira na kariana ma na nahuninga iana na maneraha. Ngaia ki bonasiê, kê tamasi tanga, kê vi: 16“Go takusia vi o ti kani igo? I oto tangago vari, vigo karua na matiku tangago maremu igê na tarihana na hê na hungana? 17Naka ma igo vi na enoni raha, ma na Araha ki page ragego ma ki page arihatenigo râ. 18Ngaia ki page tavogo ma ki page arihatenigo manga na bote, ma ko page vatovato hagatê igê na agua, i raha teharia na ani ikê. Ma i ngekana igo ko page meme i berarogani na kati ni me, go ageagesigi bâraha. Igo ko hagamakira na ruma iana na maneraha iamu. 19Na Araha ki page hatungigo tenia na tagaraha iamu, ma ki page kasigo vato tenia na âgâga raha iamu.”
20Na Araha ki vi tanga o Sebena, ki vi: “Igê na matena ngekana inê be unia me na kariaku o Eliakimo, karena o Hilikia. 21Inê kê page hagatugunia renigi na tuguni iamu ma na hogosimu, matena go enoni raha, ma be vatea renigi na ramoha hato, go nahunigi i nago. Ngaia ki page marupera na ai ni Jerusaleme me Juta, manga na mane i marupera maninga na karena. 22Inê be vatea renigi na ramoha hato, hanana i voravora na ruata tanga na maneraha, na raraha iana o Tavite. Inê be hagêguria renigi na ki tanga na ruma iana na maneraha. Manga i tangahia na maani ruma, i bara ta na enoni, vige page purusia aporo. Manga i purusia, ki bara ta na enoni, vige page tangahia aporo. 23Inê be hagagatagatania manga na kuhakuha igê na apê ni ruma, ma ngaia ki page hagarahasira na ahemata hagenani iana.
24“Ma ngaira hato na goana ma na kariana ka gâga hagêguria. Ngaira ka hagêguria mangagi na kuki ma na apira ga hagêguria na kuhakuha. 25Matena i manga ngekana, na kuhakuha, i kuku nganganihaga igê na apê, ki page akarakara, ma ki page votavota. Ma na marâ hato, ga hagêguria, ka page akamakama. Ngaia kani gê visia, inê na Araha.”
Currently Selected:
ISAIA 22: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
