ISAIA 16
16
1Na ai ni Moaba i hinua i Sela igê na masusu
ngaira ka mahatangenira na kareta na sipi
tanga na maneraha, i marungia i Jerusaleme.
2Ngaira ka bagatugupu rârâ
ma ka oga igê na hagarangia na ve i Arenone,
mangara na manu, ga tarigenira tenigi na robota.
3Ngaira ka vi tangara na ai ni Juta, ka vi:
“Mu visia me na marâ, i ararigami kami tanua.
Mu anumasigami manga na apinige,
i mamarusira na enoni, matena na ritovagana,
hanana mu mamarusigami.
Igami na enoni mi gava.
Mu pinihigami, siana ka tarahugami.
4Mu nakagami, kami oga i pasimi.
Mu hagatahigami tenira na ani,
ga obania vi nahuigami.”
Na hagamamasiaganiha ma na bagabevoani ka page hato,
ma na ani, ga hagaerasia ngavê na marê,
ka page magahuru.
5Ma hemuri na hitangita na raraha iana o Tavite
ki page maneraha,
ma ki page marungira, ma ki page takuira,
ma ki page toto surira na enoni.
Ngaia ki page botage renigi na tarani, ga oto,
ma ki page tagara raha nga renia na otoha.
6Na ai ni Juta ka vi:
“Igia ka bani rongoa,
vi na ai ni Moaba ka parunira ngavê.
Igia ka bani girara,
vi ngaira ka heruruhi ma ka hagakita
ma ka tevotevo rasira mareta.”
7Na ai ni Moaba ka page angiangi,
suria i tarahura na bagabevoani.
Ngaira ka page angiangi bâraha.
Ngaira ka page angisigi na ngêra koro,
ga ngaugi i hinua i Kire Heresi.
Ngaira ki asa, vige tako ni tahinga.
8Na mu hagarangia i Hesibone
ma na pariki ni vaini i Sibima
ka erataga ngavê.
Na maneraha i na marê ki aharêsira ngavê
na tonoha ni vaini tenigi na pariki ngegana.
I nago na pariki ni vaini ngegana ka rârâ
ma ka tariha i hinua i Jasere
ma i kerekê tanga na masusu
ma i kereso tanga na apanena harê na Asi Asiga.
9Ma i ngekê inê kê mesigi na pariki ni vaini i Sibima
henira na ai ni Jasere.
Na tavoni na maaku ka gogo
renirerua i Hesibone me Eleale,
suria i marehasira ngavê na ngauha,
hanana vi na enoni ke vagevage re.
Henaka na mako i koro,
ma na enoni ki asa, vige vagevage igê.
I asa na enoni, vige kahu ngerengere
se vige kiki igê na pariki ni vaini.
10I asa na enoni, vige kahu rusigi
na guani tanga na vaini.
Na ngere vagevageha ki kahu hato ngavê.
11Inê kê gegege manga na varoni na gita,
suria gê mesirerua i Moaba me Kire Heresi.
12Na ai ni Moaba ka hagame apeta mareta
renigi na tagereha iata tangagi na ngêsu,
hanana viga avaravara igê.
Ma ngaira ka avaravara purua ma.
13Hoi, i ngegana nga na tamasinga iana na Araha renia i Moaba. 14Ma i ngekê na Araha ki vi: “Surigi nga na harisi gi oru na ramoha ma na nahuninga raha i Moaba ka page arumakaka. Na enoni rako igê, ma tani ma ka page hita so. Ma ngaira ka na enoni purua.”
Currently Selected:
ISAIA 16: KCB
Highlight
Copy
Compare
Share
Want to have your highlights saved across all your devices? Sign up or sign in
© 2011 Bible Society of the South Pacific
