ISAIA 17
17
God ki page hagaitangirerua i Siria me Isiraele
1Na Araha ki tamasi, ki vi:
“Tamasiko ki hato,
vige page vora nikâ na hinua.
Ngaia ki page aruhuruhu.
2Na hinua i Siria ka page hihiruga.
Na sipi ma na puruka ma ka page ngêngê i ngekana.
Ma ki asa ta na enoni, vige tarigenira râ.
3Na hinua nganganihaga i Isiraele ka page magahuru,
ma na arahanga ki page hato tenia i Tamasiko.
Na ai ni Siria, na ani ga tahi,
ka page maki mangara na ai ni Isiraele.
Ngaia kani gê visia, inê na Araha raramohaga huniê.”
4Na Araha ki tamasi, ki vi:
“Igê na matena ngekana ki page hato igê
na raramohata na Isiraelita.
Na matarehana ki page urusia na ruruguhana iata,
manga na enoni, i binibinikaga i nago,
ma hemuri ki rataga ngavê.
5Isiraele ki page bâ
manga na mu ni koni, ga bani retegi.
Ngaia ki page matarotaro,
manga na mu i maruguna i Repaimi,
ga bani opa hagahatungia.
6Tani ma na enoni ka page tahitahi.
Isiraele ki page manga na apinige ni olive,
ga bani husi hato na guani,
nga noga ma ta guani,
ga arisigi kê i na geregerena,
se tani igê na arani i ano, ga hita so.
Ngaia kani gê visia,
inê na Araha God iata na Isiraelita.”
7I na matena ngekana,
na enoni ka page takusia igê God,
i hagavorara ma ki apuna teha ngavê,
na God na Isiraelita ka rahesia.
8Ngaira ki hato, vige page hagarapera nikâ na ataro,
ga vogasira igê na bea,
ga tagarahigi re rimata mareta,
se vige hagarapea nikâ na nununa na ataro ka Asera,
ga tahea re rimata mareta,
se vige susu nikâ tanga.
9I na matena ngekana na hinua nganagnihaga
ka page hihiruga ma ka page aruhuruhu igê,
mangagi na hinua iata na Hevita ma na Amorita,
ga aharaga tenigi,
matena ga gavatenira na Isiraelita.
10Isiraelita,
igamu kamu bani bonotenia God na tahingami,
i anumasigamu, matena mu rukuruku i pasina,
ma kamu parahesia ma na ataro,
ma kamu maruigi na mu mangara na enoni ahuroto.
11Naka ma manga na na mu iami,
ma ka vavaka ma ka takataka
igê nga na mavoraro, mu hasigi igê,
ma ki asa hagetage, vigamu tarahugi na ganuni.
Ma ka page tarahugamu ma hete
na bagabevoani ma na mamasiaganiha,
i asa vige page hato.
Na merongata na Siu ka vota
12Rongo! Na enoni ahuroto ka heasiasi.
Ngaira ka rongo manga na asi, i arobo ma ki maguhu.
13Na meronga ka râ me manga na ve, i ao ngavê.
Ma God ki ramonira, ma ngaira ka gava aporo,
manga na akuhukuhu na roga ki ahegenigi,
se manga na go maria igê na maguara.
14I manurahi ngaira ka hagamagusigia,
ma bâ, igê na mahogotana ngaira ka bani magahuru.
Na tarana ngekê ki page tarahua na ani ma na enoni,
i rurugu tenia na apanena iaka.
Currently Selected:
ISAIA 17: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
