ISAIA 18
18
God ki page hagaitangia i Nubia
1Nubia, na agua ni namu,
i na apanena harê na ve i Nile.
2Ngaia ki hagatorangenira na mane tora tamasinga,
ka tage igê na kere haka na mahoro
ma ka ataha suria na ve i Nile.
Mu aporo i pasimi! Mu rêrête
tanga na apanena iami, ga vurusia na ve.
Igamu na mane tora tamasinga,
mu me aporo na rongoha tangara na enoni i pasimi,
ga borahu ma ki bâkoro na apeta,
ga raramohaga ma ka rikitaga,
ma ka hagamagusira na enoni hato i maveta.
3Igamu hato na enoni i maveta, mu rongo!
Mu nananêa na giraraha igê na hungani.
Mu nananêa na ringena na ahuri.
4Renia na Araha ki bani vi tangê, ki vi:
“Inê be oga haritagi ma i pasiku
ma be hahutugia so na maveta.
Inê be muni manga na kârupu,
i vokavoka munimuni surigi na bungiani,
matena na arito ru,
se be muni manga na arito igê na ritovagana.
5Matena na takani na vaini ka bani anunu,
na guani ka matâsi
ma ki mamênga na matena vige husigi,
ka uvegi na arani.
I page tagenana ma tangara na ai ni Nubia,
matena na merongata ka uvera igê.
6Na gahuata na mane ni me iata
ka page tâtâ totoko i ano,
ma na manu ma na marâ vasiga ka page ngaugi
igê na matena na arito ru
ma na matena na rogaroga ahuru.”
7I na matena ngekana na Araha raramohaga hunia
ki page aganarigi igê na votovoto iata na enoni,
ga borahu ma ki bâkoro na apeta,
ga raramohaga ma ka rikitaga,
ga hagamagusira na enoni hato i maveta,
ma oga i na agua, ga vurusia na ve ngekana.
Ngaira ka page arâ me igê na hungana i Sione,
na agua ga rahesia igê na Araha raramohaga hunia.
Currently Selected:
ISAIA 18: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
