ISAIA 21
21
Na maruteha renia i Babilone i vota
1Eraha tanga i Babilone,
na bagamanihê raha hagarangia na ve.
Na eraha ki râ me tenia na bagamasusu raha,
tenia na agua ni maguha.
Ngaia ki râ me manga na maguara,
i rêrê me igê na bagamanihê raha.
2Na Araha ki hagamaruteê,
ma inê kê rigia na tarana ni mamasiaganiha,
ni hagasuhinga ma ni rauha.
Mane ni me i Elama, mu sugarigi na hinua!
Mane ni me i Metia, mu arâ rihigi!
God ki page hagahatungigi na mamasiaganiha,
ga katogi na ai ni Babilone.
3Na tarani, gê bâsigi ma kê rongogi, matena gê marute,
ka katoê, kê bubununuga ma kê mamasiaga.
Na mamasiaganiha i manga na gete i harate kare.
4I nahuiê na takoha.
Na apeku ki tata.
Inê kê naasia bâraha, vige bungi rêrê,
ma hete na bungiana ki era ngavê tangê.
5Igê na maruteha inê kê bâsia,
viga hagarêa na magotoha.
Na bana ka kangigi.
Ngaira ka ngêngê ma ka tono.
Ki para ma, ma na ngereha, i vi:
“Aharaga, maneraha ni me!
Hagarêgi na bêata iami!”
6Na Araha ki vi tangê, ki vi:
“Gu naka na mane ni anumasiha,
ma ko vi tanga, ki hagarongo
renigi na marâ, i bâsigi.
7Manga i bâsira na mane igê na hosi,
na vererua ma na vererua,
ma na mane igê na tonki ma na kamelo,
ki tuguhia, i hahutugira maninga,
8ma ki hagangere raha.”
Na mane ni anumasiha ki vi:
“Araha, suria na tangiana hagenani
ma na bungiana hagenani nikâ
inê kê ura igê na bebetehe, ma kê bâbâ.”
9Na mane ni anumasiha ki ngere, ki vi:
“Bâ, ngaira ikana!
Na mane igê na hosi,
na vererua ma na vererua.
Babilone ki vota!
Babilone ki hato iana!
Na ara ni nunuta hato na ataro iata
ka amenamena i ano!”
10Kariaku Isiraele,
ga bani ugigamu ma ka bani hatagamu,
inê kê kahu hagarongogamu me ma
renia na taroha koro,
gê rongoa tenia na Araha raramohaga hunia,
na God iata na Isiraelita.
Na tamasinga renia i Etome
11Ikê na tamasinga renia i Etome.
Inê na mane ni anumasiha,
ma ta na enoni ki ngere tangê
tenia i Etome, ki vi:
“Mane ni anumasiha!
I hega, i arihu mênga na bungiana?”
12Inê kê arami, kê vi:
“I tangitangi noga
ma hemuri ki page bungibungi nikâ.
Manga go obania, vigo hagateê nikâ,
i koro ma, go aporo me nikâ.”
Na tamasinga renia i Arabia
13Ai ni Tatane,
igamu ma na marâ hato iami kamu tênga
igê na ve banga i na masusu i Arabia.
14Mu vatera na ve na enoni, i mamata na riota,
ma ka arâ me tangagamu.
Igamu na ai ni Tema,
mu vatera na ngêra na enoni,
ga rukuruku i pasimi.
15Renia ngaira ka gavatenia na henahuita,
tenigi na tangaruha, na tatapa ma na epage,
ga nanê, viga nahuira renigi.
Na tamasinga renira na ai ni Ketare
16Na Araha ki tamasi tangê, ki vi: “I murina na harisi gi tage togo nga ma na raramohata na ai ni Ketare ki page hato hagetage. 17Na mane ni hananiha ka ramo teharira na mane getera i Ketare, ma tani ma na hitangita ka page hita. Ngaia kani gê visia, inê na Araha God iata na Isiraelita.”
Currently Selected:
ISAIA 21: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
